立場新聞 Stand News

人人心中都有一個澳牛故事

2018/8/21 — 11:07

背景圖片來源:維基百科

背景圖片來源:維基百科

「靚聲英語 KOL」蕭叔叔發帖,「話說貌似遊客的玩命男,於店內阻塞通道,被侍應哥哥提點後竟敢駁嘴;最後被全店侍應怒 X 娘親,落荒而逃。」引起一篇支持或笑罵,我相信人人心中都有一個澳牛故事。我的故事是咁的:

當外地朋友第一次來香港,叫我推薦餐廳時,我都會問想唔想試下香港奇景澳牛餐廳?如果你可以忍受喧鬧擁擠地滑,侍應不停在你前後左右穿梭,你又可以在 10 分鐘內光速點餐、食完叉燒意粉飲埋杯茶,你會享受到香濃奶茶同嫩滑炒蛋,加送一點被虐待的快感。一次帶外籍上司去嘗新,事前做足功夫 briefing ,上司非常投入角色,用荷蘭人響亮的嗓音叫餐,澳牛猛男嚇一跳後舉起手指公大笑,上司愉快進餐但無下次,因為座位於佢實在太窄。

另一次幾個同事在午飯時間去,同事因為飲熱檸水,個玻璃杯太熱飲得好慢,一名澳牛鐵漢掉張紙落檯,上書:「此地不宜久留」頭也不回走開了,我哋笑住叫同事快啲飲,怕下一張寫: 「再留小心人頭!」

廣告

澳牛究竟係一間點樣的餐廳呢?所有(應該仲係啩)侍應都係男人,侍應同人客人數比例拍得上文華東方酒店,食物選擇數量少所以貨如輪轉,利潤分分鐘高過好多名店,背後有乜故事?

侍應的態度其實好有香港仔的特質,勤奮、快手快腳、口沒摭攔、人人知道自己位置與隊友合作無間,唔賣帳但又照顧老弱孕婦,在膠世代樣樣口說公平人人都要一樣對待之際,對大眾鐵漢惡樣,對有需要的人才亮出柔情一面,老子就係要比大肚婆長者入先,睇唔順眼自已過主,香港餐廳多你有得揀,但澳牛確係一道風景。

廣告

發表意見