立場新聞 Stand News

乳癌四期治療攻略 — 末期仲有冇得醫?

2015/12/9 — 14:45

圖片來源:Maurer Foundation

圖片來源:Maurer Foundation

【文: Breast Cancer HK 】

當醫生同我講我已經係乳癌四期/末期,我D眼淚已經再忍唔住,一諗到生命正在倒數,我條路已經唔知點走落去,究竟乳癌末期仲有冇得醫?如果冇得醫,乳癌四期存活率又係點?今次「乳癌四期治療攻略」陪你行呢段難行嘅路⋯⋯

警告
本篇內容涉及一些極度敏感的話題,可能令人不安/產生不可估計的負面情緒。如閣下不欲看有關乳癌四期的資料,或心理狀況未準備就緒,請立即離開。

廣告

停一停,諗一諗,問吓自己準備好未?

歡迎你勇敢地返黎,我地一齊睇吓呢段路應該點樣行落去⋯⋯

廣告

乳癌四期治療目標

「乳癌末期仲有冇得醫?」

呢個係一條非常非常非常之難答嘅問題。

佢亦都係好多病友/家人得知乳癌四期之後嘅第一個問題。

老實講,我實在冇一個啱聽嘅答案。

「乳癌末期有得醫!」,呢個係寶藥黨/祈福黨,利用癌症病人嘅痛苦、無奈同埋絕望,去呃人嘅手法。

「乳癌末期冇得醫~」,呢個係罔顧病人/家屬感受,殘忍地摧毀他們希望嘅答法。

我只可以答:「當我地改變唔到客觀環境,就只可以改變自己心境。」

當我地嘗試將要求降低(唔再強行追求根治個病),而係將目標擺喺控制/管理個病(延長壽命)、舒緩不適、同埋撫平內心不安方面,我地仲係做得到嘅。

控制乳癌轉移

「咩叫控制乳癌轉移?」

即係喺保持生活質素嘅大前提底下,用盡所有嘅方法去殺死身體嘅乳癌細胞,希望佢唔會作惡,同佢共存。情況有如寄生蟲,明知清唔到,只希望佢生生性性,唔好吸太多營養,同佢共存,一齊生活幾耐得幾耐,就好似將活火山變成睡火山咁,希望佢盡量沉睡唔好爆。

或者你可以將佢睇成長期病患,例如糖尿病/高血壓/高血脂咁,要長期作戰咁好好管理佢。

「咁我地有咩方法可以控制/管理佢?」

除咗乳癌5寶(化療、標靶治療、抗荷爾蒙治療、電療、手術)之外,仲有樣野叫骨針。

第一至三期唔同,乳癌四期以上每一環節都要作出微調:

1)化療:治療嘅主力(今次唔再係手術,因為已經唔係一D局部治療可以控制嘅野),都係用返第一線A針T針為主。不過如果第一線化療冇效,我地就要用第二第三第N線化療,直到醫生覺得再打落去係壞處多過好處/你唔想再打為止。你將會見到一大堆化療藥名[Gemcitabine/Carboplatin/Capecitabine(Xeloda)/Vinorelbine/Navelbine/Eribulin(Halaven)/Cyclophosphamide],詳情唔洗理,因為太深喇,寫D名比你睇係想話比你聽,A針T針之外,原來你仲有好多化療選擇可以用黎打乳癌。

2)標靶治療:雖然我以前只係成日講Herceptin一隻標靶藥,但原來同化療一樣,仲有好多新希望[Pertuzumab/T-DM1/Lapatinib(Tykerb)/Everolimus(Afinitor)/Palbociclib]可以幫幫手。

3)抗荷爾蒙治療:除咗舊藥(Tamoxifen)同新藥(AI)之外,仲有第四代抗荷爾蒙針[Fulvestrant(Faslodex)]。另外如果後生未收經,仲可以用唔同方法去抑制卵巢(Ovarian suppression)添,例如做手術切咗卵巢去(oophorectomy)/每月打停經針[goserelin(Zoladex)]/電死卵巢(radiotherapy)。原來ER+乳癌治療有妙法(成個IKEA廣告”XXXX有妙法”咁添),唔差在唱埋佢支主題曲喇:得㗎得㗎得㗎得。

4)電療:只要之前未電過相同部位,就可以有咩電咩,遇神殺神、遇佛殺佛。可以電胸口、又可以電腫瘤。電骨又得,電腦又得。電腦又分成個腦電(Whole brain radiotherapy),或者局部電-電療刀(stereotactic radiosurgery)。

5)手術:今次主力變副選。主要係切侵蝕出皮膚嘅腫瘤,等皮膚唔好爛/痛/發炎。另外個別情況,例如單一地方轉移(solitary metastasis),可考慮進取D割埋佢,例如切肝/肺/腦。仲有未講如果尾龍骨轉移,搞到壓住脊髓神經(cord compression),可考慮做減壓固定手術(decompression & fixation),以防下半身癱瘓。最後如果化療乸到好難搵血管落藥,可以做個小手術去種個內置注射器入身體(port-A-cath),等吊針時唔洗拮血管舒服D。

6)骨針:有2個選擇[Zoledroic acid(Zometa)]同埋Denosumab你揀。佢地主要用黎減少因為乳癌骨轉移,而引致嘅併發症(骨痛/骨節/血鈣過高)。另外Zometa仲有研究(AZURE,ABCSG-12)顯示,對早期乳癌可能有抗乳癌作用添,包括可以減少骨轉移,什至延長壽命,不過主要係喺收經5年以上人士身上先有效。

以上全部都係有科學根據證明幫助到控制乳癌嘅療法,一口氣講咁多比你聽,只係想你知道,我地西醫雖然冇辦法根治末期乳癌,但係喺控制個病(延長壽命)方面,我地係有把握嘅,唔好咁快放棄治療!如果你未試過晒以上大部分療法,千祈唔好亂咁試其他所謂乜乜食療、自然療法、布緯食療、褐藻糖膠、人體充電、能量水、古方、古法、秘方,厚道D講就好有潛力,實際D講就係唔得嘅,刻薄D講就全部都係呃人嘅。

乳癌四期存活率

「如果控制唔到,我仲有幾耐命?」

好視乎對治療嘅反應,而家乳癌治療發展日新月異,真係好難講實。

以前寫過一篇「香港乳癌存活率-我仲有幾耐命?」,入面有個圖表可以比個初部印象你。

圖片來源:Annals of Surgical Oncology

圖片來源:Annals of Surgical Oncology

 

你可以見到乳癌四期可以有好大差異,有人幾個月就走,有人幾年先走,有人甚至十年以上都仲係度。

「咁我係幾個月嗰個?幾年嗰個?定係十年以上嗰個?」

講唔實,所有野都係靠估,不過我地估得黎都有根有據,並唔係好似D財經演員呃D師奶咁講:「恆生指數低試5000點,不過如果突破到250年平均線22000點,就可以上望40000點」。

我成日諗,如果呢位財經演員可以發明/發現「唔洗經過22000點,就可以去到40000點」,諾貝爾獎仲唔係屬於佢?佢發明咗「瞬間轉移」呀!以後住高樓大廈唔洗怕電梯維修,你可以唔洗經22樓,就可以由5樓直達40樓,撐樓梯?洗乜怕。

「咁即係點估姐?有咩根?有咩據?」

係教你估之前,要約法三章:

1)估,係可以估錯。應該話成日估錯先啱,因為醫生都係睇平均數,平均數即係有一半人叻D,有一半人冇咁叻。一定估啱嗰個叫「神」,醫生只不過係「普通人」,甚至連妙手仁心裡面「好型仔嗰個/嗰隻醫生」佢都唔係/做唔到。嘩,仲程至美咁out?係,我得承認我已經好耐冇睇CCTVB。

圖片來源:<來自星星的你>截圖

圖片來源:<來自星星的你>截圖

有超能力型仔情深教授只會係「來自星星的」,現實中,醫生係「來自媽媽的」。

2)估,係好講經驗。醫生有經驗,易D估啱。你冇經驗,易D估錯。咁醫生D經驗點黎?由佢成日估錯而累積返黎。

清楚明白晒?OK,一齊學點估:

點估乳癌四期壽命

要估有幾耐命,我地要睇5樣野:

1)現時身體狀態(performance status):越生猛當然越好(同買海鮮差唔多),行得走得食得訓得就最理想,呢D狀態冇咁快走嘅。相反,狀態走下坡就係唔理想,即係開始覺得唔精神/冇精力,平日鍾意嘅野都唔想做,慢慢冇胃口,唔想食野,個人漸漸消瘦,之後唔想落床,沖涼大小便都唔想去/唔想郁,慢慢連呼吸基本維生既野都有困難,呢D就係轉差嘅跡象。

2)身體轉差速度(temporal change):身體走下坡,係人都知唔好。不過走下坡個速度都有助我地估計壽命。越急速,越唔好。所以希望走下坡得黎,梗係想慢慢黎/甚至保持平穩。

3)擴散咗去邊到(site of metastasis):腦轉移最差,主要因為腦有腦膜(blood-brain barrier)嘅關係,以前嘅抗癌藥物好難入腦,所以對治療嘅反應唔理想,而家有口服標靶加化療(Xeloda + lapatinib)就好DD。另外因為腦袋係掌管全身機能嘅中央系統,腦內壓力過高就會影響重要嘅維生器官,可以明明今日仲好地地,之後就差得好快。肝/肺轉移就普普通通,如果仲有得割(solitary metastasis)就好D。骨轉移就最好,因為相對生得慢,可以有幾年,甚至十年都唔出奇。

4)仲有咩治療未試(treatment):上面咁多治療都未試就好D,即係我地仲有好多皇牌喺手可以對付乳癌。如果已經試過晒大部分都係唔得,當然情況冇咁理想。

5)對治療反應(response):用完以上治療方法之後,通常都會抽血睇住個癌指數/照掃描睇反應,如果腫瘤縮小/有良好反應,條命又當然長返D。如果冇反應,唔洗我講你都知乜事。

頭兩點你自己感覺得到,第三點就你而家學咗先知,尾兩點就要靠醫生。

舒緩不適

如果喺控制乳癌方面我地已經盡晒力,但都仲係天意弄人嘅話,我地之後嘅目標就放係「舒緩不適」之上。

「其實末期乳癌會有咩不適?」

最主要/常見有2樣野:

1)痛:一講到痛,人人都好怕。痛嘅來源主要係骨轉移(骨痛),或者腫瘤侵蝕皮膚(爛咗出黎)。處理方法主要都係止痛,你可以放心,止痛藥我地有好多選擇/強度,總有一隻啱你。醫生唔會要你痛死咁殘忍嘅,呢方面包係我地身上。

2)呼吸困難:主要都係肺積水,搞到條氣唔順,透唔到氣好辛苦。我地可以放條喉仔入肺膜放清D水,之後幫你灌D藥物入去肺膜痴肺(pleurodesis),加埋聞氧氣,會舒服好多好多。

撫平內心不安

當肉體唔再受苦,但日子正在倒數,呢段路病人同家屬最痛苦嘅莫過於內心嘅遺憾、不安、同埋恐懼。

做咗咁耐醫生,見盡不同家庭面對死亡、分離,我得承認,係善終服務呢方面,我地公立醫院係做得唔好嘅,刻板嘅探病制度(「⋯⋯未到探病時間喎/探病只可以2個人入/小朋友唔入得/過咗探病時間喇⋯⋯」),官僚嘅服務態度(「⋯⋯我地做緊野,你喺出面等吓啦⋯⋯」),嘈雜擠迫嘅多人病房(「⋯⋯呢度係公立醫院,你估係私家醫院呀⋯⋯」),冇尊嚴嘅個人護理(「⋯⋯鴨咗尿片喇,唔好落地啦⋯⋯」),衝鋒車嘅善後服務(「唔好再睇喇/唔洗抹啦,夠鐘送落殮房喇」)⋯⋯

咁樣做野法,唔好話幫唔到末期病人/家屬手,其實係傷咗佢地心,我地係內疚嘅。唔係唔想做好D,我地有好多同事都仲好有heart好有火,但受制於公立醫院客觀環境嘅局限,好多時真係做唔到「去者能善終、留者能善別」呢一點。

撫平不安,並唔係隔岸觀火機械式咁講句「我明白你嘅心情」、「請節哀順變」可以做到,針唔拮到肉,始終都係唔知痛。

我地做唔到撫平不安,好彩仲有人做到⋯⋯

用愛擁抱晚晴

面對死亡,當人世間一切東西(健康/財富/成就/人際關係)瞬間失去,此刻病人最需要的是「愛」。

送別摯親,當舊日習慣徹底改變,混亂代替秩序,失去代替擁有,此刻家人最需要的是「承載傷痛的地方」。

靈實靈養院(Haven of Hope Holistic Care Centre)就是一個用愛擁抱晚晴的地方。它用心去服侍末期病人,用愛去撫平病人/家人的傷痛。

從它們的刊物-靈養院園地,我看到它美麗的地方:

在這裡,找到信任同盼望⋯⋯
在這裡,家人可以日夕陪伴⋯⋯
在這裡,與家人的親物關係得以修補⋯⋯
在這裡,生命得到尊重,剪髮、大小便、沖涼、甚至按摩,一一照顧周到⋯⋯
在這裡,病人重現歡顔,家人可找到安慰⋯⋯
在這裡,家人可在溫暖、安寧的環境下送別摯愛⋯⋯

因為愛,叫人無懼無憾地面對死亡,平安地走畢人生旅程。
因為愛,叫家人在溫暖中拭掉眼涙,在厄困中亦能活得好。

人生的最後一課:

原來放下一切,才是真正擁有⋯⋯

歌曲:愛是不保留;主唱:關心妍;作曲、作詞:盧永亨;編曲:Jim Ling;監製:劉港源

講完唔開心野,為咗氹返你開心,下次我會開一個新嘅篇章「成功戰勝乳癌的妳」,重新為妳帶來愛.乳.希望⋯⋯

有唔明?係下面(網站連結)寫低佢,我會盡量解釋你聽⋯⋯

 

Breast Cancer HK「香港的乳癌治療資訊」網站 / Facebook 專頁

 

 

 

發表意見