立場新聞 Stand News

失戀二十(第二本第十三章1995-1996)

2016/9/14 — 10:20

就這樣簡單,我就跟張國強正式分手了。

很多朋友都笑我傻,一開學,張國強追李嘉慧追到街知巷聞,一失敗,就話鍾意我。我咁都答應?咪即係擺明收留李嘉慧玩完唔再玩的玩具?而且,張國強點會係好人?根本係一個玩弄感情的賤人,一係兩個都鍾意,一係兩個都唔鍾意,一係鍾意李嘉慧然後玩我,搵我做水泡,點講都好,都係衰。我應該睬佢都傻先啱。點會肯同佢拍拖,做佢女朋友?

或者,我無乜要求吧。由細到大,阿媽都想我讀好書,做個醫生。阿爸喺我好細個已經走咗,阿媽喺醫院做阿姐,帶大我同細佬。喺佢眼中,做到醫生先係出人頭地。我細佬,讀書成績唔好,好難要求佢突然突飛猛進,叻到入大學不特止,仲要入埋醫科。所以,所有寄望都放晒喺我身上,從來無人問過我究意想做乜,只係話我知我要做乜。我要讀書,我要上教會,我要補習,我要做功課。最好唔好嘥時間去跳舞,最好唔好嘥時間去打排球,更加唔可以嘥時間拍拖。我讀女校,好彩,身邊無乜邊個朋友有拖拍,有男仔追。好啦,終於有人追我,刻意做啲嘢討我歡心,我已經好開心啦。之前,識嘅男仔,多數都係教友,好乖,唔會好似張國強咁。我好想試吓,拍拖究竟是什麼的一回事。

廣告

是不外如是。你估我唔知張國強仲成日掛住李嘉慧咩?佢話根本唔係鍾意李嘉慧,所以俾陶大宇搶走咗,佢唔係因為失去李嘉慧而難過,只係憎恨陶大宇的所作所為,覺得佢好卑鄙。我諗一半一半啦。佢一方面係好憎李嘉慧同陶大宇搞到佢無晒面,被所有人嘲笑;另一方面,佢根本就放唔低李嘉慧,只係無可奈何要接受現實。所以,佢都好辛苦,我咪當幫下佢囉。神愛世人。

呢個幾月,你話我開心咗,唔算,可以話係增長咗見識囉。有時,見唔到佢,都會掛住佢;不過,一諗起佢見到李嘉慧嗰時嘅神魂顛倒樣,就覺得自己好蠢,都唔知點解仲要對佢咁好,都無用,佢都係一樣,無改變。去到咁嘅情況,再同佢見面,都唔會有什麼好事發生吧。我都有諗過同佢好好哋傾一傾,講清楚,究竟佢想點。都係算啦,佢一定唔認,佢一定唔會做衰人。佢習慣咗做受害者角色,就算佢幾唔想同我一齊都好,我知佢一定唔會開口。

廣告

慢慢,我反而搵佢朋友小豬仲多。一開始,搵佢,我其實係想透過佢,去了解多啲張國強,睇下究竟我可以做乜,先幫到佢。點知,小豬叫我乜都唔使做,等張國強主動做,我到時再配合就夠。然後,我哋就開始傾閒偈。佢講下佢同佢女朋友啲嘢,佢女朋友又野蠻又惡死,小豬都可以忍耐,我好唔明,於是我係咁問點解。哈哈,小豬講嘢好笑過張國強好多,傾傾下,有時傾到凌晨兩三點都唔覺,又唔眼瞓嗰喎,都唔知點解會咁。

傾多幾次,諗諗下,既然佢哋咁老友,咁我不如叫小豬幫我傳達分手訊息啦,咁咪無咁尷尬囉。佢起初話唔肯,話驚張國強會唔開心,講分手無理由靠中間人傳話。我覺得無所謂喎,我同佢根本無乜點見面,就算真係分手,對佢影響唔會太大。而且,佢哋兩個咁老友,唔會為呢啲事嬲咗對方。最後,小豬都應承佢,但係佢就叫我錄啲說話落餅帶度,唔好真係叫佢就咁講一句分手算數啦,我覺得都合理。於是,就錄咗餅帶交俾小豬。

約佢見面交收。小豬一直講到佢女朋友好黐身,又煩,咁我以為佢一定會跟住小豬出嚟啦。我都想見下佢女朋友究竟乜樣,可以咁乞人憎都有男朋友。又奇喎,小豬明明話佢哋已經復合返,但居然唔見佢女朋友出現。我去咗尖沙咀搵佢,等佢放工,之後就傾左一陣。

「你又話你女朋友晚晚等你放工嘅?」
「今晚你嚟搵我嘛,我咪叫佢唔好嚟,呃佢話要開OT囉。」
「我仲諗住可以見到你女友㖭。」
「有乜好見吖,咪又係人一個。」
「唓。嗱,呢餅錄音帶,就唔該你幫我交俾佢啦。」
「你諗清楚㗎啦?」
「諗清楚啦,我真係要讀書啦,再唔讀,阿媽真係會鬧死我。」
「咁你哋可以維持住關係,咪等考完試之後先見番面囉。」
「算啦,你估我真係咁笨,完全唔知佢心裡面諗乜咩。」

那個晚上,我跟小豬其實談得算多。到最後,我竟然有點羨慕Polly。大家都是單親家庭長大,佢阿媽完全唔理佢,由得佢做乜都得。佢鍾意小豬,會乜都唔理,只係想全情投入,佔有小豬愈多愈好。雖然,搞到小豬有時覺得好大壓力,好似每分每秒都有人監視住自己咁,不過,兩個人都會同意係互相喜歡對方。我學唔到呢種投入,由細到大,我同身邊的人都好似有一層隔膜,我聽唔明佢哋傾談的內容,佢哋更加唔可以理解到我。個個都覺得我係怪胎。我好記得,張國強都話過自己係怪胎。有時,我真係好想自己可以更加投入,話唔定,會發現張國強更加多優點。可惜,摺紙烏龜已經係極限了,要我再對佢好,我怕我最後真係輸唔起。我太怕受傷了。做任何事,都會先諗到最惡劣的下場,盡量唔會令到自己遇到最惡劣的下場時,會出現完全不知所措的狀態。

李嘉慧走了之後,女主角也不是輪到我。我的戲份,行到最後了。就解答一下大家的疑問吧。第一:張國強常叫我33C,老實,未免太看少我啦,實際數字不說了,總之大過33又大過C啦。如果有得揀,我當然唔想咁勁啦,又多人望,又辛苦,著衫又唔好睇。我又沒打算去選美。第二:第一日在柏麗大道見到小豬,是小豬趁張國強去廁所時,鬼鬼崇崇咁問我攞電話號碼的。用今日的語言,即是抄我牌。第一次打電話找我時,跟我說剛跟女朋友鬧大交,要分手,好唔開心,想搵個女仔傾下計。我始終是一個怕醜的少女,點會咁勇敢主動問第一日見面的男仔拎電話號碼喎。張國強,希望你不要誤會我。我跟小豬沒有任何關係,從來沒有,只是一對透過你認識的普通朋友。

 

作者 facebook

發表意見