立場新聞 Stand News

佛系行山 — 本來冇垃圾 何來自己帶走?

2018/5/28 — 20:45

蚺蛇灣回望蚺蛇尖(資料圖片)

蚺蛇灣回望蚺蛇尖(資料圖片)

我真係好偶然情況下才會睇下電視,至於睇到viuTV更加係偶然中的偶然。就在這麼偶然情況下,睇到viuTV訪問「清徑先鋒」,我拍爛手掌。

「清徑先鋒」是一個義工團體,其工作就係組團上山執垃圾。節目中受訪主角話香港山明水秀,甚有親切感,但每當行山,在山徑上見到一堆二堆垃圾便很心痛,我深有同感。他參與「清徑先鋒」就係想出一分力還原山上的面貌,並藉此宣揚「自己垃圾自己帶走」嘅理念!我最喜歡這類會身體力行做實事的人,而唔係坐係度齋吹水,埋怨呢個埋怨果個。

多個人多分力量,我邊看節目已經急不及待Google「清徑先鋒」,填妥報名表登記做義工,期待下次有行動時可以上山出一分力。

廣告

其實每次上山看到地上那些紙巾呀、水樽之類,我就覺得很討厭,想執走佢但又冇合適嘅裝備去儲好啲垃圾,即使執了又唔知應該丟到那裡去,倒不如參加「清徑先鋒」,學習一下人們怎樣組織一班人去合力做好一件事,以及如何執拾和運走山上嘅垃圾。

至於「自己垃圾自己帶走」這課題,我倒想大家思考一下,其實你本來就唔應該帶咁多垃圾上山。去年十月,第一次登上蚺蛇尖,在山頂同伴發現被遺棄的西餅紙盒一個,我都唔知好嬲定好笑!首先我真係要畀個叻佢,登上蚺蛇尖嘅山徑如斯陡峭,體力和技術缺一不可,竟然有人可以施施然拿住盒易爛易碎嘅西餅走上山,真係高手之中嘅高手!問題係,阿哥,山長水遠咁辛苦拿住盒西餅走上蚺蛇尖做乜?貪好玩咩?食西餅可以買番屋企食,或者係屋企附近嘅公園食,唔好拿上山啦唔該。

廣告

我都唔想講應該食完西將個紙盒帶走呢種戇居問題,而係話,你根本唔應該帶盒西餅上山!行山跟野餐真係有所不同,要野餐適宜在山腳那些有檯凳嘅燒烤場或野餐點進行,而行山就真係應該一切從簡:帶足夠嘅水以及可以補充一下體力嘅簡便食物就好了,盡量輕裝上陣,負重沒那麼大,行起上來就更加舒適。本來無一物,何處惹塵埃?我希望大家可以本著佛系行山嘅精神,不要帶垃圾來行山,自然不用把垃圾帶走。

最後要補充一個重點,香港郊野公園的首要任務不是讓你來郊遊享樂,而係保護水塘防止食水受污染。所以保持郊野公園清潔,唔單只係公德問題,而係維護香港人基本生存條件嘅戰略問題。如果你唔明請你馬上上山睇下,香港在持續乾旱情況下,各大水塘近乎乾塘,你就會明白屋企水喉有自來水出,並非理所當然!污染郊野公園之事絕對要零容忍。

發表意見