立場新聞 Stand News

借頭借路

2015/11/16 — 17:40

資料圖片:飛鵝山遠眺安達臣道一帶

資料圖片:飛鵝山遠眺安達臣道一帶

秋高登山本是賞心樂事,更何況有山友共行,雖然其中可沒一位家住170呎癲價樓的女士,惟閒話亦不免扯上那幫密謀打郊野公園主意之徒,眾皆義憤填膺,罵聲幾乎響遍山野。

「郊野公園啲地位處偏遠,我哋頭先都行咗成兩個幾鐘至到呢度,點起樓呀?就算起,又要移山鏟林,又要平整土地,又要基建配合,都仲未計之後一大筆管理成本。譬如話:定期斜坡維修。地價成本咁高,莫講話將來用嚟建公屋,連一般賺少啲嘅私樓都唔會起,最後咪又淪為低密度超豪宅。試問呢啲寥寥可數嘅單位又點樣可解決當前房屋問題呀?」山友甲首先發難。

「最緊要係借路啫。啲人成日以為郊野公園內有好多平地,其實大部份都係屬於綠化地帶同鄉村用地,根本不屬公園範圍。只待政府牽頭,亦即借埋個頭開發,鋪橋搭路,坐擁周邊大片土地,囤積居奇嘅土豪簡直求之不得,又怎不推波助瀾。又正如林超英所講,無非以此挾逼政府『拆牆鬆綁,加快審批』,同享便車之利。」山友乙忙作補充。

廣告

山友丙亦按捺不住「政府成日話寸土必爭,對山野之地虎視眈眈,但又幾曾敢向新界丁地動分毫?實情係丁地佔政府既有土地資源幾近七成,若盡其用建屋,可容納的住戶數以十萬計,足以應付未來廿年人口增長帶動的住屋需求,且亦能滿足真『丁屋』所需,並打擊單借『套丁』炒賣獲利的行為。

可惜,連當日好(似)打得嗰位,對新界僭建問題尚且棄甲,更何況如今面對所涉利益更大的丁權?惟『不能碰的』始終係利益集團,『可以商討』嘅就枉稱新界霸權喇。」

廣告

難得我不插科,自要插一輪嘴「根本就係轉移視綫,兼博大霧。丁地以外,仲有規模堪與東北發展看齊嘅高爾夫球場;同埋我屋企附近嗰個,位處貴重地段卻人迹罕至嘅軍營;另外新界大把滿目瘡痍嘅廢車場、貨櫃車場和荒棄農地……無地定無心,你話呢?再者,若真係有心要解決住屋問題,我其實並不反對政府多建公屋,而唔係賣地為庫房進益,畢竟呢個政府為富只會更加不仁。

至於嗰個市建局,亦大可將回收嘅土地齊建公屋,而非打造同區飆升樓價指標的豪宅,我想其時有位良心總監自會樂意回巢……(下刪多字)」

各人一番搶白後,其實深明,就算我們餘音續在山中縈繞,惟亦不會傳到權貴耳中;就算聽到,充耳仍未聞,怕連一句「心悒」也免。

說到底,「土地問題」從來就是「政治問題」,為政者千方百計,甚至不惜撕破臉皮也要膜拜霸權,並仰地主鼻息而活,任其巧取豪奪,且還傾斜輸送,皆因主不由民,試問政怎及眾。而黎民在當權眼中直如郊野草芥,欲割後快。

原刊蘋果日報

發表意見