立場新聞 Stand News

開會神憎鬼厭

2015/8/7 — 18:30

背景圖片來源:Sebastiaan ter Burg flickr圖片

背景圖片來源:Sebastiaan ter Burg flickr圖片

無論公司大細,係香港競爭激烈嘅環境中,外行領導內行,唔係常態,所有坐喺高位嘅人,我估應該有啲行頭本事。

但係公司越大,開親十幾廿人嘅會,外行對內行指指點點扮畀意見,就係普遍到飛起嘅現象。驚死畀上頭覺得自己無貢獻,點都要搵啲嘢講,仲要扮哂投入,揸住支筆,坐到直一直,大佬呀,使唔使咁騰雞呀?醒少醒,得唔得?齊齊講少句、問少句白痴嘢當幫忙,可以喳喳臨收場。

廣告

咪以為睇過電視廣告,落街市買過嘢,讀過商業新聞報導,就當自己係市場推廣、零售、生意専家,唔該照吓鏡,收埋啲維園阿伯意見啦。如果可以唔使深入研究,隨便畀到啲有價值意見,輕易留意到其他人忽略嘅關鍵,咁即係兜口兜面對住嗰個內行話:「你好廢」。人哋真係咁水皮?有無睇高自己呀?外行教內行做嘢?慳啲啦。

我知,有啲麻煩上司,最鍾意開埋啲有開會時間、無散會時間、無議程嘅吹水大會,仲時時臨收工叫開會,聽人逐個報告工作進度,然後扮哂開明討論,再扮哂义燒畀啲阿媽係女人嘅指示,好無奈。

廣告

除咗背後咒罵,解決方法只有一個,喺自己職責範疇之內,盡量下放權力,千方百計開少啲,甚至唔開會,開親就兩個話到事嘅人走埋傾兩句,最多七個,減少外行騷擾內行嘅機會,唔使嘥咁多開會時間,可以埋位做正經嘢。慢慢你會發現,自己嘅部門生產力高咗,放工時間早咗,等到你權力同埋影響力越嚟越大,凡親近得你多嘅,都會打高兩班波。

如果你堅決用開會掌控全局,顯示自己有幾咁英明神武,有控制人嘅權力,咁就多謝你囉,因為你返工得嗰四、五成時間埋位,即係讓半臂,醒目嘅公司就有八、九成時間認真做嘢,剩低一成用嚟嬉戲,長遠嚟講,一定輸畀隔離。

如果唔想畀人背後講壞話,唔想畀人咒罵,開少啲會啦。提醒自己,提醒朋友,唔該些牙。

 

原刊於作者 facebook page

發表意見