立場新聞 Stand News

「大家無謂再呃自己話出面一切正常」-Fear the Walking Dead

2015/9/16 — 11:53

第一集講一個學生同女主角講話網上有消息話有事,女主角叫佢上少啲網。呢張圖係潛力圖

第一集講一個學生同女主角講話網上有消息話有事,女主角叫佢上少啲網。呢張圖係潛力圖

《行屍》(The Walking Dead [下稱TWD],大陸同台灣譯做《行屍走肉》)大受歡迎,一口氣做到Season 6都就嚟上映。最近上映嘅”Fear the Walking Dead” (下稱Fear)係TWD嘅衍生劇,你可以話係「前傳+外傳」都得,因為個故事同TWD班角色似乎冇關係,TWD嘅場景係美國東岸(亞特蘭大一帶),而Fear就係西岸(洛杉磯)。

個故事係講喪屍開始出現嘅頭幾星期,媒體唔知有意定無意,一直都當喪屍出現係有人失常咁報導,而政府就有意隱瞞(因為醫療系統已經知道死人會起身咬人,所以一有人死,醫護人員就要即刻送條屍走),唔警告公眾,警察就只係當開槍打死high嘢失常嘅人咁處理。不過響呢個web 2.0時代,有喪屍出現自然會響網上流傳,但因為故事裡面個世界嘅數碼鴻溝實在太大,喪屍出現就只係少數人(例如我呢啲人)相信嘅事。

(注意:下有首三集輕微劇透)

廣告

網上流傳喪屍片段嘅橋段,幾年前票房唔太好嘅電影Diary of the Dead用過,事隔幾年,人人手上都有部智能手機,人人都用social media,照計喪屍出現嘅消息好快可以由都市傳聞變成可以求證嘅消息,不過睇戲唔好駁戲,我地上Facebook又何嘗唔係不斷中伏,誤傳假消息,又有大量都市傳聞求證唔到?

當全個美國都陸續有「失常襲擊事件」出現,大家竟然都係照樣生活(好似紅Van句對白「大家無謂再呃自己話出面一切正常」咁)。當愈來愈多暴力事件出現,但媒體繼續冷處理,情況就好似法治、人權、學術自由被某種勢力侵害,但CCTVB同各大報紙話俾你地知冇事架,咁大家就信咗,繼續快快樂樂地生活咁。如果唔夠具體的話,大家應該仲記得2003年,網上傳聞滿天飛,話廣州有怪病叫大家煲醋殺菌,然後威爾斯親王醫院出事,政府仲話冇社區爆發,結果就大件事。

廣告

個故事嘅發展,就係當喪屍數量開始到某個數量,政府先至叫人留返響屋企,但又唔話你知咩事。卒之個社會開始出現動亂,咁愈有動亂就愈死得多人,愈死得多人就愈多喪屍,跟住動亂到一個程度,斷網斷電,社會難以運作(斷網喎,直情係世界末日喇….),即使軍隊響第三集開始做嘢,但個故事發展落去應該就係頂唔住文明系統崩潰。

之前TWD做嘅時候,已經有好多fans搵到蛛絲馬跡,話電視版TWD喪屍嘅起源係Breaking Bad裡面啲毒品。而Fear作為前傳都有暗示,例如一開頭個男主角個繼子就係癮君子,佢第一次見嘅喪屍就係另一個high嘢high死嘅女仔,後來佢去搵佢個拆家朋友,質問佢啲貨係咪有事,似乎AMC都係想留啲尾巴俾大家去FF落去。

比起TWD,Fear嘅卡士比較弱,而且啲角色都唔係好上鏡,暫時唔見一啲好型或者好討好嘅角色。似乎佢地係要走比較實況劇嘅路線(唔知同預算有冇關係),講都係做教師嘅中年男女主角新婚,但男嘅有關係極差嘅前妻同仔,女嘅就喪偶之餘有個吸毒嘅仔(好在有個正常嘅女),結果因為喪屍出現,變成新婚男女主角兩個問題家庭大逃亡兼做埋家庭治療--基本上美國電影同電視劇成日都係問題家庭+災難=患難見真情模式。

So far做咗三集,都幾好睇,值得繼續追,追到咁上下就到TWD Season 6做喇。

左起:女主角、男主角、女主角親生女同仔

左起:女主角、男主角、女主角親生女同仔

女主角同一般市民一樣都信錯政府

女主角同一般市民一樣都信錯政府

 

題外話:

TWD同Fear裡面都有唔同族裔,不過TWD fans有個笑話,就係白人為主嘅主角團隊裡面黑人嘅數量會維持不變,即係有新嘅黑人加入,隊裡面就會有黑人死,而隊裡面唯一嘅亞裔角色係韓裔,當現代氣車冇再贊助之後,大家就估佢好可能會好似漫畫原著咁死得好慘。Fear可能因為設定係西岸,男主角同佢個仔係拉美裔,男主角繼子嘅好友同埋繼女嘅男友都係黑人,但都響第二集死晒… 而家主角團隊嘅黑人數目暫時係零。

印象中成個TWD故事裡面,從來冇出現過華人角色。到Fear終於有喇,係主角嘅鄰居兼好友陳太,可惜一出場已經係喪屍…

(後記:謝謝網友留言指正,陳太係姓"Tran",原來係越南人... 呢個時候,唯有搬龍門... 笑什麼?越南人也是華人的近親!)

 

原刊於作者博客

發表意見