立場新聞 Stand News

人走茶涼 Vs 熱廚房

2016/3/10 — 18:43

圖由作者所配

圖由作者所配

三月四日,星期五,自己同自己講,永遠記得黯然神傷嘅呢日,其實過一排就唔記得,問吓自己,唔開心嘅嘢,記嚟做乜,記開心事就得。做人有高有低,接受自己局限,輸得多就慣,馬死落地行,行行吓,又行到羅馬,就算行唔到,阿Q精神,去樓下行吓,都唔差吖。

當日黃昏六點零四分,朋友P第一個whatsapp慰問,四日之後,即係噚日,第一個食晏賀我榮休,接咗「被辭職」後嘅第一份assignment,係乜唔講囉,總之朋友一番苦心,唔敢推辭。多謝朋友關心,驚我無收入,又驚我寂寞,一星期唔使,幫我達到「可以退休,唔可以唔做嘢」嘅最高指令。退休賺外快,都咪話唔爽。

你點對人,人點對你;你對人好,梗有人對番你好,放長雙眼就睇到;你對人差,人走就茶涼,就即刻睇到。其實 ...

廣告

對人好,人走又點會茶涼;
對人好,友情厚,機會有;
對人好,事業長遠有睇頭;
對人好之前,對自己更好;
只差在你肯唔肯行第一步。

慨嘆人走茶涼,咪傻啦。商業世界金錢交易,貨銀兩訖,各不相干,唔好講到咁落寞悲涼,友情只係返工報酬以外嘅額外獎賞。唔該想一想,自己喺熱廚房大權在握拼搏嗰時,講公事公辦,講錢,講利,講數字,唔講人性;大權旁落無得入熱廚房嗰時,發覺大部份人企喺感情圈外,自己一個人門庭冷落,於是扮哂英雄氣短,嗟嘆人情冷暖,其實只係戀棧作威作福嘅熱廚房,唔慣無人侍候,從今以後無人幫手訂房 ,早知今日,何必當初。

廣告

見過太多太多廉價「人走茶涼」,好彩,上天畀咗我選擇性嘅記憶力,記唔到珍禽異獸科嘅低裝行為,淨係記得感情圈內朋友斟畀我杯熱茶。網友朋友戰友親友,幾十年前嘅鄰居舊友,細個教我嘅老師,第一份工嘅上司,移居外地嘅舊同事,位高權重嘅舊雨新知,樓下茶餐廳嘅小二,唔識我嘅job hunter,都第一時間問候、安排飯局、打本開檔、買多本拙作,笑我唔係《不開會的CEO》,而係《不需開會的CEO》,更加有朋友居中串連,幫我搵工,幫我接talk show,實在令我太感動。

雖然感動,我係獨行俠一個,揸住支槍四圍游蕩,唔興散水餅,唔寫last day電郵,但係為咗報答朋友,除咗歡迎各位selfie集郵,決定犧牲色相,男士可以大力握手,搭吓膊頭,女士可以怕羞抱抱,當正我係商界華劉。

做人做到華劉,我不枉此生。如果今晩波友飯局,羅漢請觀音,但覺此生無憾。

 

原刊於作者 facebook page

發表意見