立場新聞 Stand News

今晚打喪屍

2017/6/29 — 17:10

圖片來源:《今晚打喪屍》劇照

圖片來源:《今晚打喪屍》劇照

今次終於寫套正正經經嘅戲,唔使再寫爛片影評住。

出版社老闆大作《今晚打喪屍》上影,尋晚居然有得睇優先場(做咗作者幾年終於第一次有甜頭)……我以為王敏奕會坐我隔離,結果只係得責任主編……

***千祈唔好諗住係典型喪死片(如《屍殺烈車》)***

廣告

感想(不含劇透):

-整體合格,我收貨
-張繼聰白只二人各有驚喜,張先生扮賤男入木三分
-王敏奕戲份太少
-頭半部娛樂性極高,套戲頭85分鐘在水準之上
-絕大部份人睇唔明結局(包括我)
-我等緊人拍我嗰本《婚姻這種邪教》

廣告

───

***以下含劇透***
***以下含劇透***
***以下含劇透***

───
───
───

我記得睇過一個訪問,日本一個運動漫畫嘅作者(好似係《網球王子》嘅許斐剛)表示,自己本身想畫格鬥漫畫,無奈少年Jump已經有幾套好受歡迎嘅-One Piece, 火影等-所以編輯唔畀佢再畫同題材嘅嘢。結果佢只能畫運動漫畫,不過條友心有不甘,於是偶爾加插啲動作、血腥、打鬥場面落去,嚟滿足自己嘅慾望。最後套嘢變咗格鬥式運動漫畫咁。

如果你明白呢樣嘢,等同成語「陽奉陰違」,再睇返《紅Van》電影版,就會知陳果只係透過《紅Van》呢個書名嚟拍自己想講嘅嘢;而《今晚打喪屍》,包括人物同結局嗰20分鐘亦大致一樣。我睇晒小說幾期,呢套戲同原著相同嘅有......書名。另外,套戲頭85分鐘都正常,去到吳家麗被秒殺嗰幕開始暴走、雞走出嚟(我講咗三次粗口)、白只臨死前產生幻想、結局用卡通去表達,非常跳躍,亦唔係觀眾預期嘅《今晚打喪屍》。

作為一個凡人,若然不幸成為導演,我只會正正常常拍一套喪屍片去取悅普羅大眾,係劇情同畫面做好本份。如果我好有信心呢套嘢嘅官能刺激已經夠晒皮,可以錦上添花,插啲隱藏訊息落去(留意有前後、主次之分)。點提升官能刺激?例如,既然王敏奕嘅角色係跆拳道高手,我就會安插一段佢同片中唔少戲份但無對白嘅茄喱啡拳手,嚟一場人對喪屍武打中頭目大戰。甚至乎,拳手同黑警作為最終頭目,不以為過。大佬你打隻雞,我真係唔明做乜。然後啦啦隊三人組,呢個組合堅係好可疑同懸疑,三條友不斷喺喪屍堆跑嚟跑去又相安無事,仲唔係鬼?

套戲最撚離譜係,王敏奕嘅戲份好少。王˙敏˙奕呀!《烈日當空》開始留意佢,嗰陣2008年呀,恒指得萬二點渣!阿導演你係咪唔知跆拳道要用乜?用腳呀!你唔畀佢咁多鏡頭、有咁多戲演,都要畀佢show下對腳呀!條婚紗使唔唔使咁長?畀返多啲王敏奕我呀!!!

話說回頭,呢套戲主角已經六個,無可能人人有戲做。導演亦希望戲中每一個出場嘅人物唔係太布影板同跑龍套,出鏡只為領便當。外賣仔同金氏兄弟喺劇社變喪屍嗰幕,有啲感動,唔係一般喪屍片可以睇到。

至於個結局呢……真係令大部份人呆咗,我好擔心導演去謝票嘅場次會deadair一片。我諗咗一晚,結論係:你當係人臨死前會回想好多嘢,幻覺嚟就得。套戲裏面嘅現實真係有喪屍,而嗰段動畫只係白只死前面對自己嘅誠實幻想。你老味,以前本港漫《賭聖》咩?打咗四五百期你結局話係發夢。背後有驚天大陰謀,顏卓靈嗰條線先有第二集,明白未?

最後,我本《婚姻這種邪教》,等緊人投資拍真人版。如果拍得成,我一定要搵王敏奕做主角,仲要安排床戲/姦戲,我蝕少少做男角演呢場戲,然後威迫利誘導演畀返條原本我(我記得當年我講過同樣嘅嘢,不過由林嘉欣代替王敏奕,你話男人變心變得幾快)……當然呢啲劇情同原本個故事完全無關,之不過,改編電影同原著有關嫁咩?嗯,似乎只可以等我自己出錢拍,然後自己做埋導演...咪講咗你哋知我會盡力去取悅觀眾,加強官能刺激囉......電訊盈科?用撚咗你幾呀十鳩年啦…...

 

原刊於作者 facebook

發表意見