立場新聞 Stand News

巴拿馬洩密後 直擊冰島示威現場

2016/4/6 — 10:38

【文:黃嘉祺;攝:黃嘉祺、Hlynur A. Vilmarsson】

純個人感受混亂整理一番。

在冰島第一次示威,是因為這單震驚全世界既巴拿馬文件。

廣告

出發的時候出現的車龍可以話係無見過咁長,話說冰島人煙稀薄。有時候可以係街上行半個鐘都無見到一個人。

廣告

一去到Parliemnt 啲人開始狂掟蛋、香蕉仲有冰島特產Skyr(Skyr是類似乳酪,但比乳酪「傑」一點),亦有人派香蕉。基本上可以話係任掟唔嬲,只係示威人數開始少的時候,見到一個警察沒收了一盒蛋,然後有個男人行埋去問:可唔可以要隻蛋?警察搖頭離開,完。場面都幾好笑。

(後來先知掟蕉原來係因為要嘲諷政府好似馬騮咁)

亦有好多人帶埋鼓同樂器,重點只在於製造聲音同埋為叫口號的人打節奏。

我企係Parliment最前一排,見到有個人係用槌仔敲打鐵閘。警察無扯旗仔,唯一見佢地郁係調更個陣。警察同示威人士既距離得大概5米,有鼓棍、掃把、剷、木條、廚具,總之十大武器基本上齊備,但係都係用黎製造嘈音又或者製作示威標語。然後亦有煙花係空中爆發。小朋友一家大細到齊。無人組織帶領叫口號,啲人都係我有我叫,你有你敲,但係感覺好一致。重點係唔會有「愛冰力」同「愛冰之聲」呢啲咁騎呢(唸唔到其他形容詞)既組織出現...

我都帶咗一個鼓去敲下,一面敲一面諗,如果同樣既情況係香港發生,第一排用槌仔個位應該已經食晒胡椒噴霧。然後已經有大量「不得超越警方防線」旗仔出現。然後第二日就會有報紙話啲人好暴力,呢場係冰島既示威應該係屬於暴動,因為有大量(真)攻擊性武器。

但係結果係無人受傷,首相落台。除咗羨慕,我都唔知可以講咩。

發表意見