立場新聞 Stand News

仆街磁石

2015/4/20 — 17:20

圖由作者提供

圖由作者提供

作者按:

警告
-切勿對號入座
-文長。
-對粗口有敏感嘅人請避之則吉

───

以前女友教曉我「仆街磁石」呢個名詞。

廣告

嗰陣佢講起一個喺愛情路上屢戰屢敗、屢敗屢戰嘅朋友,語帶無奈咁講:

「有一種女人,不斷遇到仆街男人,一個接一個、一浪接一浪,瘋狂咁吸引班仆街嚟傷害佢。佢好似一舊強力攝石咁,唔係,簡直係一舊『仆街磁石』。」

廣告

聽完女友咁講,鄙人心中有愧,唔敢正面望佢,只係左顧右盼、閃閃縮縮,嬉皮笑臉咁話:「係咩?哦~仆街磁石,個名幾得意,哈哈哈哈」

女友:「係呀,仆街磁石呀。不過你放心,我唔係話自己係一舊仆街磁石。極其量我只係吸引咗你一個仆街啫,仲未去到磁石級。」

我望望佢,沉默,不語。

挑!當初明明係你自己溝我先,乜撚嘢「只係吸引咗你一個仆街」?完全罔顧事實,我先係港女攝石呀。

───

往後嘅日子,我發現原來身邊好多女仔都係仆街磁石。經反覆思考、求真、驗證,再反覆思考後,我歸納出,仆街磁石通常有以下特徵:

特徵一,佢哋喺愛情路上專門遇人不淑,每次都遇到仆街。男友掛住打機、淨係陪啲豬朋狗友呀邪惡軸心呀、對佢唔好、對女友愛理不理呢啲已經算小事-男人十個有九個都係咁;用skout去溝女、返大陸叫雞玩(唔係問題)唔戴套(好大問題)仲傳埋畀女友(極極極大問題)、搞大個肚要佢畀錢落仔,男友要佢貼錢養,屢見不鮮。

另外,一種好賤亦好常見嘅仆街,係明明已經有女友(甚至老婆),仍然走去溝鳩你。溝你嘅時候講明畀你聽佢有另一半(或者你根本已經知),又會話同另一半有好多問題-性格唔夾、感情淡咗、睇法唔同、佢食譚仔中意食大辣,兩個人經常嘈交,並喺分手嘅懸崖徘徊,隨時一躍而下。

不過,一旦溝到手-更正確嚟講係上咗床之後-你預期佢會同女友分手,嗰陣佢就會千方百計話「暫時」唔可以同正印分手。原因呢,通常係話「另一半有病」,患「不治之症」to be more specific。跟住佢就會變返痴心情長劍,覺得呢個時候另一半好需要自己支持;又或者另一半個阿爸/阿媽/冚家有病,總之唔可以咁不負責任咁走咗去……如此這般。總之,同你上完床,佢正印就會有病-除咗愛滋同其他性病,我唔知邊得嚟咁多巧合。

你唔好理,橋唔怕舊,最緊要受。通常啲仆街磁石都會繼續沉船。沉到世界末日。總之,有名你叫,仆街磁石,專攝仆街。

特徵二,仆街磁石唔係醜女。仆街磁石唔一定要靚,但望落去你唔會叫佢醜。如果將女人分為靚、大眾臉、醜三種,絕大部份嘅仆街磁石都介乎靚同大眾臉中間。亦因為佢哋唔係醜,反而成日遇到仆街,你先會好似古代95%嘅詩人咁有一種懷材不遇嘅感嘆,產生一種客觀上嘅反差:

「佢個樣都算好,點解仲成日遇到咁仆街嘅男人?」

Sorry!!我係好法西斯:醜女、肥婆屢屢遇人不淑,唔可以稱為仆街磁石,只可以叫「不自量力」。好簡單,如果將上段後嗰句改為「佢個樣都算衰,點解仲成日遇到咁仆街嘅男人」,呢句嘢通順咩?邏輯上合理咩?

特徵三,仆街磁石愛情經驗豐富。呢個係套套邏輯、即係廢話,唔拍得拖多,點會知佢哋係仆街磁石?總之仆街磁石好多男友,你識佢十幾年,佢無男友嘅日子,兩隻手分分鐘數得晒;但佢男友嘅數目,你借埋佢啲手手腳腳都數唔完。

特徵四-同上一個特徵有關-仆街磁石好需要被愛。呢個世界有一啲女人,好需要男人愛佢。唔係做愛,係愛佢。如果佢一日發現無人愛佢,就幾乎生無可戀。不論年齡、愛情閱歷,佢哋對戀愛有種近乎天真嘅美好憧憬。佢哋每次,係每次,遇到新男伴,總覺得呢個就係真命天子。

佢哋可愛嘅地方係,絕不氣餒,對戀愛總抱住一種不可思議地樂觀嘅精神;唔可愛嘅地方係,人類總犯上同樣的錯誤,佢哋一如以往天真瀾漫,絕不學精。

以上幾點,如果你有朋友中晒,恭喜你!作為佢嘅朋友,你應該會遇到「仆街磁石周期性抱怨自己遇到仆街症候群」。

───

喺度要講返我一個大學同學,文老師。文老師嘅職業唔係教書,不過佢大學嗰陣已經成個老古董咁,開口埋口「唔准」、「唔係幾好」,成個古代嘅老師咁,所以叫咗佢做文老師。

文老師睇瓊瑤嘅小說大。如果龍虎豹、高射台、十隻白虎,甚至乎我寫嘅小說要包膠先賣得,咁瓊瑤嘅小說直頭要列為禁書,直頭唔可以畀佢畀任何人接觸到。懷春小女睇得瓊瑤多,好容易活喺一個唔真實嘅世界:書裏面啲女主角多數出身大家族、名門之後,唔憂柴唔憂米,不食人間煙火,全撚部過住公主般生活。佢哋可以花大量時間畀情情塔塔所玩弄,甚至乎佢哋嘅人生只係花喺談戀愛度(由故事開始到佢哋自殺死,清一式只係談戀愛)。瓊瑤啲書,淨係書名已經令我呢個麻甩佬打冷顫-聚散兩依依、月朦朧鳥朦朧。只能講百貨應百客,話唔定瓊瑤大姊睇到我啲書,心裏都係講句:「屌你老味,咁嘅人都寫到文,仲要有人睇……」ok我估瓊瑤應該唔講粗口的。(註一)

文老師好明顯係中咗瓊毒,將瓊瑤啲書睇完又睇、反覆再睇,識背咁滯,情形同香港大部份70後都識背周星馳一兩套戲一樣。佢中學讀女校,成班女生一撚齊癲,成日以為呢個世界充滿愛同浪漫(呢點有啲似佔中三子同社運人士),每次談戀愛都一定要轟轟烈烈,海枯石爛,滄海桑田,開天闢地,死人榻樓,妻離子散,身首異處,含恨服毒咁先叫「談戀愛」。總之,人哋嗰啲唔係叫愛情,只有自己嗰啲先係真愛。

對佢嚟講,我呢啲拍左十鳩幾次拖(澄清:八次),三十幾歲都唔結婚嘅男人,完全係登徒浪子,等同愛情界嘅梁振英。佢成日都好擔心我嘅女朋友會蝕底俾我,殊不知道咁多年以嚟一路蝕底嗰個係我。挑!如果真係成日佔人便宜,邊有可能拍咁多次拖?就係因為我拍拖個宗旨係捐啲精做愛,我個基金先叫捐條毛做善事渣!

好咧。有日我喺屋企食食下晚飯,被迫飲湯之際。佢發個whatspp 俾我-佢搵親我都冇好嘢。食完飯嗱嗱臨見佢,約左係屋企隔離街間滿記糖水。

佢一副哭喪咁嘅樣, as expected.

上星期見佢,佢先興高采烈話遇到個「真命天子」,上進青年,有樓有車,對自己又好,心諗呢次肯定係呢個。對於「真命天子」之說,我已經聽到無晒感覺。呢十幾年嚟「真命天子」條人龍,分分鐘長過由商湯排到去清末溥儀,有時候我都未搞清楚係邊個佢已經傷心多三次換咗四次畫,你叫我點認真看待?

「嘻嘻,今次又開邊瓣呀。」我突登嬉皮笑臉。

「今次係hit and run……」

「哎呀,又係趙完鬆,都唔係第一次啦。睇開啲,你又唔係處女。」跟手用右手食指篤入左手嘅窿窿,仲摩打手越篤越快。我有時都覺得自己好仆街。

「乜你咁嫁,人哋咁慘你仲喺度玩,安慰吓人啦。」

「屌,咁多年,我同你講咁多嘢,你有聽過半句咩?半句都冇呀!安慰你,你會受安慰咩?算撚數啦。今次又點呀?」

「咁阿彼得真係好好呀嘛。金融才俊、年輕有為,有車有樓,又孝順父母(仆街,你係佢女友,佢孝順關你叉事?),我覺得佢係真命天子,佢話會同我結婚,咪同佢咩咩囉。」文老師三十歲人,處都破咗成億次,一講起啲性愛嘅嘢,都係用咩同咩嚟形容。

「喂,上次嗰個乜嘢籃球隊教練,咪又係同你咩咩完就閃咗人?再對上嗰個乜嘢塔羅牌師傅,死都唔肯用套,你耳仔軟聽咗佢講話唔用舒服啲,結果你之後去養和驗咗幾多次STD?李維達幾乎要畀貴賓咭你咁滯啦!仲有之前嗰乜嘢上進青年問你借咗廿萬話要開舖搞課程教人用電話,你又信?要用電話,咪開個number pad按八位數字號碼再按打出囉,啲咁鳩屎嘅大話得你信嫁渣!

次撚次都話係真命天子,有冇出現得咁濫呀?」

文老師一畀我數臭,就扁起個死人咀、眼泛淚光:「咁唔咩都咩咗,佢唔覆我、又唔搵我,咁我而家點喎。」

「算罷啦。」

「你乜嘢都話算!嗚嗚嗚~~~」佢喺滿記糖水放聲喊出嚟。

糖水舖得幾張枱,有對後生仔女唔識死望住我。我兇一兇佢哋,佢哋就唔敢再望。

「喂,而家唔係我呃你喎。我同你講過一次千次啦,蔡瀾喺佢本【蔡瀾眼中的八婆與美女】講過一個絕世方法俘虜男人嘅心。我覺得行得通,不過你唔肯聽之嘛。」

「嗚嗚,乜嘢方法喎~~你都冇講過。」

我幾乎想一嘢抽起佢頭鏗落張枱度

「講咗六萬七千九百次啦,蔡瀾喺【想嫁的女人】寫過:

『和對方睡過一次覺後,不管你多麼愛他,也千萬要忍著,再也不要給他第二次!

愚蠢的男人,以為發生了關係之後便會有下文。哪知電話也沒有一個。怎麼一回兒事?他們開始疑惑。在他們寂寞的時候,他們一定會主動和你連絡。

這時候你儘管告訴他,大家好過,有個美麗的回憶,再下去不一定有好收場,不如到此為止吧。

對方要是從此不找你,那也算了。

以為得不到女人的愛,自己一定有毛病,賤的是男人!他們會堅持要和你見面,這時你坦白地告訴他你不是一個和甚麼人都上床的女子,在正常的情況下,你需要戀愛,才能做這種事。

男人如果答應,重新由看電影、吃飯、談天做起,他一定會改變對你的印象,知道你是一個好女子。終於,他說:「我們結婚吧。」

曾經有過很多個女人接受我的推薦,現在抱著白白胖胖的兒女,非常幸福。』

「嗚呀!!!!」聽完我講,文老師喊得仲大聲。

「又點呀……」

「蔡瀾話唔理你幾愛佢……都要忍住,唔好有第二次……

人哋已經同佢咩咗兩次,無咧無咧。」

「哈哈哈哈哈哈哈哈哈哈哈哈哈哈哈哈哈哈哈哈」我笑到伏咗喺枱度。

我作狀安慰咗文老師好一陣子,講咗幾個笑話佢聽,佢似乎心情平伏咗啲。

呢個咁嘅「真命天子出現、心情忐忑不安、一齊、發現天子有問題、好快散咗、文老師唔開心」循環,隔兩三個月就出現一次,我已經慣咗。好嘢就好嘢在阿文老師每次都不厭其煩,點都會失落一陣……直到真命天子577出現為止。

食完糖水,臨別佢問咗我幾個問題:


「啲男人點解要咁對我?點解我成日遇到仆街?」


我靜咗半秒。
.
.
.
.
.
.
.
「你要聽真話定廢話。」

「呢個時候你仲講笑!」

「我無答案,諗到話你知。」

───

返到屋企,我好認真思考呢個問題。

仆街磁石,其實係乜嘢?歸根究底,仆街磁石係一個「配搭」嘅問題。喺男歡女愛嘅世界,「好男人配好女人」、「壞男人搭壞女人」根本唔係一個常態。所以個問題唔係點解會有仆街磁石,而係點解好女人會搭上壞男人。

我嘗試歸納出各種可能性,並用身邊各個例子驗證,最後得出三個原因:

第一個原因,係男人皆仆街。既然男人都係仆街,只要任何女人同男人拍拖,遇到仆街嘅機會就係100%。

呢個原因最簡單,亦簡單地與事實不符。最起碼史兄就唔係一個仆街……唔係咁。我身邊好多朋友係好男人嚟,人品好、收入唔錯;又或上進勤奮,心地好。尤其我幾個中學同學,佢哋拍咁耐拖,對幾個女友始終如一地好,從來無一腳搭兩船、出去玩女人;好幾個同女友拍咗十年拖,最後結埋婚,幸福快樂地生活。當然,【婚姻這種邪教】¬裏面森哥種仆街,梗係大有人在,據聞佢連結咗婚都仍然咁仆街。

好多男人係仆街,但佢哋唔係無時無刻都100%地仆街。佢對呢個女嘅,仆街到核爆;但對第二個,又變咗好好先生。所以,我唔認為仆街磁石嘅出現,係由於男人全部都係仆街。

第二個原因:喺有效率嘅市場下,好男人已經畀人mark住咗,唔再喺市場度畀人揀,淨低嘅都係籮底橙。只有好偶然嘅機會下,好男人先會available。

呢一點有啲似金融學上嘅efficient market hypothesis。即係股票嘅價格已經完全反映市場訊息同公司潛在嘅價值,唔存在「平貨」、「被忽略嘅股票」、「被低估嘅業績」呢回事。好嘅股票同男人,已經搶貴晒,唔到你啲平凡嘅港女去爭;淨得畀你買到嘅所謂平嘢,係次貨。所以,你拍拖搞嚟搞去,都只會搵到唔好嘅男人。

呢個講法聽落有啲道理,但「得好男人有拖拍,所以市場度得返仆街」嘅前設有問題。如果係咁,出現嘅現象就唔係「好女人搭上壞男人」而係「好男人同好女人一齊」、「壞男人同壞女人一齊」,無咗仆街磁石呢回事。

所以,以上呢兩個係比較宏觀、概括嘅說法。

第三原因,亦係我認為最好嘅解釋,就係由於仆街磁石嘅性格、行為同睇法,令佢哋永遠只會吸引到仆街。

我記得英國電視劇【神探福爾摩斯】第三季,當華生發現自己個老婆原來係特務,老友又係神神怪怪嘅福爾摩斯,佢就問自己點解咁唔好彩,成日會遇到啲咁危險嘅人(即係特務同偵探)。


福爾摩斯答大概佢:「其實係你自己揀嘅。」


兩個人相戀(異性或是同性戀也好),唔係隨機嘅過程(random process),而係各方根據一啲客觀條件嘅一個配對過程(matching process)。仆街磁石嘅性格行為,就只會吸引到仆街。文老師咁,每次介紹啲乖乖仔、好仔,擔屎都唔偷食嘅畀佢,佢就話人悶、木獨,無新意,唔識tum佢開心;文靜啲、中意睇書嘅,就話人成個書獃子;中意去行山,去戶外活動嘅,就話人成個野人咁,畀太陽晒得多皮膚唔好;上進青年又話人掛住做嘢、二世祖又嫌人二世祖。

結果咪只有啲口甜舌滑,一心呃蝦條嘅人接近你囉。佢哋一定投其所好,你中意做乜佢哋咪就晒你,然後屌完閪就走人囉。甚至乎連一啲唔係仆街嘅,同你一齊耐咗都變咗仆街。

其實,仆街磁石永遠唔識從錯誤中學習,永遠唔知自己點解成為仆街磁石。因為你太天真,成日以為咁多真命天子。大學到而家,你拍咗幾多次拖?二十?三十?大佬,兩隊足球隊正選加後備都夠。最大嘅問題,係無學精,無喺錯誤中學習。

我將上述半學術結果講畀文老師知。

「史,我真係好需要人愛。」

「要人愛,首先要自愛。你連自己都唔愛自己,點能夠奢望有人愛你、珍惜你?

上次個仆街,一腳搭幾船。你仲要死lur 佢,叫佢同返你一齊。人哋講埋「算罷咧」,仲要出埋絕招『你畀啲性格好唔好?』,你都仲要求佢同你一齊。你咁撚犯賤,對方點會珍惜你、重視你?

屌,你變成仆街磁石,係你自己攞嚟。啲仆街係你吸引返嚟,你要負嘅責任遠比佢哋大。」


結果文老師係facebook unfriend 左我。

好心無好報,畀建議朋友,朋友都冇埋……最慘係佢未聽我講「仆街磁石」要點自救。

-將自己變成一個仆街。你夠仆街,就冇人可以傷害到你。不過,對於仆街磁石,呢個建議近乎多餘。我通常見男人畀人hurt完變成仆街,多過有女嘅可以咁做。

-將「談戀愛/有人錫」嘅優先排到低一低。無錯,呢個等同斬腳趾避沙虫。但你專注於工作、努力培養自己嘅嗜好,學習一個人做所有嘢-睇戲、食飯、去廁所、打邊爐,清醒啲,無人錫你,你學習錫自己。學識愛自己,你就學識點樣唔畀人傷害。

-帶眼識人,從錯誤中學習。呢個係最好嘅方法。回顧下自己衰過喺啲乜人手上,搵下啲共通之處。仲有,你要拍拖,唔該叫朋友介紹,介紹啲似樣嘅畀你。最後最後,聖經有句嘢,叫「愛是不保留」,唔係叫你一開始就毫無保留。你要觀察下個人,帶畀啲朋友見下,品評下先。

上面啲嘢,阿媽係女人,係人都識講。不過仆街磁石最中意畀借口自己,口講知道偏偏完全無諗過去做,繼續做弱者,故意做戀愛戰場中嘅雷曼苦主。

細過嗰陣,我分唔到佢哋係無得救,定係佢根本唔想人救。今時今日,我敢大膽講句,仆街磁石,特別係三十歲以上嗰堆,只係一班唔肯面對現實嘅女人。佢哋同街口證券行班睇完財經演員推薦嘅冧把就去買然後輸到仆街問點解扮可憐嘅師奶,本質上係一模一樣。最起碼,一樣咁唔抵可憐。佢哋唔係唔知道點樣自救,只係享受做弱者所得到嘅可憐可憫。

一個決意要沉落水底嘅人,你拯溺技術再好都唔會救到佢哋。而喺我認識嘅仆街磁石當中,只有少數人能夠成功自救。

───

有個女仔朋友JJ(唔係賈曉晨),後生嗰陣有個軟皮蛇男友。男友預科畢業升唔到大學,JJ升咗大學都冇離棄佢。唔知軟皮蛇自卑定係點,對JJ好撚差,又郁手打佢,晚晚飲酒、扮豪,爭落好多咭數。

最慘係條仆街無嘢做,根本無能力還錢。

JJ一個大學生,好努力補習,嗰陣經濟差(2000年左右),點都唔夠收入幫佢還錢。結果JJ去咗一間酒吧做侍應,唔使猜枚、淨係拎酒開酒嗰啲。

我好記得佢嗰陣喺酒吧做,一個鐘$55。

嗰間酒吧就喺我街口,而家間酒吧仲喺度。我就係JJ做兼職嗰陣識到佢,一識十幾年。

做酒吧當然唔係失禮嘅事,講到尾都係用自己勞力賺錢。但你想像下JJ日頭要返學,放學要補習,夜晚-我指嘅係10點至凌晨3點-仲要返多一份工,然後搵嘅錢仲要唔係自己洗,感覺有幾難受。仲要,佢個仆街軟皮蛇男友,到今日都未知JJ係靠喺酒吧做先有錢幫佢還咭數。你諗下你要幾愛嗰個人……同埋你要幾戇鳩……你先會去酒吧打工幫人還錢。

好似喺酒吧做咗一年咁上下,隨住軟皮蛇搵到份工,有收入,JJ先慢慢唔使返酒吧。

無耐,軟皮蛇就搵咗第二個,飛咗JJ。呢啲真係傑出男子漢系列。

有段時間,去親酒吧都見到JJ。唔係返工,係買醉。佢飲到幾乎將之前喺度賺嘅錢畀返酒吧。

某日, JJ突然打畀我,話畀我聽佢諗通咗。佢話佢唔會再理啲仆街,唔會再拍拖(我當然當佢吹水)。佢仲好認真咁研究過乜嘢人最有機會係仆街-越靚仔、條件越好嘅(有錢、有學識),越大機會係仆街。本身有女朋友又溝你嘅,全部呃閪屌,根本唔係有心追你。

從此以後,無人再可以傷害到JJ。佢同之後男友拍拖四年、之後一個七年。愛情嘅戰場中,你永遠只可以從經驗中學習。唔學習,蝕底嗰個永遠只係自己。

───

可惜文老師冇耐性聽我講以上嘅嘢。大部份仆街磁石亦唔會有興趣睇呢啲幾千字嘅文。

無幾耐,我收到另一個女仔朋友嘅whatsapp。

又一舊仆街磁石、又遇到仆街。

呀,我講漏咗「仆街磁石」另一個重要特徵:


佢哋好似7仔咁,梗有一個喺左近。

───
───
───


【廣告時段】

史兄膾炙人口嘅故事<婚姻這種邪教>改編為舞台劇咧~我好似仲會聲優演出一小段,真係做雞咁做。

演出劇目: 婚姻這種邪教
主辦及製作: 拉闊劇團
演期及時間: 2015年5月8至10日晚上8時
2015年5月9至10日下午3時
場地: 上環文娛中心劇院
購票網址
或去 城市電腦售票網

───


一.如果睇亦舒嘅小說大,大概會覺得談戀愛係多餘;每次分手都最好向男生施以最恨毒的招數,例如行宮刑。

作者 facebook page

發表意見