立場新聞 Stand News

真係好頂唔順啲財演

2017/11/24 — 15:41

做開研究的人,基本上都知道你自己有幾勁,並唔係睇你寫幾多份報告,而係睇你自己報告內容有幾準確。

一般嚟講,賣方報告通常的時間性為未來12個月,中同唔中都冇所謂,因為報告無人睇,分析員出報告為求自high。買方分析員寫畀fund 佬嘅報告,時間性就有啲參差:做對沖基金的,你嘅投資建議最好在短期(可能以日、星期作單位)內發生,如果唔係你都唔使等到派bonus 先至搵工;如果你係做長線投資的,咁你就可以咬老底慢慢歎,等到天昏地暗先至再計數。

作為財演(題外話:蘋果日報話財演係蔡東豪發明嘅term,建議考慮攞專利),報告的產量、時間性、準確性嘅要求就會有啲唔同。 

廣告

第一,你都唔係好需要寫報告,因為你嘅target audience 唔鍾意睇字,亦唔係想理解你的思維。只要你肯吹『揸、沽、溝、追』,就會有人肯聽。

第二,至於timing同埋accuracy嘅嘢, 你日日都講啲唔同嘅嘢冇人會記得啦。

廣告

今朝早睇新聞,見到資深財經專家林一鳴博士又講嘢。根據東方日報報道 [1],林博士話『恆指未來有50%機會升破2007年高位』,但又要落多句disclaimer 話明年『由牛入熊』嘅機會很大。

真係好忟!係好L忟! 我到底睇咗啲乜L嘢!

令我燥底嘅地方有幾點:

1)有50%升,即係有一半嘅機會跌。唔係升就跌,咁我使Q你講呀?

2)記者quote林博士話:『恒指較高位調整一萬點其實唔出奇。』咁點解要叫投資者『瞓身』呢?DLS 搞到我又扯頭髮。

3)報告又提及林博士指出『股市和樓市香港的關係不高』。由於我都幾鍾意㩒下Excel,點知一睇,發現恆生指數同埋物業價格( 據差餉地物業價署數字)在過去十年(2007年九月起)的按年升幅的相關係數為0.685。乜咁都叫冇乜關係咩?統計學新定義?

曾幾何時,自己都好想走去做財演,很可惜阿爸阿媽生到我成嚿飯咁,自己又無學歷,難以俾人有深刻印象,所以只可以做番嚿薯仔。

而由於無得參與,自己唔知幾多年前就已經開始停咗睇財經版,主要覺得內容有啲 on9, 同埋發表意見嘅人無乜accountability,講完就算Q  數。

直到上年政府再次推出辣招,有朋友send咗林博士即時發表的文章畀我睇[2],搞到我忟忟地,想開始寫下嘢、發洩一下自己嘅情緒及對財演的不滿。

唔想畀人話馬後炮,所以唔講我當時嘅想法。不過,我都想大家回顧一下林博士之前的預測,同埋有三大comment:

1)二手樓市無進入冰河時期:從2016年11月到今年10月期間,二手樓宇買賣每月平均4,358宗(2015年11月到2016年10月3,418);

2)地產經紀好似冇少到(到9月為止,地產業就業人數比上年11月多咗6,800人,不過應該唔係全部都係經紀);及

3)梁特首變咗梁副主席。

 

註 [1]:明年見「熊」?林一鳴:恒指高位調整萬點唔奇

註 [2]:我對推出樓市辣招後的10個預測

發表意見