立場新聞 Stand News

其實愛對了人 情人節每天都過

2017/2/13 — 12:33

《賭神》截圖

《賭神》截圖

臨近情人節,各大愛情信箱同發情嘅男女心裏,塞滿本質相同嘅一堆問題:

「我應唔應該鼓起勇氣約心儀對象出街?」

「有人約我情人節出街,我去唔去好?」

廣告

「我驚約唔到佢,點算?」

答案,其實好簡單:喺你對對方有意思嘅大前題下(這個重要),主動啲就約佢情人節出街;如果佢採取主動喺情人節約你,你必定要應承赴約。相反嚟講,如果你對人哋一啲意思都冇,千祈唔好約人/赴約。情人節約會係決意現場,玩嘢嘅話,男嘅死後會畀人燒春袋、女嘅會畀人用水泥抿住陰道。

廣告

主動、被動呢啲議題,平時好重要,喺情人節一啲都唔重要-肯喺情人節出嚟,已顯示佢對你有意思。唔好怕面矇,唔好怕失敗。

同時,我亦要提醒你:主動好、被動也好,愛情係非常隨機,決定結果係負碌/上帝/緣份/彩數/林鄭,甚至乎無人知究竟乜嘢決定結果。好多人同女友老婆結伴同行幾十年,開頭嗰陣相識見面傾計約會都係件好撚奇情曲折嘅事,屎忽撞棍,正所謂「有心裁花花成柳,無心插柳柳成花」。。

分享下兩個真人真事。

───

Helen係因航空姐,長居美國。有次返香港參加婚禮,新娘-即係佢表妹-幫佢喺手機裝咗Tinder。無錯,係約炮App Tinder。

Helen「未聽過、又未玩過Tinder,裝咗之後無乜理過」(當時人口述,我唔信)。返到美國,無聊打開個app,彈咗好多男人嘅相出嚟。好奇心驅使下,佢開始睇下啲相:

「嘩!呢個明明就係吳彥祖嚟,呃人都要有個譜。Next~~」佢用食指將張相向左flip。

「鬼仔?我喺美國識大把,使鬼用app識。Next~~~」又flip。

「呢個幾好樣喎…….(望望人哋profile)……啋,得廿五歲,我好命啲做得你阿媽咧。Next~~」再flip。

「next please~~」flip。

「next」、「next ~~」、「next ~~~~」Helen不斷向左flip,食指都就快推斷。吳彥祖都睇唔上眼,抵你單身咗咁耐。

唔啱,就梗係next,flip走佢。咁做聽落好似無問題,但Tinder唔係Facebook:如果你見到一張相,向左flip係代表你「接受」,向右flip係代表你「拒絕」。(註)

即係……Helen不斷喺度「接受」……真係好弱智。

flip flip下,突然有個男人喺Tinder發訊息畀佢。一個喺比利時香港人,同美國相隔十萬九千里。

二人開始對話。

原來對方喺比利時嘅香港移民。

機緣巧合,無耐二人居然喺土耳其機場巧遇。一個住美國、一個住比利時,喺土耳其第一次見面。佢哋喺機場渡過咗一個晚上(唔好心邪)、傾足一晚計,好有《before sunrise》 嘅浪漫氣牆。隨後二人long distance, 見家長,結婚。直到談婚論嫁階段,Helen先知自己用Tinder嘅方法錯咗。

Yes, 有人會喺一個約炮app識到結婚對象。

原來唔係個別現象,有三四個朋友同我講,佢哋一樣係喺Tinder 搵到真心嘅另一半。其實,連Helen嘅表妹,都係透過Tinder識到佢老公。

───

另一個真人真事。

2006年,有個毒撚喺一個寫作圈嘅聚會上,識到一名女生(仲有其他閒人)。

往後幾年,二人只互加面書,冇傾過一句計、冇交換過電話號碼,無任何互動。後嚟另一次聚會,女生都有去,毒撚唔小心將酒整濕咗女生嘅電話。毒撚話要賠,借機拎咗女生電話號碼,可惜一直唔記得賠錢呢件事……又或者怕要賠錢所以無約對方。

2009年年底,死毒撚無意間睇到女生喺面書上話悶,要尋找刺激。毒撚再stalk下女生嘅photo album,發覺佢不久前先同男友去完越南,而佢男友係成個王力宏咁嘅樣。

對手係王力宏……而自己只係死毒撚。佢猶豫咗好耐,最後鼓起勇氣約女生去看拳賽、打online game。女生爽快答應。

幾個月後,二人開始拍拖。

到2017年,呢對情侶已經拍咗接近七年拖。

無錯,呢兩個人,就係史兄同責任主編。

我到今日都未賠整電話嘅費用畀主編(我嘅講法:我已經肉償了);而佢嘅王力宏男友,其實係佢表弟嚟。

───

Helen裝Tinder,從來無諗過會結埋婚;我約主編,甚至無諗過會成功。好多嘢總要有人踏第一步-無第一步,唔會有隨之而嚟嘅第二三四五六七八九十步……

踏出一步,係咪等同肯定成功?拍拖、結伴、搵到自己嘅另一半,係件好講求緣份、巧合同負碌嘅事。你唔知幾時時來運到,甚至唔知自己有冇機會,往往到你真係掌握到或者錯失咗先會後知後覺。

對於約唔約心儀對象,我嘅睇法係:根本唔使等情人節,今•日•就•約•佢!尋找伴侶,日日都係情人節,梁靜茹嘅神曲<分手快樂>,嗰句「情人節每天都過」,我係如此解讀(另一個解讀係解釋點解唔慶祝情人節)。

膽怯、心大心細、想試又怕失敗,全部係求愛中一定會遇到嘅事。當去銀行開戶口都可能失敗,你去追求一個無血緣關係、非親非故嘅人,同你一齊行、一齊生活、一齊瞓覺,成功係巧合,失敗乃常態。我敢保證,如果有人搭時光機同10年前嘅主編講,佢2010年會同史兄拍拖,拍到2017都未散,主編應該會講句「先生請準時食藥」。莫講話話係主編,我都覺得(1)主編肯紆尊降貴同我拍拖同埋(2)拍拖七年(still counting)係好不可思議,等同你話有日人類可以徒步行上月球咁。

Helen無咗好奇心,唔再開Tinder,今日可能仲係單身;當日主編唔同我出第一次街,故事已經完結。對於愛情,我相信:

試,有機會;

唔試,一定冇機會。

係咪好有共鳴?可惜睇呢啲飛機文,share十次,重溫到2047年都唔會搵到男女朋友(但麻煩你,睇完係要share)。越遲約,佢已經畀人追咗嘅機會就越高;嗱嗱臨whatsapp佢,約佢出街啦。年輕人,衝動啲又如何?大膽啲啦,反正作為香港人,你已經無乜嘢可以再輸。

#情人節 #中出快樂

(本文並非廣告。我亦唔會從呢篇文章得到任何形式嘅報酬;

註:我都唔知flip左定flip右,總知佢就flip到個個都accept......我無玩過Tinder嫁。)

作者 facebook

發表意見