立場新聞 Stand News

IQ高EQ低:死硬

2017/1/22 — 11:04

特朗普(特朗普 facebook 截圖)

特朗普(特朗普 facebook 截圖)

特朗普正式就任美國總統,佢老哥話自己團隊係歷來最高IQ,事實係咪,真係唔知,但特朗普EQ就肯定唔係最高,甚至應該係低水平。

坦白講,IQ高並唔代表成功,從來冇聽過李嘉誠、李兆基IQ爆棚,做生意成功,EQ佔主要因素,反之IQ愈高之人,好易被天才所誤。

三國時楊修之死,就因持才傲物,吓吓要表現自己過人之處而招致殺身之禍。近代啲睇,70年代香港有條𡃁仔外號神童輝,心算快過計數機,上電視表演令全香港人嘆為觀止,唔少人認為神童他日必然無可限量,甚至可以成為愛因斯坦。結果呢,因為細時被人迫計數,日日訓練,令佢對數學產生厭惡,聽聞長大後做咗肉類分割技術員,即係乜?咪就係豬肉佬囉。

廣告

投資最重EQ

從政係EQ重要過IQ,你睇鬍鬚曾,做財爺hea足十年,但EQ高,甚少發脾氣,懂得打哈哈同忽悠市民,結果民望反而最高。其實唔單止從政或做生意,投資亦如是,EQ往往最重要。

廣告

陸東做分析員時係威係勢,轉行做基金經理後,親身上場操盤,個基金連連跑輸大市,最後以結束收場,點解?除咗時勢或者運氣外,跟佢本人EQ有一定關係。

喺度講個故仔,就知佢EQ好唔掂,話說有次電台請佢做節目,陸生話唔可以有其他記者出席,點知有啲媒體收到風,走咗去電台等佢,陸東到埗後見到有記者,竟然發脾氣拂䄂而去,成個節目俾佢搞到收唔到科。

陸東淪落到炒殻股

你話喇,作為一個基金經理,市場千變萬化,若然EQ唔夠,市好時你意氣風發,市差時你急燥煩亂,點可以管理好隻基金,唔通大跌市時,你大發老脾就可解決問題?

最近佢又東山再起,走咗去炒殻股,嘩!堂堂價值投資忠實信徒竟淪落到炒殻股,即使能一時賺錢,都背棄咗自己多年信念,你聽過巴菲特專炒賣殻未呢?

發表意見