立場新聞 Stand News

中坑們,唔好再逼自己同後生仔鬥跑一百米

2017/6/9 — 12:16

資料圖片 Matt-Richards @ flickr(CC BY-NC-ND 2.0)

資料圖片 Matt-Richards @ flickr(CC BY-NC-ND 2.0)

人到中年,其中一個感悟係,你已經好清楚自己有幾多料。手上嘅事業,又或者所謂嘅成就,有幾多係靠真材實料得返嚟,又有幾多係純粹因為好運,一個像我這種年紀嘅中坑,其實理應心知肚明。

但心知肚明還心知肚明,願唔願意去承認,又係另一回事。

我同年輕嘅同事相處時,其實好感受到,喺轉數、市場觸覺、創意以至魄力,其實都輸俾佢地好多。呢個係必須承認嘅事實,人係敵唔過歲月,我亦唔覺得有咩唔妥。然而我眼見,好多中佬嘅朋友,並唔接受,自己喺能力上係會給呢啲後生仔比下去,於是佢地選擇反抗,選擇拒絕承認,對於後生一輩嘅總是諸多挑剔,最後演變成無止境嘅世代之爭。

廣告

然而咩年紀嘅人都係一樣,需要感受到自己嘅價值,先至會覺得開心的。有啲能力會隨著年齡而衰退,這是大自然的定律。一個五十歲嘅人,即使曾經體能幾勁都好,跑一百都好難跑得快過二十歲嗰個。一個中年人,硬係不自覺要用自己當打嘅時候嘅標準,去同後生仔去鬥,結果會點?正面交鋒鬥唔過,但仍然要贏嘅話,唯有運用權力和地位去打壓。

問題係,係咪真係要鬥贏?又或者,去堅持自己,能力比班後生嘅強,咁先有價值?都幾十年啦,係咪仲要用同一標準去衡量自己嘅能力同價值?中年危機,有幾大部份係因為咁?

廣告

中年,能力衰退之餘,其實能力亦會轉移。包容嘅能耐係其中一項我認為「應該」比後生仔來得強嘅能力。感染別人、推動別人做事嘅能力係另一項。還有,將知識和經驗承傳嘅能力,即使自己「係咁多料」啦,但仍可讓別人變得更強嘅能力,應該係中坑相對嘅強項…其實仲有好多的。

其實只要中坑們,睇開些少,唔再逼自己同後生仔鬥跑一百米,世界應該會和平好多的。

又,都跑咗幾十年啦,唔悶咩?

(標題為編輯所擬)

作者facebook專頁

發表意見