立場新聞 Stand News

香港人移民德國,無咁容易嘅

2019/9/11 — 15:35

作者 Medium 圖片

作者 Medium 圖片

來生不做中國人?

文件其實已經交齊哂啦,但係 Einbürgerung(歸化)嘅負責人話,依家條龍越嚟越長,照咁計,要等足一年,先會處理到我嘅申請。

係,我已經決定,唔需要等來生,今生已經不做中國人。

廣告

就咁聽落去,攞另一本護照,好似好大件事咁,但係其實你諗下,香港啲高官有幾多人有外國護照?當然,佢地攞得嘅護照,都容許佢地有雙重國籍,或者放棄之後可以重新申請,著數盡攞,但又唔需要完全放棄香港護照同身份證。呢啲人攞外國護照要俾嘅代價,差不多等於零。

唔同人有唔同睇法啦,就算德國唔接受雙重國籍,而需要放棄香港護照再入籍,我自己覺得都無咩大不了。

廣告

衰啲講句,護照咪又係旅遊證件一張。我依家喺德國落地生根,有幾何返香港,仲要留超過三個月?咁我攞德國護照,其實真係正常不過。到我返到香港,等陣有人話我「首先係中國人」,你可以點?德國本護照都唔係重點,避免「被首先」先係最重要嘅一環,所以最緊要係快快手剪咗本香港本護照,之後你話攞咩護照,其實都無咩所謂。

何謂香港人?

資料圖片,來源:Florian Wehde @ Unsplash

資料圖片,來源:Florian Wehde @ Unsplash

好記得,反修例一開始嘅時候,《蘋果》有同我做訪問,講起呢個問題:放棄本特區護照,唔會覺得自己已經唔再係香港人?

咁其實香港人嘅定義,可以有好多種嘅。

手入面揸住嘅護照,當然係決定我國籍嘅文件,但係我生於香港,長於香港,由細到大,學嘅係廣東話,聽嘅係廣東歌,受嘅係香港嘅教育。人生頭二十年嘅歲月,都係喺香港渡過,難道我可以喺換本護照嘅一刻,就同人講我唔再係香港人?

講起離開香港呢個話題,由六月起,我依家收到好多香港人嘅 message,話想移民嚟德國。

資料圖片,來源:Daniel Schludi @ Unsplash

資料圖片,來源:Daniel Schludi @ Unsplash

德國從來都唔係移民國家,香港人最鍾意加拿大、澳洲、美國。移民嚟德國嘅香港人真係少之又少。大佬呀,你估德國入籍容易嘅咩,我以前都有講過德國申請入籍嘅條件,先唔好講咩其他嘅條件,淨係講話居住年期,正常都要八年(有可能可以變七年甚至五年,不過呢個係後話啦)。

你諗下,八年嘅光陰喎,人生有幾多個八年?

喺一個陌生嘅國度渡過八年,就算我保證你生活無風無浪都好,你有無咁嘅決心可以做到?更何況,離開自己嘅家鄉,去一個遙遠嘅國度,生活根本就無可能無風無浪。

「你可以為香港做啲咩?」

資料圖片,來源:Joseph Chan @ Unsplash

資料圖片,來源:Joseph Chan @ Unsplash

林鄭話撤回之後,我有講過,我自己好清楚香港嘅民主運動,唔會喺短時間內可以取得啲咩結果。我自己寫完出嚟之後,反而諗得多咗:如果呢一場自由之戰,係一場數以年計嘅抗爭,當下呢一刻,我呢個身處德國嘅香港人,應該做啲咩好?

我呢幾個禮拜不斷反復咁諗,喺我自己嗰腦入面投影一下,到底幾年之後,香港其實會變成點,然後一步一步咁回放返出嚟。

喺我悲觀嘅想像之中,我一個人嘅能力好有限,做唔到啲咩。我既唔係政治人物,亦唔係商業大亨,講話「可以為香港做啲咩」,呢條問題,我自問無咩資格答。其實我諗落,自己依家喺德國嘅生活,都叫做順順利利,可以有咁嘅條件,唔受限制咁表達自己嘅政見,自己覺得幫到咩就盡幫,唔需要日日擔驚受怕。我一個人能力有限啫,如果可以有多幾個「挾洋(德)自重」嘅「漢奸」可以一齊「反中亂港」,將「亡我之心不死」的角色,從美帝手上分一杯羹,都可算係一件美事。

咁其實客觀啲咁睇,我自己都係德文叫做比較好,可以同德國人溝通,幫香港人講解下大家嘅諗法,同埋喺度住咗幾年,對德國嘅生活同文化,比起香港人有多少少認識咁解。

有關德文嘅呢一部分,做緊啦:我已經整緊影片課程,所以我會繼續努力,希望可以盡快完成成個課程,最後再一次過推出。

有關德國生活嘅呢部分,我之前係完全無諗過可以認真咁做,每一次講啲德國資訊,都係風花雪月咁講。

好啦,咁你話嚟德國生活,認真咁講,點開始?

實在係想嚟德國?

資料圖片,來源:Ansgar Scheffold @ Unsplash

資料圖片,來源:Ansgar Scheffold @ Unsplash

第一步,我想知道,我篇文章接觸到嘅人,到底有幾多個,係真係好實在好實在咁計劃過嚟德國生活,甚至移民?

我講「實在」,有幾個條件:

一,確確實實學緊德文,無論學到咩程度都好。A1 學咗兩年都唔緊要,最緊要你真係有 keep 住讀。

二,你打算長時間,甚至永遠離開香港。當然,有人攞咗護照之後,覺得有選擇,可以再決定自己喺邊度生活,呢個無問題,但係八年呢一條線,你係肯定想跨過。

三,你自己有一個好清楚嘅想像,到底嚟到德國之後,到入籍嘅一刻,呢七八年,每一日嘅生活,你會點樣安排。當然,命運呢樣嘢,可以有好多意外,重點係你真係有一個合理計劃。呢度其實隱含咗一啲「次條件」,例如話嚟讀書就肯定要有一定學業水平同考試成績,嚟做嘢的話就一定要有專業技能,無大學學歷唔緊要,最緊要係有謀生技能。如果無呢啲前設,我唔清楚你點樣可以有一個合理計劃……

四,為咗實現呢個目標,你依家財政上已經有所準備。例如話儲緊錢,或者已經準備好喺關鍵時刻做出重大嘅資產轉移,例如話賣樓套現,然後喺德國置業。

五,你自問真係好了解德國嘅生活,知道德國有咩好有咩唔好之後,仍然覺得自己好想嚟。我以前有幾個學生,跟我學德文嘅時候,話想嚟德國,因為「好鍾意德國」,我問佢你鍾意德國啲咩?佢口啞啞……最後,呢啲學生德文都唔會學得好,因為佢學德文係基於「鍾意德國」,但佢「鍾意德國」又係基於對德國嘅片面認識或者係美好想像,當呢啲唔實在嘅想像消散嘅時候,學德文嘅動機都會灰飛煙滅。

六,你知道你要承受啲咩風險,亦都好清楚自己心理上承擔到呢一個改變一生嘅決定,知道自己有足夠嘅執行力,可以堅持到最後一日。

自問符合哂以上條件嘅,我誠邀你寫個 message 話俾我知(Facebook, WhatsApp, e-mail 點都好),鍾意的話,亦可以留言講下自己點睇呢幾個「前設」。我依家好想確實知道香港有幾多人想嚟德國生活,而你地又希望可以得到啲咩確切嘅幫助。

呢度可能都有好多人都已經定居德國,咁都歡迎你分享一下自己嘅經驗啦。

 

作者 Medium

發表意見