立場新聞 Stand News

其實係唔係真係咁多人歧視你呢?

2016/10/3 — 16:47

好多人都覺得澳洲或者其他英語系白人國家, 亞洲人好容易會被歧視, 會影響日常生活甚至工作機會, 事實係咪咁呢? 以下純粹分享下袋鼠先生喺澳洲遇過嘅事, 如有雷同, 你自己諗下。

日常生活:                                              

是咁的, 你走入一間舖頭, 好多時個店員會同你講句 “how are you doing?” 或者有咩幫到你之類的說話, 老實講, 由細到大, 係香港嘅舖頭, 聽到呢句說話係當聽唔到直行直過嘅, 其中係因為如果你俾任何反應 (即使係好客氣咁話 “唔駛喇唔該”), 個店員就會直接當你講yes定唔知係好好洽, 不停追住你唔放 (尤其係係街果的sales), 直到你決定對佢唔禮貌為止…點解要咁呢? 我好聲好氣同你講唔駛, 你聽下我講得唔得架唧?... 講返喺澳洲呢度呢, 其實你唔應佢係好無禮貌嘅, 你心情好可以應完佢又問返佢好唔好 (雖然佢應該每日都答4打次), 你唔想問返佢嘅, 都應該講句你好好, 多謝晒, 或者你無野要幫, 只係隨便睇睇。

廣告

咁你唔應佢, 人地梗係睥你啦。

行行下街:

廣告

如果你真係喺度街度行行下都有人睥你, 你同朕check下, 你會唔會係講野太大聲, 玩/講電話太大聲, 唔睇路亂咁撞, 或者你件衫有的唔應該出現嘅字, 其他本地人唔中意嘅行為, 或者你真係純粹外表太另類 (喂正常人見到都會望啦係咪)… 因為無事無幹, 其實真係好少會行行下街都睥你的。

見工:

咁嘅, 正常一般中至大嘅企業、大學, 其實係有好多非本地人嘅 (尤其IT部呀果的), 佢地係會請非本地人的, 只要你係有條件做果份工作, 基本溝通要無問題 (前線嘅職位溝通當然要再好少少), 同埋你要對本地常識同基本俗語有足夠認知;

袋鼠先生嘅英文都唔係正宗, 亦唔係100%地道, (留意我係要喺銀行日日對客嘅), 但最緊要係表達到你想講乜, 一般本地人係唔會 (公開咁) 笑你嘅口音的。

至於小型商戶, 就真係睇人啦, 我就真係遇過華人老闆話唔想我做sales因為我係亞洲人樣, 係呀, 佢真係咁樣直接、兜口兜面同我講…

喺公司:

好多職位都唔係一定要英文好叻先見到嘅, 你成功入左一間公司, 跟住點樣同的同事溝通, 先係真正嘅關鍵, 畢竟大家長大嘅環境唔同、睇嘅劇唔同、聽嘅音樂唔同、學校工作人生經歷唔同, 都未必真係會有好多野岩傾, 如果人地中意同自己人埋堆, 都好正常 (係, 當然暗示左袋鼠先生工作嘅地方都有呢的人啦), 咁其實唔岩傾, 又唔一定係歧視你嘅!

 

作者 facebook

發表意見