立場新聞 Stand News

低極未算低的《內衣少女》

2017/3/7 — 12:46

內衣少女劇照

內衣少女劇照

《內衣少女》

年份: 2008
導演:陳慶嘉
編劇:秦小珍
演員:鄧麗欣、盧覓雪、黃祖藍、鄭中基、文詠珊、JJ

劇情簡介:

學生時期的Miu(鄧麗欣飾)勤奮向學從沒談過戀愛,畢業後在一家內衣公司當內衣調查員,搬進姑姐(盧覓雪飾)的姑居,發現事業有成的姑姐空有一屋子款式漂亮的內衣,卻到死都還是一名處女,讓她決心找個男人嘗試第一次戀愛。

廣告

太子爺Antonio(黃祖藍飾)、新進才子和銀行經理,都前來追求她,一名戀愛高手Lucas(鄭中基飾)也對她大獻殷勤,讓她大感吃不消,還好有幾個戀愛經驗豐富的好姐妹Donut(文詠珊飾)、Celine(湯怡飾)和CC(JJ)開導她,啟發她對內衣與戀愛關係的靈感,讓Miu對愛情與男人都有新的體會。

Donut是Miu的表妹,只對成熟男人有興趣的她,竟和成熟男友的兒子發展出一段三角戀;CC是內衣店的常客,風塵女子打滾情場多年,卻遇上純情的Eugene(安志杰飾);Miu與Donut的空姐鄰居Celine立志嫁入豪門,卻遇上一個窮小子(徐天佑飾)....。

廣告

───

***文章有劇透***

有啲戲,輸人又輸陣,爛嘅機會係戶愚呂弟100%中的100%,未開場個心已經寒一寒。問題係:究竟套戲有幾爛?

《內衣少女》由青春少艾掛帥,《絕世好bra》嘅阿寬陳慶嘉,加上以內衣為主題,我心諗:套戲爛就算啦,但睇下肉都好。既然搵嚟幾個美少女主演(鄧麗欣、文詠珊、JJ、大波動漫Maggie),點都要有大量純感官勁能刺激嘅色情畫面,最起碼都有啲陽光性感嘅戲份,以滿足一班谷精上病嘅男觀眾。

點知,屌你老母,《內衣少女》簡直係掛羊頭,賣狗肉嘅爛片代表作。色情、性感、露肉,乜春都冇。成套戲露得最多嗰個,反而係安志杰,男人嚟喎!仲要兩幕赤裸上身。唔計安志杰,露得最多嘅女人,係盧覓雪!我˙屌˙你˙老˙味!!呢套叫《內衣少女》,唔係叫《內衣老女》,邊個會畀錢入場睇盧覓雪著內衣呀!盧覓雪係好有演員道德,但佢暴露絕對唔係觀眾入場想睇嘅嘢。好,你話主角鄧麗欣同文詠珊身材平庸,露咗都唔會有嘢睇,咁當初你又何苦搵佢哋做主角?好啦,佢哋走玉女路線唔露,咁配角JJ同動漫Maggie,無非係想佢哋露多啲先符合大家對《內衣少女》嘅期望:動漫Maggie是廢嘅,無戲、無露,JJ嗰幕所謂露,完全唔挑逗,浪費咗佢。

劇情薄弱已經係預期之內,亦變得次要;話說回頭,比起上次嘅《阿嫂》、《女人本色》,呢套《內衣少女》故事尚算完整,起碼你睇完唔會有一大堆問號。

另外,角色空洞,行為對白流水作業,無乜驚、無乜喜。有幾點絕對令人火光:

-鄧麗欣嘅心結係乜?睇咗套戲兩次,我都唔明。無結,又何來解扣?

-文詠珊開頭嗰幕通知鄧麗欣,佢嘅阿姨死咗,點解可以表現得咁跳脫?導演係如何引導文詠珊用呢個歡樂嘅方式去講述一個壞消息? 

-JJ係歡場女子,見嘅男人狗公多如天上繁星,何解一嘢就畀安志杰呃到?我又諗真啲……JJ喺現實都係跟咗力王樊少皇……咁套戲真係幾反映現實。

-套戲邊度有講鄭中基真心中意鄧麗欣?鄭中基只係比客串多少少戲份。

-黃祖藍。平時只係覺得佢無聊、演技誇張,有少少詹瑞文現象(註);呢套戲簡直係乞人憎,演技接近浮誇,表情太過造作,角色性格惹人討厭,英文可以用disgusting嚟形容。

──────────────────
文章硬插廣告時段
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/
──────────────────

反而湯怡同徐天佑一段戲幾嗰癮。話說原本佢兩個只係拍散拖,做空姐嘅湯怡一心嫁入豪門,最後發現傻更更、無正職嘅徐天佑先係對自己好嗰個。徐天佑喺有限嘅戲份下,將角色嘅木獨、自悲同戇鳩發揮得唔錯,湯怡演拜金女功力不足,惟最後扮發脾氣仍不失可愛。遺憾呢段故事太短,湯怡為咗徐天佑喊變得非常表面,感動唔到觀眾。

最後一點,就係導演對「內衣」似乎有誤解,以為「內衣」=「胸圍」。可能係導演已經拍過《絕世好bra》(劉青雲、古天樂主演),套戲出乎意料哋收得,希望以個差唔多嘅戲名再下一城。不過喺劇情設定上,《絕世好bra》有趣一億倍-以兩個男人為主角去設計胸罩。《內衣少女》中胸圍公司背景設定,根本與故事無關。即使梁詠琪喺《內衣少女》客串內衣公司高層一角Lena(同喺《絕世好bra》嘅角色一樣名),亦無助改變內衣與故事無關痛癢嘅事實。

好多爛片嘅劇情之所以爛,共通點都係太多角色與支線,喺有限嘅時間加上編劇及導演功力未夠下,劇情變得粗疏不合理,前後矛盾,或流於機械式發展,角色感情空泛,觀眾難以投入。除咗《內衣少女》,仲有我睇完冇寫嘅《愛尋迷》(只係拍得差同編劇弱能,未去到爛嘅地步),同樣犯上同一毛病:太貪心但眼高手超低。

畢竟,世間就只得一套《Love Actually》可以喺兩個鐘內交待七個故事而不失完整性及角色感情,and there will never be another《Love Actually》。

留意,成套戲我係一次都無笑過。以半青春半搞笑嘅片嚟講,《內衣少女》係比預期更差更爛嘅港產片,可謂低處未算低。

───

養份時間:如何翻拍《內衣少女》

-由吸引麻甩仔入場,變為吸引想睇大隻仔、肌肉男嘅女士入場。

-故事背景設為原本設計開女性胸罩嘅公司要開拓男性內衣市場。

-鄧麗欣負責呢個項目,要研究男人,但偏偏就未曾拍過拖,由細到大都讀女校,除咗老竇同樓下看更,冇認識男人。

-為保留鄧麗欣嘅玉女影像,唔使佢露,只需要拍一場春夢嘅戲,呻兩下吟就夠。李嘉欣當年都係靠《墮落天使》嗰幕自慰戲上位嫁渣。

-鄧麗欣遇上唔同男人,最後研發出唔同功能嘅男性內衣,以配合男性需要。例如設計啲膊頭有pad嘅內衣,畀瘦削、矮小嘅黃祖藍,等佢哋撐得起件西裝;有啲超吸汗嘅內衣畀成日打波嘅安志杰;乾爽透氣嘅就畀唔沖涼會發臭嘅徐天佑;可以喺上面寫字、Tailor-made嘅內衣,畀鄭中基(佢向鄧麗欣示愛嗰陣,喺內衣畫咗啲嘢,誘發到佢推出呢款內衣)。無錯,就係將《絕世好Bra》嘅男女性別倒轉,作為《內衣少女》嘅故事大綱。

-將湯怡同JJ嘅角色二合為一,變身為一個喺歡場做嘅女人,成日想搵到有錢嘅真愛(有錢同真愛,呢兩樣嘢幾咁矛盾先得,咁大個人都仲發白日夢)。偶然之下,佢遇到無業廢青徐天佑,包養埋佢(女人包養男人,夠獨特咧掛),代價係幫佢屋企打掃清潔。湯怡遇著空心老棺,一心想呃佢積蓄;徐天佑無意間發現,點知湯怡以為佢妒忌對方仲屌柒佢。最後徐天佑使計拎晒湯怡啲錢走,空心老棺騙財失敗反臉收場,湯怡先發現最愛就在身邊。

-文詠珊嘅角色照為一個普通胸罩售貨員,唔化粧要超醜。安志杰成日嚟買胸罩畀「女友」。文詠珊嘅角色既羡慕,又妒嫉「女友」。點知安志杰去買胸罩只係為咗見文詠珊一面(以前有個廣告就係話個阿伯「唔係想食面,只係想見多你一面」)。啲胸罩係燒畀佢好貪靚但死咗嘅老母盧覓雪。最後文詠珊變身大美人,同安志杰約會。

───

註:有關詹瑞文現象,見《我阿媽發仔瘟》。

【港產爛片系列】
-《阿嫂
-《我阿媽發仔瘟
-《王老吉、OSIM特約:女人本色

發表意見