立場新聞 Stand News

今日薯條睇真D(第十五集)

2017/1/10 — 19:08

相信大家身邊總會有啲朋友唔係唔鍾意食薯條,只係怕食完會好熱氣,又或者食完會怕肥之類。不過,如果有間舖頭嘅薯條,係用有機薯仔,炸油係無反式脂肪,仲要係社區良心小店,聽到呢度薯毛毛自然要帶大家去試下啦!

話說佢地嘅薯條絕對係英式風格,粗切,薯肉非常夠,炸到外脆內軟,而且最特別係用紙摺做船狀裝起佢俾客人(外賣就用紙包起佢),應該係全港獨家啦!醬汁方面有他他醬、茄汁同醋俾客人揀,今次薯毛毛就試左佢地嘅他他醬,都覺得相當唔錯,如果真係要挑剔就真係個醬少左啲。不過,呢份薯條都只係賣廿五蚊,絕對係良心價啦!你仲想有幾多要求幾多先?

廣告

廣告

評分:

薯條Size:粗薯條

價錢:$25

賣相:4.5/5(用紙摺做船狀裝薯條,都應該係全港獨家,剩係呢點都已經相當吸引!)

薯條質素:5/5(滿分!原切,炸到外脆內軟,薯肉非常飽滿,仲要係用上有機薯仔,唔係唔俾滿分呀?)

醬汁/調味:4/5(他他醬都整得唔錯,不過可惜俾得略為少左啲,要扣分。)

性價比:4.5/5(整成咁都係賣廿五蚊,絕對係良心兼抵食價啦!)

總分:18/20

選擇性質:由於佢只會係舖頭出面擺幾個位,所以外賣打包會好啲。

其實呢間嘅Fish & Chips(炸魚係用可持續捕魚嘅深海鱈魚!)同炸Oreo都相當唔錯,大家都可以去試下呀!仲有一點一定要提,就係老闆娘以前本身係社福界做過一段時間,佢地宜家會請自閉症同弱能人士去做野,真係絕對係名符其實良心小店,下次去開西貢個陣不妨去賣襯一下啦!

係2017年,薯毛毛將會繼續帶大家食盡全港最好味嘅薯條,你地又準備好未呢?下星期六再見啦!拜拜!

小食店:Chip in Fish & Chips

地址:西貢敬民街9號高勝樓地下11號舖

 

想睇返之前嘅推介?Click呢度啦:https://goo.gl/g9WbF3

# ChipinFish&Chips

#薯條

#我係薯條控

#今日薯條睇真D

發表意見