立場新聞 Stand News

亞視 • 香港電視 • 香港政治

2015/4/3 — 17:44

【文:Joey】

讀區家麟先生說 ATV「最醜陋的死法」。亞視原本牌照到今年 11 月,續牌一年通知,照計去年尾早該死了,梁政府拖拉到今日,任由連連欠牌費欠薪零收視,害人害己死唔斷氣,不就是政府縱容?!王征指使自己台六點新聞頭條「宣布」賣盤予 HKTV,又唔使王維基回應就單方面老屈「焗買」,豈不如人大常委單方面 8.31 落閘、口口聲聲要香港人「含淚通過政改」一樣樣仆街?!

王維基先生曾形容亞視是「一間爛樓」:又係喎,銀主盤漏水就冧,死過人又一樓一釘契,唔買!寧願自己起過,耐何政府唔出牌,焗買 ATV 就更搵笨!

廣告

HKTV 的困境:唔買,冇牌。焗買,含淚「買住先」?爛貨又梗死!

香港政制一樣樣:1200 人選委會四大界別,立法會功能組別壟斷,香港人若是否決 831,就冇普選。焗你含淚「袋住先」,惡梗特權壟斷死得更慘!

廣告

2015年4月1日下午,行政會議3小時特別會議,最終一致決定不向亞洲電視續牌:不要頼死,拔喉吧。

愚人節呈獻,亞視死,香港電視娛樂上塲。梁政府一拖再拖,一錯再錯,發免費電視牌比個收費電視台。

This is NO synergy, STUPID! 好嘢呀喂~ HKTVE 免費開台,大家可以去 cut Now TV 了!

香港電視娛樂(HKTVE)早在 2013 年10 獲政府原則上同意發牌,一年半過去而全無動作,而今正式獲發12年免費電視牌照生效,HKTVE 曾承諾發牌後一年內開設一條綜合粵語頻道、兩年內開設英語頻道:拖得就拖,根本冇心做,同是年半前「得奬」的有線旗下奇妙電視更加冇咗影!有心的,冇牌做;有牌的,唔想做,天長地久有時盡,拖到觀眾都走光!

現在新一輩已再冇人「睇電視」。全部上網:看新聞,追劇,聽音樂乜乜乜。你若沒有好的內容獨家製作,空有一個牌照「大氣電波廣播」也是枉費。

一台獨大的傲慢,不思進取的後果,是 TVB 觀眾大量流失,黃金收視由卅幾點下跌至廿幾點,廣告收入下跌,所有大 show 冇人談論,近幾年「香港小姐」連名字都冇人提起。

TVB 母公司電視廣播(511)公佈業績,是自2010年以來最差收入,聲稱「由於承擔轉播世界盃的高昂成本」、加上收視續跌,盈利按年倒退近兩成至14.1億元。而TVB更首次未有披露翡翠台的平均收視,只形容「翡翠台繼續領導電視界,成為香港最多人收看的電視台」云云。

2013 年 TVB 已坦白承認「無綫電視翡翠台在平日黃金時段錄得平均23收視點」,創四年新低,按年流失約 12.5 萬名觀眾。今年收視繼續下跌,2014 年收視最高的劇集《使徒行者》平均收視點也僅得 27.6,首次跌穿30點收視大關,明顯遠較 2013 年收視第一位、平均電視收視31點的《衝上雲霄II》失色:冇收視就冇廣告,「大台」風光不再。

以前,只有一個「大眾」,訊息單一。現在是「分眾」各有所愛,資訊多元。

你以為「規管」,點知,愈管愈死,愈叫愈走:一如中国一党專政下 CCTV。

天蠶會變?

「獨自在山坡 高處未處高,命運在冷笑 暗示前無路」

如果,大家記得,六七年香港社會動亂之後,港英政府如何推出「新潮舞會」,七彩電視啟播晚晚「歡樂今宵」,你就明白:娛樂之於社會,是如何重要。

「咁無電視睇點算呀?世界末日啦!慘無人道呀!」

電視冇得你揀,特首選舉又冇得你揀,香港人,真真慘!

 

作者簡介:作為一個香港人,時刻發揮厚多士精神,生活上眼見怪事、錯事、愈來愈過份,一於插到佢暈!Never be afraid to say what you feel - You can only die once.

發表意見