立場新聞 Stand News

唔好再講頹飯,唔該

2016/10/12 — 12:00

灣仔 Passion ,我認為係全港島麵包最正,佢嗰個脆到震嘅 Baguette ,廿六蚊一條,可以開五份。算你後生仔大食,開四份,加一隻蛋,九蚊有找。
N i c o l a / flickr

灣仔 Passion ,我認為係全港島麵包最正,佢嗰個脆到震嘅 Baguette ,廿六蚊一條,可以開五份。算你後生仔大食,開四份,加一隻蛋,九蚊有找。
N i c o l a / flickr

我呢篇文,係想寫俾正在食緊頹飯,或者曾經好鬼驕傲咁食過頹飯嘅年青人睇嘅。特登改咗口語化一啲,希望少啲隔膜。

為求照顧九十前嘅讀者,我先解釋一下乜叫「頹飯」。根據維基百科係咁形容:「 2000 年後香港各所大學的學生之間的術語,泛指在各大學飯堂裡售賣的簡單便宜飯食….用料往往粗糙欠特色,烹調方法簡單,最大目的僅是填飽肚子,省錢為上。例子有餐肉煎蛋飯、香腸火腿飯和茄汁豆伴飯等。一些餐廳的頹飯餐單幾乎每天都是一樣的。頹飯的味道差強人意,選擇的原因一般都是純粹「為吃而吃」;另外因為它的價錢壓倒性地比其他食品低廉,所以成為了經濟負擔重的學生的必然之選。」

簡單嚟講,大學飯堂裏面唔好食但夠平,通常十幾蚊至二十蚊左右嘅餐,就叫頹飯。呢啲飯,其實無乜特別,幾十年前我地嘅年代都有,中學生人人食過,入咗大學之後,基本上都唔會食,亦唔駛食。就算間中食吓,都唔會攞出嚟講,更唔會好似而家呢班學生頹友咁,好似好醒,整個「頹飯攻略」出嚟。係,明知係頹,班學生竟然仲出攻略。唔單止咁,最近報紙報導批評,立即有網民出嚟鬧爆,話因為窮先至要食,咁叫做吃得苦中苦,唔離地喎。仲有死仔話,終於揾到女友肯一齊食頹飯,好幸福。

廣告

我挑,咁叫有鬥志?咁叫幸福?計我話,咁叫唔死都無用先真。

唔好同我哋呢代講窮。你哋而家點窮,同七十年代,無得比較。我每日由土瓜灣行去紅磡搭船過海,然後由北角行路去銅鑼灣返學,一程要個九幾鐘,來回成三個鐘,皆因無錢搭過海隧道巴。嗰陣我都唔覺得窮,今日你哋夠膽話窮?乜料呀?頹飯我哋呢代,邊個讀中學時無食過?有時連頹飯都無得食,齋食兩個菠蘿包頂肚添。問題係,明知係頹,係廢,真係有鬥志嘅,上到大學,點解仲要食?仲要好威咁?

廣告

我都讀過大學,知得好清楚,大學生只要肯做,基本上都幾富貴(唔駛供樓又唔養屋企)。因為除咗有政府嘅 Grant and Loan,仲可以做兼職。嗰唓時好多同學都申請咗教書証,去新法教夜學,兼溝女(好多 OL),不知幾爽。有時仲去銀行公會教基本法津。一星期三、五晚,好好揾。食頹飯?講笑咩。同女朋友出街,緊係去大學對面銅煙面囱食大餐啦。而家呢個年代無夜校,但係有唔少連鎖咖排店,補習社,大量工作。我上網睇過,時薪由五十蚊至百五蚊都有,有工無人做。一個月賺四、五千,容乜易呀。咁會唔會出去做嘢會影響讀書?你話呢?而家喺電視見到嗰啲著名律師同醫生,咪係我以前做幾份兼職嘅同學囉。我覺得早啲做吓嘢,仲醒啲。今日大學生話因為窮而要食頹飯,完全老點,原因其實係懶。

好,就當有特殊原因,唔出得去做兼職,咁都唔駛食頹飯。聽講中文大學的學生飯,港幣十一個半,頹中之最頹,就攞呢個做示範。十一個半,出去睇吓,用吓腦,都可以食到好嘢。香港仔有記麵廠,名牌嚟,全蛋麵只不過係 HK$3.5 一個,買兩個,自己煮,好飽喇,要和味啲,用腐乳去撈,都唔駛十皮。灣仔 Passion ,我認為係全港島麵包最正,佢嗰個脆到震嘅 Baguette ,廿六蚊一條,可以開五份。算你後生仔大食,開四份,加一隻蛋,九蚊有找。全港島冠軍之包,想點呀?驚咁食法唔夠營養?唓,食頹飯有營養啲咩?何況我都未講完。剩低仲有幾蚊,食蛋白粉同纖維粉,夠有餘。咁就又好味又有營養。同女朋友食飯,整兩味,去海邊公園開餐,不知幾有型。搞呢啲,我係專家。你班友如果唔係又懶又笨,有乜原因要食頹飯?飯唔頹,係你哋頹。

點解咁勞氣?因為而家嘅年青人,絕對唔可以頹。黄之鋒、羅冠聰無頹,你哋都唔可以;有 2047 喺前面,你哋無資格頹。呢個係鬥志問題,無論環境點差,都唔可以認命,唔可以放棄。無路行,都要有路行,同佢死過,仲要行得好得戚嗰種。就係咁。所以,唔好再講頹飯,唔該。

原刊於飲食男女

發表意見