立場新聞 Stand News

今日薯條睇真D(第六集)

2016/11/8 — 14:28

唔講唔覺,原來呢個Page已經面世左一個月啦!多謝大家一直嘅支持!唔知有無人係好鍾意食香蒜呢類比較重口味嘅野食?今集薯毛毛決定帶大家食得重口味少少,睇下今次呢份香蒜巴馬薯條係點先!

講真,好少見到薯條 X 香蒜呢個組合,當侍應姐姐將碟薯條上枱個陣就已經聞到好重嘅蒜味,就已經好想令我去快啲食下睇下係點樣。一食落去,確實係蒜味好夠,而且薯條即使係幼身都好,薯肉都好飽滿,絕對無偷工減料,至於佢地嘅蜜糖醬都唔錯,只係覺得個份量唔係太夠,呢度比較可惜左啲。

廣告

總結下評分先:

廣告

薯條Size:幼薯條

價錢:$48

賣相:3.5/5(單睇賣相唔算話好吸引,但蒜味夠強,較重口味者應該會幾鍾意)

薯條質素:4/5(即叫即炸,薯肉都好飽滿,炸出黎都唔會覺得好油)

醬汁/調味:4/5(蒜味同蔥故然夠入味啦,蜜糖醬都唔錯,只係個份量少左啲要扣分)

性價比:3.5/5(整體唔差,只係個份量同個醬略為少左啲,無奈之下要扣分)

選擇餐廳性質:由於餐廳比較細,屬於快餐類型,1-2人比較好。另外,佢地嘅Burger都幾好食,算係落足料,值得去試下。

呢間舖其實係位於天后個邊,想睇古蹟附近有天后古廟,想睇書就可以過返去香港中央圖書館,再唔係,食完覺得飽想去散步嘅話,可以去返維園都可以㗎!

今集《今日薯條睇真D》去到呢度,臨尾要多謝返Gordon Ho嘅推介!唔知其他朋友又有無心水推介呢?歡迎大家留言話俾薯毛毛知啦!拜拜!

 

餐廳:Texas Burger

地址:天后電氣道109號地舖

 

作者 facebook page

發表意見