立場新聞 Stand News

今日薯條睇真D(第十集)

2016/12/6 — 18:28

相傳薯條嘅其中一個發源地係黎自法國,今日薯毛毛就帶大家去食法式薯條,仲要係手切、新鮮薯仔,兼係即叫即炸嘅薯條!

話說呢間係佢地係香港嘅第二間分店(第一間係中環嘅IFC),佢地嘅薯條係有兩種口味,分別係香草同紅椒。當薯毛毛話兩隻都要試個陣,收銀姐姐已經話:「嘩!你唔怕熱氣咩?」其實薯毛毛都怕㗎,但係無計啦,唯有頂硬上啦!

睇返張圖,左邊香草味,右邊係紅椒味。望落香草味好似海苔咁款,但食落去絕對唔係呢回事;紅椒味就辛而不辣,怕辣嘅朋友係唔需要擔心。另外,佢地另一個賣點係自家製嘅蛋黃醬同茄汁,真係非常好味!特別係蛋黃醬,完全理解點解食薯條最正宗都係點蛋黃醬,佢地嘅蛋黃醬係做得好好,你食過就會想繼續食!

廣告

評分:

薯條Size:幼薯條

廣告

價錢:$30

賣相:4/5(雖則只係賣$30,但佢地都會俾好多!而且,賣相都幾討好!)

薯條質素:4.5/5(完全食得出有薯仔味,絕對係新鮮薯仔製成,亦都睇到係人手手切,絕對唔係雪藏貨!唯一挑剔係薯條太短身。)

醬汁/調味:5/5(第一次俾滿分!兩隻味都做得好好!而且,佢地嘅自家製蛋黃醬同茄汁都好正!仲要係無限量供應!)

性價比:4.5/5(除左係因為薯條比較短身之外,其他方面都做得好好!)

總分:18/20

選擇性質:三五知己一齊開餐嘅一流之選!

呢間嘅薯條真係整得好好,絕對係誠意推介。另外,佢地除左薯條之外,望落都覺得Burger好似幾唔錯,可以黎試下!話咁快呢個Page已經開左兩個月,已經突破左800個Likes,非常感謝大家嘅支持!你地嘅支持係薯毛毛繼續去食薯條嘅最大動力!下星期六再同大家見面啦,拜拜!

餐廳:Big Fernard

地址:銅鑼灣白沙道11號地舖

#BigFernard

#薯條

#我係薯條控

#今日薯條睇真D

發表意見