立場新聞 Stand News

北海道風雲

2016/12/28 — 19:24

【文:居日港人 Samantha Horie-Lam @ Samantha's Select】

我幾時都話,如果香港有大型天然災害(touch wood!),香港人死硬。唔係因災死亡,而係自己人踩人死!睇咗關於北海道暴雪機場癱瘓的新聞幾日,本來唔想評論,結果都係忍唔住要補充幾句。

就正如某博客所言,這種情況最怕困獸鬥。與其滯在新千歲機場「等死」,不如想辦法自救。例如:可考慮坐JR火車去函館(約3.5小時),乘新幹線返回東京(約四小時),再取道回港。如國內線有機飛函館,時間更短,但當然要確認函館機場交通及新幹線的運行情況。

廣告

關於廉航。廉航機票係平,如果沒有特別事情發生,無驚無險,的確很化算。但廉航之所以平,自有其原因。例如:座位窄,餐飲要付費,行李重量限制,停機費平所以要停遠啲或要接駁巴士...。最大問題係,航空公司的地勤及人手有限,一旦有突發事件,難以應付。

記得年前有亷航由香港飛成田,但因千葉方面天氣問題,改飛東京羽田著陸,待天氣好轉再飛成田。當時機上港人鼓躁,要求在羽田落機。這種想法看似很正路,畢竟大部份人目的地就是東京。但大家沒有想過,當年那家廉航就只有香港至成田線,在羽田機場並没有該公司的地勤人員以至ground logistics support。

廣告

航空公司本身亦沒有任何其他聯繫,(如國泰屬於one world可尋求JAL的支援,港龍是國泰子公司...)根本沒有預備在羽田升降上落乘客。結果嘈咗幾個鐘,驚動警察,航空公司尋求當地機場協助,特事特辦,讓乘客落機。不過,即使是與母公司有聯繫的廉航,如ANA與Vanilla Air, 據說都是各自為政,不能互換mileage, 有事亦不一定會第一時間出手相助,所以大家搭廉航真的要小心。

恕我直言,中國人真係東亞病夫囉(利申:我承認我都係)。日本人一年四季都飲凍水食凍嘢,咪又活到8、90歲或更長命,我哋就夏天都要飲暖水食熱飯,仲要食呢樣嗰樣調理身體。十幾年前已經聽過, 有香港乘客投訴, 日本機場派發的飯盒凍冰冰,沒有熱食blah blah blah...。喂、眾所X知,日本人好習慣食凍野(室溫),お弁当就一定係工場整定,再運去機場店舖售賣,係唔會有熱飯盒㗎!(我知,從前曾經有種內付暖包的便當,可把飯餸加熱,但效果不太理想,近年已經少見。)至於飯糰就一定係凍食。日本人於緊急或災害時都係食呢啲,從來冇人會投訴,秩序井然。只有在地震或災後義工會發起煮豚汁(とんじる)或味噌湯等熱湯,給在臨時避難所的災民。機場咁混亂就冇可能,大家應該理解。

又有人投訴BB冇奶粉。想請問:帶個B去咁嚴寒的北海道做乜?香港啲家長好有趣,平時當啲細路係金菠蘿,呢樣危險嗰樣唔玩得,打個乞嗤都驚到去醫院,但就帶幼兒長途跋涉去北海道賞雪。

首先,太年幼小孩根本唔適合搭飛機,先唔講小孩不受控制大吵大叫,機內空氣質素欠佳,氣壓大,即使成人也會感到唔舒服,何況是小孩(特別是未斷奶的幼兒)。遇到特殊情況,大人還能迅速行動,帶著小孩就寸步難移。做父母不能確保自己孩子安全,出咗事可以怨誰?

記得朋友夫妻婚前年年來日本旅行,但自孩子出生後,無論幾想去旅行都只好忍耐,待孩子行得走得才起行。我非常同意。

其實唔止北海道,日本各地冬季天氣嚴寒,一旦遇上風雪,地方機場封鎖,就會影響到其他機場。年前聖誕本來想從羽田出發經富山縣去金沢旅行,誰知日本海沿岸大雪,機場關閉。東京雖然冇雪,但羽田亦受影響,航班廷誤或取消。由於預計即使有機可飛,到達當地已是深夜,亦未知當地交通道路情況,例如香港人成日以為搭的士可解決問題,但大風雪的士也會停駛。等了兩個小時,我們決定取消行程,回家另找節目,過一個安全安心又no hassle的聖誕。

今次事件又令我想起年前倫敦希斯路機場大風雪,有港人終於回到香港,與家人在機場相擁痛哭,竟形容為「刧後重逢」!!

 

場邊故事Samantha's Select facebook

發表意見