立場新聞 Stand News

人在異鄉整咖喱魚蛋

2016/5/18 — 15:13

人在異鄉 - 有水準嘅咖喱魚蛋,係以燒鵝嘅心機同材料,造出蔗渣嘅風味:捉住6個重點材料 ——

首先,有水準嘅「homemade」咖喱魚蛋,係應該有「街邊味」嘅。

第二,喺珀斯,一如其他所有港式嘢,係唔會周街都係咖喱魚蛋嘅,一係就長途跋涉,一係就唔好食,一係就長途跋涉得來唔好食嘅。所以你要食出呢個「家鄉嘅街邊味」 (好強哲學感) 呢,通常「最簡單直接」嘅方法就係自己死去整囉。

廣告

第三,要整好食嘅咖喱魚蛋其實難過講波 (OK,我查實係唔識踢波嘅),關於點樣將一條手心又係肉、左手又係肉嘅真魚,整成一粒粒嘅魚蛋呢,係屬於進階研究,而呢篇呢,我地暫時講番比較容易嘅部份先,就係去揀一的似樣嘅現成魚蛋,再去整一個自製醬汁。

廣告

嗰個好神奇的祕製醬汁:

豉油            4湯匙

蒜蓉            4湯匙

葱頭            4湯匙

咖喱粉/膏       2-3湯匙

甜醬/海鮮醬     3湯匙          

第5個重點材料:  無錯,你估岩左,就係魚蛋     以上份量整到約 500G魚蛋

做法非常容易:

落鑊爆香蒜蓉葱頭;
再爆咖喱膏;
再落魚蛋;
再落甜醬
唔喜歡太杰的話可以落多少少水

至於魚蛋,當然要揀彈牙、有魚味的啦,唔駛多講(灣仔街市有間賣魚蛋好好食的,間唔屎會有試食(成粒喎),唔係一般小食店嗰的又粉又實嘅hea蛋。

呢個醬汁呢,係好耐以前上網搵返來的,記左入腦,,而家想搵番個出處已經搵唔到了,裡面唔記得有無講到,加左甜醬同蒜蓉,整出來就好似街邊味,我自己食落又覺得係喎,如果大家搵到,麻煩send俾我,我要去多謝佢 (係講句多謝咋唔係你想點,最多送的賣唔晒嘅澳洲零食俾你喇) 因為住係珀斯呢度,有時口痕起上來想話落街食街頭小食,係完全無囉唔該(一係就唔好食), 下下都要自己整,座底要幾個鐘,而我嘅最愛之一車仔麵呢,真係全個省都搵唔到好食的。 (真係… 這些機會…)

 

 

發表意見