立場新聞 Stand News

當 TVB 體育新聞播印度足球

2016/11/11 — 13:21

(圖:TVB 新聞截圖)

(圖:TVB 新聞截圖)

睇 TVB 新聞,有時真是好刺激。放心,咩新聞審查,自我閹割,是是旦旦,近幾年大家講過太多次,事例無數,我不打算再重複。今次我想講的,是體育新聞。

早幾個星期,有次一不小心開咗電視,睇到 TVB 新聞,當時準備播體育新聞 — 我心諗,無事啦,照睇啦。體育新聞啫。

我自小喜歡體育,童年時代每逢六點五十分,都會乖乖地留守電視旁邊,為的就是睇體育新聞。那個年代,上網未發達,無得 facebook live 睇英超,睇月巴精華片好難。作為一個無錢裝有線的細路,我除咗狂揭報紙體育版,就只能夠靠無綫體育新聞,聽伍晃榮報道最新足球消息。

廣告

說遠了。前幾個星期嗰次,一睇無綫新聞,去到體育環節,嘩,我當堂嚇一跳,然後得啖笑。原來依家無綫體育部的視野,已經去到印度。主播正戰戰兢兢咁報道緊一場「東北聯主場擊敗果阿」的印度超級足球聯賽。

東北聯?果阿?我以為自己聽錯。但原來我哋的體育新聞已經淪落到報道印度聯賽的消息。

廣告

你可能會話,喂,唔好歧視印度喎。OK,我即刻去 check 下印度超級足球聯賽的資料。印超聯於 2013 年成立,的確並唔係一個普通的地區聯賽。呢個土豪聯賽規定,參加的八隊波,一定要由外籍教練執教,而且必須有世界級球星在陣。頭先提過的果阿,就有前巴西隊長盧斯奧壓陣;孟買城有科蘭……確實是星光熠熠。

但等一等,今年係 2016 年。呢班仲係咪「世界級球星」?更何況,就算每隊波有一兩個世界級球星,係咪代表佢水平高,高到遠在香港的我們要從新聞報道中欣賞?

你唔好理。總之 TVB 就係播畀你睇。而且唔單止播印度超級聯賽,TVB 體育新聞而家經常播的足球,還包括澳洲聯賽、美職聯。係,仲有意甲。

(圖片來源:TVB 新聞截圖)

(圖片來源:TVB 新聞截圖)

11 月 6 日,澳洲職業足球聯賽,珀斯光輝主場與西悉尼流浪者打成平手。FC悉尼主場反勝墨爾本勝利。

你有無興趣?我無。但 TVB 照用佢寶貴的 airtime,報道畀你聽。

你可能又會話,喂,多啲國際視野,唔好咩?

傻的嗎?新聞的功能就係有人幫你整理、消化、揀選有用的資訊。香港人有無需要知道印度聯賽的戰況?你話呢。

更何況,airtime 有限。你播得呢樣,其實就報唔到第二樣嘢。就在 TVB 報緊印度、澳洲、美國的足球消息的同時,香港足球代表隊近日好努力咁在東亞足球錦標賽爭緊出線。港隊已經打咗兩場,首場險勝關島 3:2,第二場贏台灣 4:2,最後一場對北韓,要贏先可以出線。

TVB 有無報道?有呀!不過係咁樣報囉:

(圖:TVB 新聞截圖)

(圖:TVB 新聞截圖)

片都無得你睇呀。

呢邊狂播印度超級足球聯賽,另一邊就冷對香港足球,你話黐唔黐線?定別有用心?我真係唔知。

我只記得今年中老牌足球評述員何鑑光曾經在《立場》專訪咁樣批評:

「你有時間有人,做咩唔去做對香港體育有益嘅嘢呢?你去搞些對外國體育有益既嘢?你搞好英超,對咩有益呀?唔係話唔搞,但有先後嘛!點解你咁著重人哋嘅足球呀?」

可能又有人會話,假如香港運動員有好成績,你估傳媒會唔報道咩?去年港足的好表現,咪就係咁囉。

Sorry,港足隊長葉鴻輝不同意。他曾經喺港台節目《視點 31》奉勸傳媒,不要因為香港運動員有好成績,才作詳細報道。「始終運動員比賽時間可能不太長,但在場下他們付出了很多。這是需要得到廣大市民的肯定。」換句話說,傳媒唔單止應該報道多啲港隊消息,其實仲可以報道佢地備戰的情況。

睇到呢度,我肯定有啲人又想講:放棄 CCTVB 啦!今時今日仲睇 TVB 新聞,有無病呀你?

有病嘅係佢哋,唔係我。不容否認,就算 TVB 幾衰,佢的新聞每日接觸到過百萬人,佢的新聞的取材、角度,視野,永遠可以塑造到好大班香港人的觀點、取向,以及口味。

唔單止港聞,連體育都係咁。所以我哋要繼續聲討 TVB 新聞。

最後一句畀 TVB 體育部 — 播埋啲咁嘅嘢畀香港觀眾,你們個良心係咪比花哥食咗???!

發表意見