立場新聞 Stand News

大學迎新營嘅幾點備忘

2018/8/23 — 18:57

大學迎新營(圖片來源:中大崇基學院網頁)

大學迎新營(圖片來源:中大崇基學院網頁)

時值 O camp 季節,一街都係揹住索繩袋嘅大專新生。嚟緊係筆者喺大學阻住地球轉嘅最後幾個月,感覺係個講下 O camp 嘅好時機。因為 Year 1-3 時難免太沉醉係個種氛圍裡面,再過兩年講又嫌太脫節無資格。(今年嘅 freshman 已經係 00 年,係難以置信,唔認老唔得)老土嘅擴闊圈子識人抄功課就唔特別講喇,講咗都無人睇,反而想講下關於 O camp 嘅幾件事:

(一)

年年網上都好多人話「一生人一次」嘅答案係「除眼罩」,中四嗰時開始聽人講聽到就嚟 U grad。實際上咁耐以嚟都無聽過真係有人玩呢個遊戲,我強烈懷疑呢個只不過係一個都市傳說。有個講法係個 game 係又一城嗰邊嘅特產,我都冇辦法考究,不過「一生人一次」個 Game嘅玩法(根據描述),真係當 black magic 玩又戇居,當 mass game 玩就更加係 lame 到無倫,所以我真係唔係好信。

廣告

(二)

又,真正一生人一次嘅事真係莫過於去 O camp,我堅決認為,呢種戰戰兢兢但又好期待嘅 Year 1 心情,係人生其中一樣好美好嘅經歷。呢種好後生、咩都唔知道又十分好奇嘅刺激太難得,因為一兩年之後咩都見慣嘅你已經對迎新營嘅前世今生瞭如指掌,個種老練都已經令你番唔到轉頭。

廣告

(三)

師弟臨近入營,WhatsApp 我,好擔心咁話:「成日聽聞 O camp 會好淫亂玩得好癲,我驚我唔係太習慣。」

其實以我所知,八大嘅 O camp 應該都係相對正氣,尤其唔係由 Hall(咳咳… Kong U 舍堂文化… 咳咳)搞嘅 O camp 都應該係健康同唔會過界嘅,因為有學生會睇著。

真係比較參差嘅應該係 Asso/HD 課程嘅 O camp,呢方面實際係點就唔係太清楚喇。其實驚蝕底都輪唔到你驚,莘莘男學子其實應該失望 O camp 太正氣至真。

(四)

有兩個唔同朋友都讀男女比例一比九嘅科 — 九個女先一個男。朋友 A 嘅 O camp 分組係每組都維持九女一男嘅比例,合理吖,其他科嘅朋友聽到都只可以流口水(我可能、或者、有機會、都有少少同感)。

朋友 B 個學系支莊,用佢嘅講法係「由一群尼姑」控制,佢地 O camp 係將新生分開十組,九組係每組都係全女仔,剩底個一組全部人 — 連埋組爸 — 都係有棍嘅。我唔可以透露呢個朋友讀嘅科系,不過佢有機會上堂嗰時主要係學點樣照顧病人嘅。

(五)

係中大,每年迎新營營期都有個好有趣嘅現象:俗稱細 O 嘅學系迎新營按學系有唔同營期,唔知點解每一年商科生迎新營營期個時都一定係落雨咁滯,上年仲直頭打大風添。根據天文台既推測,睇怕今年(八月二十至二十三日)都唔例外,唔知係傾數嘅時候有無考慮過呢個問題呢?唔怕提埋,年年商科生完 camp 之後第二日都要一早起身 reg 科,九成人完 camp 後都再收多一份紀念品:黑眼圈一對。又話說年年中大 BBA  係風光背後都例牌有啲莊同莊之間嘅亂局,圈子政治林林亂咁,聽聞今年開始有唔同?

(六)

當年喺營入面一齊最長時間個幾個人,對咗三四日時間,出 camp 之後就無咩半句。有一日喺 campus 度行嘅時候有個人好熱情咁同我講咗好多句嘢,我有少少呆咗 — 認唔出呢個人,跟著落嚟佢講嘅嘢都已經聽得唔太清楚,嗰時其實都覺得幾慚愧。

反而最傾得埋 keep 得最耐嘅係 camp 入面對咗四五個鐘嗰幾個人。好似大個咗之後,識朋友再唔係咁易,好似以前咁同班日日對著就 friend 得起嚟,人夾人原來唔係講講下。

人來人往,係大學教識我嘅第一樣嘢。

後記:其實應該可以寫嘅仲有好多,依度只係好快咁將腦海入面嘅嘢直接寫出嚟,有機會再寫多啲。唔同學校嘅新生同嚟緊考 DSE 嘅學生都可以 follow 筆者個 Facebook Page,嚟緊仲會寫下關於大學生活同唔同方面嘅嘢,而中大嘅師弟師妹記得一定要 like 中大資訊 Page 同 bookmark 佢個網,好有用 — 我申報自己除咗當年自己用過之外同呢個 Page 無任何關聯,只係佢哋嘅資訊真係好有用,亦都係一班好有心幫新生update 資訊嘅人。

發表意見