立場新聞 Stand News

千二蚊人情

2015/11/20 — 13:03

約了一位貴人午膳,上星期已訂好餐廳,他早上才著秘書打電話來,問可不可以改地點。秘書說貴人想在公司附近找個地方吃,原因是貴人早上才醒起興叔告假,所以貴人不方便走得太遠。興叔是貴人的司機,已經伴隨貴人接近二十載。

改好地點,貴人準時來到。點了一些點心之後,貴人接到一通電話。

「得啦,唔使客氣啦,畀咗出去又點會收番呢,生日快樂喇,係咁啦。」貴人在電話裏頭說。電話是興叔打來的,原來今天是興叔牛一,所以告假。

廣告

「買咗份大禮畀興叔?」我八卦。

「過咗啲錢畀佢咁啦。」貴人說。

廣告

講到要「過」咁大陣象,數目一定唔細。再八卦一下,問貴人給了幾多錢興叔,不禁嘩一聲。貴人之後解釋,一來是興叔最近抱孫,而興叔兒子的收入不穩定,為了讓興叔一家生活鬆動一點,貴人覺得「畀多少少都應該」。

一來是這樣,那麼二來呢?

再聽貴人說明第二個原因,我肯定,「二來」才是主因。

貴人上年嫁女,興叔雖然受到邀請,但覺得自己身份始終不適合出席場合,所以最後人沒到,但禮到。

婚後數天,女兒問貴人爸爸:「陳國興 (假名) 係唔係興叔?」係呀,點呀?「佢畀咗三千蚊人情呀!」貴人呆一呆,呢筆三千蚊,記住了。有些人可能覺得,興叔對其他人肯定唔會咁慷慨,畀貴人女兒咁多人情,係純粹因為念在貴人喺呢二十年賓主關係都對佢咁好。

就算係咁,都證明興叔識得感恩。慷慨又好,感恩又好,都值得學。

女兒從中三開始,已經到 California 念書,大學讀 USC,圈子都是一班家景不俗的朋友。女兒說,朋友當中,人情畀最多嗰位都係千五。

「Margaret 畀幾多?」貴人問。千二囉,女兒說。Margaret 出名多靚衫,件件名牌。

「Jessica 畀幾多?」貴人問。都係千二囉,女兒說。Jessica 識飲識食,一個月淨係食已經可以使三四萬。

「Mandy 畀幾多?」貴人問。都係千二,女兒說。Mandy 每年買一隻錶,重點係一隻貴過一隻。

從來唔覺得畀五百蚊人情係一件核突嘅事,因為我唔覺得人情呢樣嘢應該有公價。

但我覺得最核突嘅係,出入名車穿金帶銀嘅人,都係想話畀人聽你高人一等,咁點解去到畀人情嗰吓,又要突然將自己平民化,只係畀一個你所謂嘅公價?

節儉係刻薄自己,孤寒係刻薄人哋。刻薄自己嘅人,未必會刻薄人哋;但刻薄人哋嘅人,通常都唔會刻薄自己,呢吓先嘔心。

今日係好日,好多人結婚,謹記三思而行。

發表意見