立場新聞 Stand News

多肉汁港式明爐蜜汁叉燒教學

2015/10/8 — 11:52

【文:Mr. Roo 袋鼠先生】

好喇, 到底如此多肉汁到閃令令既叉燒係點整架呢?

除左相機同射燈之外, 當然就有好緊要既叉燒啦。

廣告

整法:
1。 醃肉 (幾粒鐘)
2。 焗 (約45分鐘)
3。 淋蜜糖(當然係係個爐度拎番出來先淋啦)
4。 再焗 (約10分鐘)

廣告

肉呢:

我呢度用左scotch fillet, 整出來係梅頭, 唔乾唔鞋亦唔肥, 就係剛剛好, 你可以用瘦、用肥, 自己喜歡就得, 我舊肉既肥瘦分布係點呢(這裡指叉燒,不是本人), 睇生肉圖。

至於醃料:

如果唔想太例牌咁就咁用一樽叉燒醬, 係可以咁溝既:

叉燒醬+豉油(生抽或老抽或生抽溝老抽, 總之乜抽都得)+甜醬(或者海鮮醬), 每樣半杯就醃到1公斤肉+有汁剩送飯, 再加1-2茶匙五香粉(圖中樽五香粉係自己手磨既), 中意五香味就落2匙, 唔中意太重就落1匙, 溝完醃料, 試左味, 岩你口味喇, 先至放生肉落去醃。

唔常下廚的朋友, 咩係1杯呢? 標準1杯係250毫升, 如果家裡無量杯, 大約就係一盒盒裝檸茶咁上下啦。

溫馨甜蜜終極浪漫提示:

再提提大家1公斤肉用半杯叉醬半杯豉油半杯海鮮醬已經好多喇。

焗:

焗爐預熱180度C焗約45分鐘就可以(呢度每塊肉係約3/4吋至1吋厚, 如果你的切得厚, 可以焗耐少少)

焗熟之後如果有好多汁浸住, 倒佢出來以備之後送飯, 然後再落蜜汁, 咁焗出來先會深色, 如果太多汁浸住佢, 焗出來就會比較淺色。

至於個蜜汁:

咁用支裝蜜糖係已經焗熟左既叉燒上淋或者搽, 覆蓋整個叉燒面就得, 至於正宗酒樓蜜汁如果大家好有興趣又唔怕煩的, 請留言, 咁我先再覆啦, 費事搞亂大家。

上完蜜汁:

再隊番入焗爐焗多約10分鐘至叉燒表面燶燶地咁就得喇。

再來溫馨終極浪漫提示2: 咩叫預熱焗爐到180C呢? 就係你將個爐較到180度, 等佢到左溫度先至放的野食入去。 大部份食譜約99。9999%都係要你預熱既, 點解呢? 因為每個爐大小同火力都唔同, 由冷轉熱既速度唔一樣, 預熱就可以統一煮食時間標準。

今集講住咁多先, 退朝。

 

作者 facebook page

發表意見