立場新聞 Stand News

Donald Trump 世界:When He Go Low, We Go High.

2016/11/10 — 11:22

The White House / flickr

The White House / flickr

相信有唔少人會覺得美國選舉相當荒謬,但美國人已經為他們國家抉擇——未來四年就看 Trump 可以怎樣 Make America Great Again (或者 Worse)。

美國選舉當日出現一個好有趣嘅情況:有部份香港人認為:「喂!美國大選做咩個個咁關心?釋法又唔見你咁關心。」首先,除非你唔係住係地球,否則美國大選冇可能同自己無關?美國唔係 Just Another Country,而係一個大國。全球局勢都可以俾佢地任何政策影響到,亦可以對香港造成衝擊。就當你沒有「炒股」、又對香港政治冷感、而且無視世界上出現嘅戰爭同恐怖主義也好,美國發生嘅事都會影響到你同我。單單係 Trump 對於氣候變化嘅取態已經可以玩死全人類。美國嘅政事同香港本地嘅政事一樣,唔可能唔理。當地唔少年輕選民就好清楚 Trump 可能會為當地帶來嘅危機,以選票表明立場。

另一個有趣嘅講法係香港評論員提出。佢地認為而家美國社評、當地政治人物或者香港人批評選民選擇,又或者針對某個年紀嘅選民批評係唔尊重民主精神。一開始聽落好似好有道理,但諗落我就真係唔明。評論、批評,甚至乎係恥笑點樣唔合乎民主精神?除非你話唔想 Trump 當選嘅人會好似 Donald Trump 支持者講:「輸左就反檯革命!」之餘,仲真係走去革命推翻選舉結果嘅,咁先可以算係違反民主精神啫。明明呢班人做足賽後分析,去研究民主黨競選衰咩、全球嘅思潮有咩改變、係咪有「世代/學歷之爭」都叫「輸打贏要」?我真係不明所以。

廣告

Trump 當選令人失望,但重點係我地點樣從呢個結局中企返起身。冇人會否認,而且之前已經好多人講過不論係 Trump 定 Clinton 當選都同以往一樣,係「食屎」同「食兩舊屎」嘅分別。未來點樣,無論係美國人自己定係我地都係無從得知。 Trump 當選印證另類右翼嘅冒起。另類右翼嘅崛起並唔只係美國所見嘅情況。香港亦見同樣現象:生活同政策唔改善,政府繼續當人民係死嘅話——未來一定會有更多種族歧視、個人自由被打擊,同反智思潮嘅情況出現。要抗衡呢種思潮,任何人最緊要係要自強,裝備好自己先有得再同呢班「另類右翼」係選壇或者日常生活上角力。

抗爭、辯論、溝通係必要手段,但千奇唔好浪費時間係呢種思潮中打口水戰或者泥漿摔角,到頭來得個吉。就如 Mark Twain 講:「Never argue with stupid people, they will drag you down to their level and then beat you with experience.」做好自己,世人總會搵到出路。對 Trump 或者右翼感到傷感、痛心,冇問題。痛完要記住美國第一夫人 Michelle 所講:「When they go low, we go high.」。對自己有要求,先可以推動到社會進步,先可以幫助對社會同政策失望嘅 Trump 支持者脫離昔日困境。

廣告

美國選舉議題多到令人抖唔到氣,或者以 Obama 較早前一句所講作結:

「While we’ve certainly seen some new things this time around, what isn’t new is that our democracy has always been rowdy and raucous. We’ve been through tough and divisive elections before and we’ve always come out stronger for it...No matter what happens, the sun will rise in the morning, and America will still be the greatest nation on Earth.」 

我地可以為香港,香港人所做嘅事仲有好多。香港人,共勉。

發表意見