人在中環 - CK

人在中環 - CK

我係一隻又笨又固執既豺狼。

2019/2/14 - 17:08

人到中年必須學會面對挫敗

資料圖片,來源:Jim De Ramos @Pexels

資料圖片,來源:Jim De Ramos @Pexels

人到中年,其中一個必須要學會應付嘅事情,係面對挫敗。面對挫敗,最差嘅應付方法,當然係頹,然後一蹶不振。呢個係公認最軟弱、最消極、最唔 man 嘅處理方法。我哋呢啲中佬,做咗幾十年人,潛言默化咗幾十年唔可以做廢柴,自然唔會接受咁樣嘅應對辦法。

多年嚟我哋被灌輸,我哋做人必須要堅強,所以中佬遇上挫敗,第一個自然反應係「唔認輸」,然後諗辦法轉守為攻,化危為機。呢啲,全部都係 default。

Default 完畢,結果可能都係搞唔掂。成功同失敗嘅界線往往就喺呢一點上面發生。Default 嘅 action 做完唔得,然後呢?我哋多年嘅教育裡面,原來係從來冇教過。然後,就係沒有然後囉,於是我哋呢一代嘅中佬喺呢個 moment 會點做呢?就係 run 多一次 default,期望會 run 到個轉機出嚟。情況就好似,買咗隻股票係咁跌,你越跌越溝,但越溝越跌一樣。結果呢?

廣告

Default 過後,我認為應該係大方認輸,然後重整旗鼓,等候下一次機會。認輸需要莫大嘅勇氣,我敬重願意認輸但仍能保持心態積極嘅人。有本事做得到嘅,都係最強嘅強者。講就容易,但環顧四週,其實有幾多人真正能做到?

何時收,何時放,真係學到幾老都未學得完。

祝大家情人節快樂。

 

(標題為編輯所擬)

作者 Facebook