立場新聞 Stand News

抽水?港台你會後悔囉!

2015/1/14 — 14:32

(圖:YouTube 截圖)

(圖:YouTube 截圖)

有位就上,見位即入,好好把握機會,向來都係香港人嘅核心價值。 就好似水都係一樣,有得抽唔係唔抽呀?今次想講嘅係,上星期五喺亞視度播嘅十大中文金曲頒獎禮。平日啲頒獎嘉賓借時事抽吓水係好正常,但其實佢哋又有冇諗過你做緊個咩台?

主持《瘋show快活人》嘅曾志豪、貴花田同梁榮忠,有份頒金曲獎。佢哋不嬲串串貢諷刺時弊就係人都知,頒獎禮搵得佢哋泥,都預咗佢哋玩㗎啦。又咁啱,係亞視風頭火勢嘅時候,係度做節目。有水,唔係唔抽呀?

梁榮忠:免費電視香港講泥講去都係一間,知唔知咩係免費電視呀?即係唔止睇嗰班,連做果嗰班都要免費,先算係免費電視。

曾志豪:哎也,你知唔知道,亞視帶咗好多重要資產俾我哋㗎?咁多位歌手,你哋係樂壇一定要有亞視精神。亞視精神,默默耕耘,未必有回報。

貴花田:唉,講咁耐,咪講曬啲時間啦。啲歌手要講得獎感受咖嘛!一陣講講吓,呀埋啲廣告時間,咁就唔好啦,你知亞視好難得有廣告咖嘛!

廣告

見底喇見底喇!笑到 gap gap 聲。呢段簡直係全晚嘅重點,拳拳到肉,句句啜核。啲 DJ 出名係牙尖嘴利係人都知,但佢哋似乎唔記得咗,貴台之前同無線嗌交,又係邊個收留佢哋個頒獎禮?

講返轉頭成三四年前,當時無線同啲唱片公司有版稅問題未解決,旗下藝人歌手又話要杯葛港台個頒獎禮。嗌嗌吓交,最終港台一怒之下將個播放權俾咗亞視,簡直係開創電視史上先河。一直到今年,亞視依然都仲有得播(如果亞視今次大難不死,下年或者都仲有得做掛?)

廣告

笑係笑得好開心,但諗深一層,其實係笑中有淚㗎喎。當日港台俾大婆台杯,亞視雖然係雞,但佢都叫仲有得揀。如果(我係話如果啦)亞視今次真係收咗皮,咁之後一台獨大就更加可以為所欲為喇。你睇無線撈過界,藝人拍劇拍戲都不特止,仲有唱片公司,成個娛樂圈佢玩曬。到時無線再一獲翹起你,港台咁又點呀?靠個視點 31 入到幾多屋?

抽水抽得咁開心,但又唔諗吓之前之後,純粹為咗搞笑,香港人可以去到自甘涼薄咁盡,除咗佩服都唔知講咩好。亞視係爛爛哋,但總算叫做有個選擇。他朝亞視執咗,今日笑得咁大聲嗰啲,到時唔好後悔呀!

發表意見