立場新聞 Stand News

垃圾徵費殺到黎!想扔少啲垃圾,有咩實際方法?

2017/3/22 — 14:21

資料圖片:垃圾袋

資料圖片:垃圾袋

垃圾徵費方案於日前出爐,並預計於兩年後全面落實。政府在推行整個環保政策的失效自不多說,一方面又不做好教育(有關「污者自付」或者「源頭減廢」等概念對一般市民而言仍是十分陌生)、一方面長期「頭痛醫頭、腳痛醫腳」,例如想條街少D垃圾就令劉江華個口細D咁,又或者長期週街放勁多垃圾桶以為方便市民、點知只是助長更多垃圾的產生等等。雖然「垃圾徵費」的確以收費方式變相令大家逼住少D垃圾,但實情是、「罰」唔「罰」、收唔收你錢都好,環境由頭到尾都要由大家一同保護既(只是政府淨是要求收錢唔做好教育,大家自然反感...!)。姑勿論如何,垃圾徵費點都係會殺到埋身,咁有咩方法可以減少D垃圾呢?

其實,都只是得一個,就是「源頭減廢」。即是點?

在日常生活中,我地除左做Recycle之外,其實更重要是Reduce「源頭減廢」,即是你少用D、自然少垃圾D啦。以下由淺入深地,講下九種不同的「源頭減廢」方法:

廣告

第一:檢查自己房間的垃圾桶,裡面有咩垃圾;盡量減少該類型的垃圾/進行分類。

呢個方法是「源頭減廢」的第一步。在我而言,以前我的垃圾桶裝得最多的,一定是Sun完鼻涕的紙巾同埋零食包裝袋。這一年下來我改用了手巾仔,故此垃圾桶少了大量紙巾,已經節省了不少空位,扔垃圾的次數減至接近半個月才清一次。至於零食嘛,好吧我還未戒得掉...唯有繼續努力!

廣告

難度:✦

 

第二:諗清楚用單面紙定廢紙/拒收所有乜乜乜單張/轉哂所有單據做電子版

平時用紙時,不妨停一停諗一諗可否用單面紙。真係要出街俾人睇的先用白紙。題外話是,我習慣食飯「走紙餐墊」,但如果走唔到(例如大x活快餐店果D好難走),只好摺起拿回家用作單面紙了,總比用來墊食飯好吧。

難度:✦

其實有好多信件同宣傳單張都係無用的,佢放起你個信箱度你都覺Annoying啦,咁不如索性去郵局網站,申請個「不收取通函」的貼紙(郵局Link ),從此同麻煩既宣傳單張講拜拜~

難度:✦

另外,你是有權拒絕所有的宣傳單張,包括成日寄俾你的銀行信用卡乜乜推廣。只要直接打去SMS中顯示的電話,用溫文的語氣(信我,唔使鬧人)講「我不想再收到你們的信件同推廣」,幫你核對好資料後,你就再同信用卡乜乜推廣講拜拜~

難度:✦

然後,將所有單據轉做電子版,個個月一封封的厚信,都可以轉做電子。不過,呢個步驟就要你登入該電子銀行再搞,本人所光顧的某保險公司更是我整左幾年都未整到...所以,在這個過程中就睇你有幾多恆心同耐性...
難度:✦✦✦✦✦✦✦✦✦

 

第三:帶自己的杯出街,減少買樽裝飲品

試想想你一日出街,如果出整日而無帶水樽,無可避免就係買野飲。當然,喜歡飲水者可以去不少免費的地方裝水飲,請唔好再買樽裝水啦(可參考撲水app)。而如果你唔鐘意飲水鐘意飲飲品(如我),用膠就用得更多。日積月累之下,我以前屋企的膠樽幾乎是一日一至三個。

但是如果自攜杯呢?有別於一般的水樽,我建議認認真真買個會長期用的令D的杯,自己真係會用之餘生活都開心D。出街如果想飲野,可以幫襯飲品店然後裝入自己的杯中,咁就可以節省好多隻膠杯呀(題外話是,如果去StarXucks買野飲自攜杯可以減4蚊架,都唔算少!)。而家家中的膠樽真係大幅減少八成呀 。

難度:✦

 

第四:自攜餐具同食物保鮮袋

出街食野,又係無可避免會用到即棄餐具。要自攜餐具其實又係咪想像中咁難呢?我又覺得ok,其實用完即時洗就可以了,算不上什麼吧?所以現在袋中都一直袋住一套餐具。至於之前都Hit過一輪的食物保鮮袋,我都買左個,買面包時用,都幫我節省左N個膠袋呢。其實食物保鮮袋仲可以自己整添。

難度:✦✦✦

 

第五:食飯前請計劃好自己食幾多,要唔要少飯少送

不少女仔好似我咁唔係扮野但真係食好少,時不時都會食剩半碟飯,食唔哂要倒真係好鬼折墮...所以我一個人食就習慣叫少飯少食送。不過試過有一次去大x樂,一早起收銀處叫少飯,去到取餐處呀姐姐忘記左少飯啦。我話「唔該我想少飯既」,之後佢居然成碟飯倒左!然後裝過個少飯!我即刻心裡「x 你無野呀!」,從此以後再無幫襯過該大x樂...

難度:✦定✦✦✦✦✦✦✦✦?我都唔知...

 

第六:減少幫襯狂用即棄餐具的商店

有部分商店如M記或者摩C漢堡等,要求對方用自攜的餐具去裝食物幾近是天荒夜譚。所以只是能夠少去一點(但個人其實覺得好好食...)。有時如果真係好想食又想拿走,我仍然會叫堂食,用自己帶的袋去裝走食物,叫做節省得一個得一個吧。

難度:✦✦✦✦✦✦

 

第六:用手巾仔

呢樣野其實真係唔容易,但是就好似我第一點所講,我Dum最多落垃圾桶的一定係紙巾。我個人已轉用手巾仔超過一年,有大約10條做日常替換,約 5 日儲起一次過洗,每次洗的時間都係15分鐘內完成,其實唔算太麻煩。現在垃圾桶剩最多的就係零食袋(哭...)。

用手巾仔仲有一個好處,就係成為去旅行會採購的紀念品之一,例如日本其實手巾仔是常用品,很多都很可愛,仲會有該地點的特色呢!不過,我知道對很多人而言手巾簡直係古代產物,總之,量力而為的改變就好啦。

難度:✦✦✦✦✦✦

 

第七:家中放廚餘桶,自製堆肥

雖然好似好誇咁,但實際做又唔真係好難。呢個係我今年試行既新玩意,因為我發覺家中最難搞的垃圾之一就係廚餘,你又無得唔整出黎、又一定要扔掉(這裡指的廚餘不是指食剩的食物,而是指切菜剩的部分/茶渣/蛋殼等;至於野食嘛,請盡量都要食完)。於是我淘左個家居廚餘桶,桶的大細大約同家用垃圾桶差不多,可以將廚餘同相關的酵素放入去,三幾個月後會變成堆肥,到時可以灑在植物度(或者你鐘意就拎出去灑在公園~),總之就唔使扔落垃圾桶。雖然未知成效,不過都叫做試下呀,唔試過又點知得唔得呢(我知道一定有人覺得「車你淘寶咪一樣製造膠同垃圾」!我的取態是,如果買左果樣野你會用到廿年百載,是值得的、有永續能力的、亦不妨買呀)。

難度:✦✦

 

第八:計劃性消費及幫襯小店

咩意思?即係出街之前,請你諗定今日會買D咩,例如菜/水果/肉份量,帶好盒子同袋再出去買。而買既地方方面,由於超市一定包好哂,可轉為幫襯小店,只有小店/街市先可以用自己的盒子嘛。不過,以現代人的生活習慣,真的有難度,唯有帶定幾個用過的膠袋隨時放在手提包裡啦。

難度:✦✦✦✦✦✦

 

最後:改變自己的消費模式-買=開心?

當你以為買到好多潮流野、好多衫就等於開心,咩大減價執到平貨(點知最後得個擺字),其實就已經中哂商人既計謀。越買越多、越無位放、又想要新野,根本就係人心不足蛇吞象。有時用買野黎讓自己開心一陣,ok的,但是唔好當係真理又或者過度。充實下自己心靈好過啦。不過,呢樣野就好靠自己肯唔肯改變啦。

難度:✦✦✦✦✦✦✦✦✦✦✦✦

 

環保的確唔講得上有多便利,要常常沖洗重用亦是事實,但為左地球同下一代,麻煩少少有乜所謂?睇到呢度,可能你覺得我係環保「能」,但其實我從來唔會要求人地做到同我一樣。只是,事實是環保是要大家一齊做先有更大成效。當政府在推行環保政策係咁失敗的時候,我地就係咪有哂藉口繼續日日製造更多不必要的垃圾呢?試想想第時Dum垃圾要收錢,你都唔想無啦啦俾錢呢個無能政府架,俾少D D都開心啦。如果真係想由自己做起,唔好等啦,由聽日開始,試下啦!

發表意見