立場新聞 Stand News

【圖輯】率先睇 十一開幕草間彌生美術館 咪又係南瓜

2017/9/26 — 21:24

日本著名藝術家無幾個,其中一個就係草間婆婆。佢在世界各地勁多 fans,好多時個人都要排長龍。佢在東京個新個人美術館,將會在 10 月 1 日開幕。今日去 preview,寫篇開箱文同大家介紹返。

既為實際需要,可能亦想晒命,入場第一眼畀觀眾睇到的是「入場要預約 限九十分鐘」(網頁亦一樣,你能想像一個博物館 homepage 首頁乜字都無,只有「入場要預約 限九十分鐘」嗎?)。不過我也試過被三番四次強調限時九十分鐘,那時是食放題。

話說回來這美術館在早稻田站附近,是獨棟建築,連天台計共有五層。美術館話「為安全起見」,觀眾一定要由地下行上去,再坐電梯落返來。此外美術館內不准攝影不准飲食不准講電話不准帶遮,有趣的是寫字不准用墨水筆和其他濕的筆,可能驚寫著寫著心血來潮寫埋落草間彌生的畫。

廣告

正在舉行的是「開幕展:創造是孤高的追求,愛可以令你更接近藝術」。地下有 reception 和一張放紀念品的桌子。上一樓,全是黑白作品。二樓則色彩斑斕。至於作品介紹,恕我不多講,除了那些網和那些眼睛,就是那些南瓜那些花。

三樓可能最受港女(歡迎大家辯論何謂港女)歡迎,咪就係那個用鏡反射出無限個發光南瓜的暗房囉。Photo op 囉。入去要排隊,每次限睇兩分鐘,selfie 要快手。

廣告

四樓有個圖書 corner,放著好多關於草間彌生的書。不過因為無坐椅,所以只能站著讀。室內設計上顯然不是 for 你認真睇,只係畀你 scan 下草間婆婆有幾勁。一般來說書當然是用來讀的但是在這裡,它的意義恰恰相反,在於你無機會細讀。因為你無機會細讀所以你無法擁有書中知識,因為你無法擁有書中知識所以佢好勁而你好廢。因為佢好勁你好廢所以你要向佢朝拜。

從圖書 corner 行出去是個露天空間,露天空間下面(當然)有大南瓜。另一邊可以眺望新宿區風景。

搭電梯落樓,電梯裡面有波點。去屙尿,廁所有波點。

木無表情地離去。早稻田大學周邊的街景很舒服。

發表意見