立場新聞 Stand News

幾多歲嘅人會讚好100毛?我用數據答你(好似係)

2016/2/5 — 18:55

作者製圖

作者製圖

【文:Patrick Yip】

#多謝Shell

自從一月十一日毛記電視第一屆十大勁曲金曲分獎典禮之後,相信依個hashtag,以及活動製作單位100毛已經係無人不知曉。

廣告

好似係。

我有教書朋友,興致勃勃咁同啲學生分享自己當晚有幾感動,卻駭然發然原來唔少中學生,根本唔知發生咩事。由此喺臉書上面引發咗一個有關世代、代溝,甚至到香港未來悲觀與否諸如此類嘅討論。

廣告

可能你對嗰啲問題更有興趣,但對我嚟講,我哋首先需要解決嘅係基本事實問題:

幾多歲嘅人會睇100毛?
中學生睇唔睇100毛?

當然,如果你係贊助成100萬嘅Shell,或者比100毛兜售過嘅潛在贊助商,絕有可能得悉佢嘅reader demographics。根據信報嘅資料,「毛記電視」網站約75%訪客係34歲或以下,但始終未夠仔細。

如果你係一個單純好奇心重嘅online marketer,或者廣大市民,點先可以知道依啲數據呢?

唔使用Hack嘅,用Facebook就得啦。

用FACEBOOK ADVERTS MANAGER 估算

其實只要你係Facebook 用家,而且係一個專頁管理員,你就可以利用佢嘅Adverts Manager去估算佢嘅閱讀年齡層*(記得留意註)。

Facebook Adverts Manager 介面

Facebook Adverts Manager係臉書賣廣告嘅控制台。當你準備落一個廣告嘅時候,你可以定義個廣告嘅接收範圍,而臉書會俾返個範圍估算(potential reach)你知。

有趣嘅地方,就係個選擇範圍入面,係包括廣告受眾嘅興趣,而100毛正正係列入為一種「額外興趣」(課外活動咁解?)。

只要我哋揀定有興趣100most 嘅觀眾,再將年齡範圍按年收窄,我哋就可以得出讚好100毛嘅年齡分佈。而再比較Facebook使用者嘅年齡分佈(用返同一個方法),我哋就可以得出100毛喺不同年齡層嘅受歡迎程度。

數據分析

小弟將Facebook提供嘅數據,整咗個圖表:

 

從比例上睇,100毛最受歡迎嘅年齡係大專生年齡層,十八廿二,有成18%。
中學生(13-17歲)嘅受歡迎程度(13.31%),就略低於職場新鮮人(15.12%)。而隨住年齡增長,會like 100毛嘅比例就急劇下降。
但若果從人口數目去睇,我哋會發現,其實職場新鮮人先係最大班嘅100毛擁躉,有成12萬幾,遙遙拋離得3萬唔夠嘅中學生組別。

由以上數據我哋可以解釋到,點解我嘅中學教師朋友,會覺得100毛現象係咁犀利,但係問返班中學生就完全唔覺。而且,我哋亦都可以從此年齡組別,略略估計到100毛嘅讀者嘅消費力,肯肯定係好過讀緊書嘅大學生(雖然可能都係廢青)。

分析完數據,完未?未完……

等我戴返個頭盔先

其實以上嘅數據嘅品質頗為粗梳,有唔少前設同埋已知嘅問題:

數據寫明唔係確實like 100毛嘅數目,而係like 100毛同相關嘅專頁嘅人士。而且,Facebook提供嘅只係個約數。
再退後一步,心水清嘅人就會發現如果比較返香港人口普查嘅話,會發現個香港Fb用戶個數目係通漲咗好多。咁係因為一來Facebook的確有唔少假account,而Facebook Ad Manager只係提供「在地」嘅香港用戶,而唔係「真。香港人」(不過其實點先叫真,我到而家都望唔透)。
再退退後一步,依個數據只係講緊Facebook嘅用戶,並無講到其他平台嘅用戶,包括:紙張雜誌、Instagram、網站同毛記電視嘅native app,所以一定有所偏差。我哋起碼要了解,Fb已經係中佬如我嘅玩意,而家啲後生都係玩IG同Snapchat㗎喇。

所以,依個數據充其量只係一個參考,未可作準。

總結

其實講一大論嘢,都係拋磚引玉,希望刺激下討論啫。

好多時我哋討論一個問題嘅時候,往往從意識形態、大道理層面去傾,但係好少去真係落手落腳去搵啲證據比較下。而證據嘅嘢,有時遠在天邊,近在眼前。做人,都係empirical好啲。

至於作為行銷人(marketer),好容易沉醉於諗食字諗爆諗viral嘅「質性」層面嘅嘢,但相對少一種對數據警惕甚至沉溺(obsessed)嘅態度(係,係食咗字)。由其喺講求大數據嘅今日,就算你嘅角色唔係technical或者analytical,都應該培養多啲依兩種能力。Adobe Marketing Cloud最近嘅廣告就講得啱:

Without data, marketing is just a gamble.

以上。

歡迎留言講兩句。

 

作者簡介:OneSky 內容及集客營銷主管 ,一間雲端翻譯的初創科技公司。 2015年,他創立這個網誌 ,分享自己的工作經驗和學習,是為成長筆記。 Patrick Yip heads content at OneSky, a tech startup built to make localization easy. On this blog, he writes his startup life in Traditional Chinese (Hong Kong), his native language. Find his English writings on OneSky business blog and Medium.

作者博客

發表意見