立場新聞 Stand News

咁嘅Game,你玩埋我個份!

2015/6/1 — 13:40

想打機勁?課金吧。

家陣打機,技術、時間、分析都係其次,只要你課金,即可碾壓對手,在金錢面前,唯一可以戰勝的,只有更多的金錢。

網上遊戲討論,往往見到有人花大量時間係首抽上,亦即係遊戲送比你的第一張咭,「刷到呢張咭可唔可以開局?」「邊張四星/五星/SR咭最強?」「咁嘅隊伍係咪要斬掉重練?」有時我會諗,到底依家係打機?定係刷咭?

曾經有一句名言:沒有最強的角色,只有最強的玩家。

呢位玩家,已經自殺咗,因為佢發現自己再強都敵不過重課玩家,因為佢辛辛苦苦玩左五年嘅遊戲,比一個玩左五日,但係用左五十萬嘅五歲小朋友擊敗。

小朋友贏咗之後,輕描淡寫講咗句:「沒有最強的玩家,只有更有錢的玩家。」

lv1嘅米奇老鼠,贏唔贏到Lv Max嘅黑魔后?
Candy Crush之中,唔夠Step咪買到過到為止囉。
五星呂布又點?都唔夠自我突破三次嘅七星呂布。

愈用腦玩隻Game,你會發覺成為最強的唯有是──課金。

好懷念曾經玩過嘅AOE,無課金,大家用同一種種族,講嘅只有技術。

當時為咗衝16分升城,上網睇高手嘅攻略,殺豬、伐木、採果都有嚴格數量,由一手玩滑鼠,變成會自己Set Hot Key,由括一堆兵亂衝,變成有戰術的攻擊。

封快、城快、攻好定守好?唔同種族嘅對戰亦有唔同,兵種相剋之下你出弓,我出騎、你出騎、我出戟、同時搵人擾騷你村民、推堡去你門口。

一對一已經有無數戰術,更何況幾對幾的團戰?

當年的遊戲,大家都有同樣的起步點,講的是努力、頭腦、技術、合作,輸咗只嘆技不如人,今日輸咗,只嘆錢不如人。

遊戲之中,大家都係求快樂,無論你係億萬富翁定低下階層,用的都是一樣,令我們離開這個金錢為尊的瘋狂世界,可惜,遊戲最終也變得現實,有錢你就可以壓倒一切。

同樣的主線,抽咭、升級、抽咭、進化、更強的敵人、更強的手牌,曾經最高級的是S,變成SS再變為UR和L,然後又有什麼界限突破、什麼另類強化,目的只是課更多的金。

咁嘅Game,你玩埋我個份!

 

原刊於作者facebook page

廣告
廣告

發表意見