立場新聞 Stand News

股市致勝唯一法則

2017/2/5 — 11:12

Loser去年喺一個內地網上股票平台開戶,近日睇睇網站數據,平台成立4年,用戶數量達310萬名,累計交易額超過3500億。平台仲將客戶2016年炒股表現作出統計,小弟嘅交易表現係打敗咗94%用戶,以平台用戶量計,成績超越291.4萬人。

照理跑贏咁多人,應該高興都嚟唔切,左睇右睇都算係高手喇掛。實情卻係兩回事,當睇到呢個數據,即時反應係大吃一驚,點解?好失禮咁講,去年Loser放喺個戶口金額約莫球零嘢,交易次數都有幾百次,但可以話俾大家知,所謂打敗9成4用戶嘅我,全年表現只係「打個和」。

打敗291萬人

廣告

唔知呢個數據可信度有幾高,亦唔知佢點計算,但所謂超越咁多人,全年投資回報竟然都係打個平手,咁嗰291.4萬人係咪要輸?若然係,呢個數字唔係嘢少,接近全港人口4成,當然佢係全國計算。

睇完呢個數字,深深感到過去有人話股票市場專收叻仔,真係冇講錯,Loser有名你叫,都唔係乜嘢叻仔,所以都未至於輸錢,但咁多人炒股,輸嘅人係超過9成以上,咁你話炒股幾兇險,怪唔得近年咁多人離開股市,轉而走去炒樓。

廣告

棄股炒樓

樓市係走一個趨勢,只要大勢上,買乜樓都升,唔似股票時升時跌,即使大市升,都唔係隻隻股升,加上近年股市起伏不定,唔好話一般人,即使係基金經理或專業炒手,要贏錢都十分困難。

你話用價值或長線投資又點?睇返恒生指數成份股,除咗騰訊(0700)外,你話有邊隻股份係長升長有,可以話九成以上個價都高唔過07年高峰,咁你話點透過股票去創造價值,難怪陸東都淪落到要炒殻股。

散戶能透過股市賺錢,確係鳳毛麟角,即使賺到,都可能係好運,但運氣呢家嘢唔會成世陪住你,難怪神級電視劇「大時代」入面,股神葉天死前奉勸股民,「智者應知此乃一處永無贏家之戰場,取勝唯一法則⋯⋯「及早離去」。

發表意見