立場新聞 Stand News

失戀二十(第一本第十四章 1995-1996)

2016/7/29 — 18:44

「真係㗎?點講好呢?張國強唔係唔好,但係,唔係鍾意囉。」

「真係㗎?點講好呢?張國強唔係唔好,但係,唔係鍾意囉。」

「喂,你真係鍾意張國強咩?」

「邊係呀,你聽邊個講呀?」

「全世界都傳你同佢有嘢啦。」

廣告

「真係㗎?點講好呢?張國強唔係唔好,但係,唔係鍾意囉。」

「咁,我都明到嘅。」

廣告

「係,我承認,佢係對我好好,仲好到直頭有啲誇張。朝朝喺成班同學面對等我,驚死無人知佢等我咁,俾佢嚇親。轉個頭,隔幾日,仲出部步步通俾我,直頭俾佢嚇死。而家搞到好似唔覆佢機,係我錯咁。都係我衰,晚晚同佢傾電話,不過,有時,佢講啲嘢又真係幾好笑嘅,係氹得我幾開心嘅。不過,真係唔係男朋友嗰隻囉。」

「點解呀?對你咁好,直頭似fans追偶像咁喎!」

「我係諗我似王菲,唔使fans啩!

張國強呀,佢好小朋友㗎。啲性格,啲喜好,啲做嘢方法、對人態度,仲小朋友過我。呢個都算。有樣嘢,我就真係唔太鍾意,佢日日猛話對我有幾好有幾好,做咗咪得囉,我有眼睇啦,使乜講咁多㗎?我知我知,佢係個好人,咁無話過揀男朋友要揀個好人啫。如果我今年四十歲都未結婚,我又恨結婚,佢或者真係個完美對象。我今年十六歲咋,要揀,都揀個有型啲啦。」

「唓,講到尾,咪又係嫌人唔夠靚仔?」

「唔係話靚仔唔靚仔呀,咁,靚仔就當然加分,但係唔靚仔都唔係死罪喎。不過,都唔係重點。點講好呢?重點係個動機嘅問題。你知唔知佢究竟為乜要追我追得咁緊要?聽人講,咪又係貪我靚女,等佢可以喺朋友面前威水?我問佢,佢又死口唔認。喂,認,都仲有型啲喎,至少敢做敢認。又唔係,仲話喜歡我係我。唉⋯⋯即係無原因啦。連諗個似樣少少嘅理由都諗唔到出嚟。
同埋呢,佢太自我中心啦,佢諗嘢,永遠諗自己先,佢係想佢自己開心,先至對我好;唔係真係想我好,所以先對我好呀。你明唔明呀?」

「喂,你講到佢咁唔掂,咁你又日日上堂都陰陰咀笑,好似好sweet咁?」

「咁佢又唔係話好唔掂,都有好多優點。咪住咪住,有電話入呀,你等我一等。」

「喂,佢今日又喺度講你喎?」

「又講我?今次又講我乜呀?」

「咪話你好冧佢,話佢實溝硬你囉,話佢自己好勁囉,乜女都溝到囉,大家唔恨得咁多囉。」

「有冇搞錯呀!我幾時有好冧佢呀?溝硬我,你估佢劉德華呀?」

「可能佢當自己郭富城呢?」

「郭富城都未必追到我啦。真係嬲呀!」

「唔好嬲啦,使乜為咗呢啲人嬲呀,由得佢講囉,愈講得多,佢咪愈瘀?」

「喂呀,我唔同你講住啦,Mandy係隔離條線呀。」

「好啦,咁你夜啲打俾我啦。」

「睇下點先啦。」

「喂喂,仲喺唔喺度呀?」

「喺呀,大小姐。」

「頭先傾到邊度呀?」

「傾到我問你點解呢排日日都好似好開心咁呀,你講到個傻仔咁乞人憎。」

「喂,不如咁,我問你一個問題。得唔得?」

「你問囉。」

「如果,有兩個人追你。一個呢,好就得你,好好人,好規矩,連掂都唔係好敢掂你。另一個呢,就好進取,有少少古惑仔咁嘅feel,望上去係醒目啲,同埋好似man啲,你會揀邊個呢?」

「我好似同你講過,我懷疑自己係鍾意女仔㗎喎。」

「你當住自己鍾意男仔先啦。」

「咁呀,我估我會揀個好人啩。我好驚俾人呃呀,揀個壞人,好似明知前面有個窿,都要專登跌入去咁,好戇居啫。」

「咁你可能可以將個壞人變好呢?」

「咪傻啦,將個好人變壞就話容易啫,邊有人可以將個壞人變好先得㗎。」

「我咪可能得囉。」

「點解你會可能得呢?」

「咁你唔係唔知自從我前年箍完牙之後,有幾多個男仔試過想追我先得㗎。咁呀,咁多人爭,如果俾個壞人爭到,佢都要變好先唔會俾其他人搶我走啦。」

「根據你個theory,小姐,佢應該要變得更加壞,先可以吸引到你繼續鍾意佢落去喎。係咪先?」

「哈哈,又好似係喎。」

「其實呀,個傻仔咪幾好,之前咁多人想追你,個個都係做少少嘢見冇聲氣就立即放棄,係得佢咁肯死纏難打咋喎,追咗你咁耐,連手都無話要拖下你,嘩,朝朝企定定等你返學,晚晚同你傾粒幾鐘電話,唔攰咩,你估真係。」

「佢可以同我傾電話,不知幾開心啦。」

「咁又奇怪,你又肯同佢傾咁多電話?」

「又唔知點解喎,同佢傾電話,個感覺好似舒服過見佢真人㗎喎,佢喺電話入面,講嘅嘢,好似比較誠懇啲咁喎。」

「其實,係咪你自己覺得佢啲行為好到難以罝信,先覺得佢假咋。講真,我聽你講佢咁耐,佢啲行為,真係癡X線㗎喎。」

「喂呀,你咪講粗口啦,我會打冷震㗎。哈哈哈哈。」

「咁你話係咪先?我諗,如果佢用同一種方法對付我哋學校任何一個女仔,都掂咗啦。係搞唔掂大小姐你咋。」

「唔係啩?」

「係喎,就快大旅行喎,買咗衫未呀?」

「係喎,喂,今年知道去邊未呀?」

「咁又唔知喎,嚟嚟去去,咪又係淺水灣或者北潭涌。」

「唔係喎,好似話對面間男校今年去南Y島喎。」

「南Y島?」

「南丫島呀!」

「嘩,阿張生都爆幾多嘢你聽喎。」

「唏,你咪理啦。我冇衫喎,搵日去百利睇衫囉。」

「講真吖,又真係好羨慕你嘅,又瘦,條腿又長,著乜衫都好睇,求其著件tee著條短裙,已經殺晒,難為你個friend我呀,企埋你身邊,成個矮冬瓜咁呀。」

「唓,你都話你唔鍾意男人,有乜所謂啫。」

「咁女人都鍾意靚女人㗎!」

「咁我唔鍾意女人咪得囉!」

「你又知你唔會鍾意女人?」

「我話唔會就唔會啦!」

「點解呀,喂,講我知啦?」

「唔好問啦?總知唔會同你爭飯食啦。」

「哦,你已經有鍾意嘅人,喂,係邊個呀,佢有冇份追你㗎,快啲講嚟聽下啦。」

「咪咁八卦啦。」

「呢啲唔係叫八卦,呢啲叫關心好朋友。講真吖,過埋今年,下年分分鐘我同你都讀唔同學校啦,到時仲keep唔keep到,都成問題。如果你真係有男朋友,就仲難,你肯定晚晚陪條仔都唔陪我。」

「咪傻啦,我同你肯定一生一世啦。除非你重色輕友啫。」

「如果我真係重色輕友,咁我咪當你係色咁去溝你囉。」

「哈哈,我真係驚你會鍾意我㗎。唔同你傾啦,去沖涼呀!聽日係咪去自修室呀?」

「去囉,唔讀唔讀,都要讀下㗎。記得帶啲past paper,帶埋本恐龍去呀!」

 

作者 facebook

發表意見