立場新聞 Stand News

油價狂跌 地球好危險

2016/1/20 — 10:38

資料圖片

資料圖片

油價跌勢勁過祥指,不單止一直嘆慣的沙地阿拉伯叫苦,連地球都遭殃。

自伊朗解禁可出口石油,今年來已跌到一仆一碌的油價昨日再插水,曾跌穿每桶28美元。係,係講緊原油價,你的無鉛、白金無鉛抗跌力係好驚人的。

28美元一桶,每桶原油約159公升,即係每公升原油唔駛$1.4港元,平過一支無鉛水,連裝油個桶,都貴過油兩倍。

廣告

一直用石油收益資助國民福利的沙地阿拉伯,就話要抽緊褲頭帶,國民一直享用可能係全宇宙最平的汽油,最近全世界汽油降價,出產國沙地反而大幅加價。政府降低補貼,汽油價升六成,不過都還不夠每公升兩港元。嚴重財政赤字的政府更揚言要加電費加水費加消費稅等等。

油價低殘,其他國家的車主受惠,但苦了地球。車主毋須為慳油費搭公共交通工具,去年頭九個月美國私家車的行駛里程數創下歴史新高,去年九月份的汽油需求同樣創同月紀錄。

廣告

豐田汽車最近亦宣布減少混能車生產,原因是油價太低了。

近年各國致力發展的「乾淨能源」,同受油價低拖累。風能及太陽能的電價被便宜的石化燃料拖低,影響投資者意欲。

聯合國曾訂下目標,希望在2030年限制地球升溫攝氏兩度。美國銀行就曾估計,要達到這個目標,全球必須每年投放九千億美元發展乾淨能源,但在油價跌極都未見底下,地球很難不熱。

資料來源/圖:英國獨立報
英國衛報
英國泰晤士報

原刊於場邊故事

發表意見