立場新聞 Stand News

馬雲吹牛 世界第一

2017/1/15 — 11:26

馬雲 資料圖片:網絡圖片

馬雲 資料圖片:網絡圖片

特朗普能夠做到美國總統,其中一大原因係佢識得投美國佬所好,簡單講係懂得吹水。競選期間許下激進又動聽嘅承諾,例如要強制遣返過千萬非法移民,又要查希拉莉「電郵門」,點知獲選冇耐,已經打倒昨日的我。正所謂選舉還選舉,嗰個只係一場投票游戲,實際執政又一回事,之前講吓你咪太認真。

辜勿論點,你不得不佩服佢吹水本領,之但係上周見馬雲跟特朗普會面,你發覺講到吹牛這家本領,還是中國人勝一籌。可不是嗎,馬雲一出口就話可以幫美國創造百萬個就業機會,相比起佳士拿同福特汽車話返美國設廠,新增職位只係區區2000及700個比較,兩家巨企實在太少家子氣。

阿里巴巴市值增加500億

廣告

比起日本首富孫正義,馬雲更不得了,孫正義話要喺美國投資500億美金去創造5萬個職位,可我哋馬大哥一毫子都唔使,就創造百萬就業機會;唔單止咁,自馬雲跟特朗普會面,阿里巴巴嗰幾天股價升咗3美金,市值上漲70億美元(560億港元),即係話唔使花錢仲帶嚟賬面富貴㖭。

至於點樣幫美國增加職位,又聽聽馬大哥解畫:「阿里巴巴希望5年內,幫助100萬美國小商家和農場主,通過我們平台向中國和亞洲客戶銷售商品,藉以創造100萬個美國就業」

廣告

老實講,聽完佢段講話,實際點做你可能都摸不著頭腦,但你唔好理,特朗普同馬雲都笑哈哈,媒體大事報道,馬雲好不威風,儼然去為國人拯救山姆大叔,自特朗普獲選後,講話處處窒住中國,馬雲終為強國人出番口烏氣。

美國總統被忽悠

馬雲最叻係俾夢想別人,當年創辦阿里巴巴,又冇錢又冇面,為激勵員工,就話奬俾員工年歲,例如見阿甲好勤力,就送佢一百歲,見阿乙表現好,又送佢二百歲,至於錢,Sorry就冇喇,結果有人竟然得到九千歲。

所以話呢,吹水呢家嘢,馬雲技術性擊倒美國總統,咁你話係咪世界第一;建議西班牙、意大利、希臘不妨邀請馬雲去訪問,等馬生幫佢解決失業問題。

馬雲成功忽悠特朗普,睇嚟當年馬雲送一頭小狗俾史玉柱(巨人集團老細),叫做奧巴馬,怕且今年又要送多一隻狗俾史老闆,個名就叫特朗普。

發表意見