立場新聞 Stand News

買樓定唔買樓

2016/11/13 — 11:21

年初好多專家話樓市唔掂,估計樓價跌3成,點知年中個市又翻生。事實上,過去十年每次樓價調整後唔單止重捨升軌,仲迭創新高,唔少人後悔不矣。

坦白講,你話樓市有深度調整,我可以大膽講未來一年都睇唔到有咁情況,息口始終低企,即使特朗普上場後真會加息,怕且一時三刻加幅有限,再者本地市場供應冇增加,經濟情況又未至於好差勁,樓價按理差不到那裡。

有買貴冇買錯?

廣告

雖然係咁,loser認為現階段都係忍吓手,畢竟樓價升到今日高位,再升空間係有,但怕且幅度有限,唔值得喺呢一刻置業。簡單講,係值博率唔高,倘若出現黑天鵝,喺咁高位買樓,一跌落嚟可以話冇得守。

不過有啲人就話:「幾大上車先,樓係有買貴冇買錯」,呢個諗法實則犯咗好大錯誤,買貴就即係買錯,你睇97年買入深㘫浪翠園,到今日都返唔到家鄉。

廣告

有人又話:「樓價跌又點,自住冇問題」,呢個更加係自己呃自己,層樓係資產,高價買入就等如買貴貨,跌咗價就係虧損,你諗諗本來可以用五蚊買嘅嘢,你用咗十蚊買,點會話冇問題?況且大多數人借貸買樓,每個月要真金白銀供架,你話低價買定高價買化算?

沒有必賺嘅資產

仲有人好有信心話:「樓價係唔會跌,你睇過去十幾年,邊有跌過」,講呢啲說話嘅人怕且97年時仲係細,未見過樓市崩圍嗰種恐怖情況,當時樓市衰足六年,樓價跌足七成,揸住層負資產樓,想唔要都唔得,因為銀行會追你差價。

而且樓價係咪永遠唔跌,直唔敢講,你睇睇東京,30年前買層樓要供足3代人,今日樓價平過雅居樂喺東莞個樓盤,世界係冇話必賺嘅資產,樓亦如是。

又有啲人咁講,香港樓有大陸佬條水,足以支撐本地樓價。Loser唔知有幾多大佬喺香港買樓,但內地經濟係咪永遠咁掂唔知,而且你估大陸政府儍咩,早前禁止大陸人用銀聯卡喺香港買保險,講唔埋遲啲會管制埋買樓。總之成日話大陸佬買樓,香港樓價只升唔跌,呢啲係地產經紀「昆」客嘅技俩咋。

發表意見