立場新聞 Stand News

依家出街食嘢,我feel唔到啲食肆有「心」

2015/12/30 — 11:13

《食神》截圖

《食神》截圖

歐錦棠曾經請教過「食神」史提芬周,究竟要怎樣才可以燒出一道無懈可擊的菜。史提芬周當然話其實唔難,因為只有心,人人都可以燒出一道好菜。不過,依家喺香港出街食嘢(特別是連鎖餐廳,買少見少的良心老店除外),我真的無法感受到香港的食肆係有heart去做一道好菜,讓顧客大快朵頤的。

有一啲餐廳,啲枱擺得密到一個點,即使may the force be with you,用盡所有「原力」,都幾乎無法穿過。啲枱擺得咁密,食得有幾舒服,實在可想而知。一間有「心」的食肆,豈不是應該要像《食神》中的那一句「應該考慮到食客最細微的心理」嗎?現在卻貌似連最基本的「有啲空間感去食嘢」也無法達到。

有一啲餐廳,出面等一粒鐘,入去食嘢限時個半鐘。好,我就當又係土地供應的問題,而且仲係一條「寸金尺土」VS「一寸光陰一寸金」的人生哲學問題。究竟,用一粒鐘先等到有得食,分分鐘仲要等到寂寞似夜深,仲值唔值回票價呢?如果你問殷海光,佢應該會話唔會,因為呢個只係一個生物邏輯層。如果你問阿里士多得,咁你應該要去問墳總青永屍先生先啦。

廣告

部份食肆為了賺到盡,不惜在食材上偷工減料。你以為自己食緊雞?少年你太年輕了。當你咬落一舊雞度,你會發現自己淨係食到啲醬汁嘅味,或者係雞汁啲雞汁味,而係食唔到雞味。呢一刻,你會發現,話雞有雞味然後失控爆笑的May姐,其實都唔係咁低b。或者,May姐呢一下大笑,能夠媲美「我自橫刀向天笑」那種無奈於世的笑。有啲食肆甚至學埋梁振英啲語言偽術,原來鮑魚唔係一般的鮑魚,而係魷魚加鮑汁,非常「超然」。呢一刻,你會發現自己從學校的生物系知識,根本不足以應付日常生活的。

 

廣告
 


話說N年前,香港有個稱號,叫做「美食之都」;話說N年之後,香港轉咗個稱號,叫做「賺錢之都」。官看香港政府只懂一味講求經濟發展,食肆冇heart整嘢食有heart賺到盡,卻似乎反而係常態。

 

作者Facebook專頁

作者博客

發表意見