立場新聞 Stand News

嗌交都有工作坊?

2018/8/9 — 17:48

請你滾 滾出去
妳愛滾 不配做人 爬出去

鬼上身 趕不退
我有信心 不怕行雷
看心虛會是誰

梁漢文同楊千嬅當年合唱一曲《滾》簡直係經典,但老老實實你同我嗌過交嘅都知,現實中真係要嘈起上嚟,真係新仇舊恨咩都數曬出嚟,mean 多十倍都有。不過咁,嘈完,通常都有一方肯出手氹返,唔係就分手100次啦。我同我側邊嗰個係咁,唔知你哋係唔係。久唔久嗌一次,有人可能當情趣,但我總係覺得每次嗌完都好似又多咗條裂紋咁。究竟有無人拍拖可以完全唔嗌交嘅呢?

呢排上 facebook 就見到有個「嗌一場『好』交」嘅工作坊,號稱可以解決「鬧交重覆無限輪迴」。講者係中文大學性別研究課程講師曹文傑(小曹),好似幾掂咁。聽講話會介紹返「非暴力溝通」,仲會有即場練習,衝突前中後都重重包圍曬。嗌交,除咗攻擊與退讓之外,仲係理解彼此需要嘅機會啊!個活動雖然要收錢,但扣除成本之後,一半錢會捐俾「女同學社」,幾有意義㗎!

廣告

小曹點解無啦啦搞個伴侶衝突工作坊呢?原來係因為九月頭有一個「Women's Festival」,個女人節嘅創辦人之一,私密生活用品店 Sally Coco 個老闆 Vera 都話,情侶之間應該要講出自己嘅需要同想法,而唔係默默咁委屈同遷就。你知啦,好多女人都唔開心都唔出聲,尤其上一代更加覺得忍一時就海闊天空咁。今時今日做女人,點解可以再忍氣笑聲呢?

講返轉頭,Vera 本身想做一個「Women's Festival」好耐,加上上年生咗小朋友之後,佢更加覺得女人唔可以因為生咗小朋友之後就放棄自己嘅生活同夢想。除咗「母親」之外,香港嘅媽咪都好值得擁有其他身份㗎。機緣巧合之下,佢今年同幾個女人合作,搞咗全香港首個女性藝術生活文化節!!!

廣告

九月第一個禮拜一連九日,一堆工作坊、研討會、放映會等等等等,去宣揚返女性可以「自主,自愛,自由」嘅理念。開幕演出有《陰道獨白》選段,閉幕嗰夜就有《29+1》,仲有變裝皇后 Coco Pop & frds、新晉DJ Cocoonics、陀地歌姬 Serrini,還有獨立唱作歌手王嘉儀(Sophy)做壓軸嘉賓。一成門票收益,扣除必要開支後,佢哋仲借捐去本地性暴力支援嘅「風雨蘭」。 

無論你係媽媽級又好,定係妙齡少女,甚至男性,或者其他性別都好,Vera 話做「Women's Festival」都係想唔同背景嘅人走出本身嘅枷鎖,活出美麗自由自主。「Women's Festival」唔只係女人嘅事,關心女人嘅,鍾意女人嘅,大家都應該去啊。

發表意見