立場新聞 Stand News

失戀二十(第二本第十九章 1997)

2016/9/27 — 17:10

蘭桂芳。(圖片來源:Wiki.lkfa@wikipedia)

蘭桂芳。(圖片來源:[email protected]

其實,我真係無心靠害張國強。

件事如何發展,唔到我控制。Polly來公司搞事時,我同高妹真係無嘢。未有嘢。我想介紹高妹俾阿強識,都係出自真心。咁佢哋高度係好襯喎。叫阿強約高妹食飯,係好合理的建議,我同高妹係好傾啲,但係我以為只係朋友啫,咁叫個朋友約另一個朋友,看看他們可否變成情侶,好合理吖。

就係衰在三個人食完晚飯之後,我叫阿強約高妹食飯之後,咁阿強就約高妹食飯。高妹應承咗之後,就打俾我,問我:「你做乜叫你個friend約我食飯,你好想佢溝我咩?」「佢唔好咩,高過你嘅男仔,好難搵㗎。」「我有話過要搵個高過我嘅男仔咩?」「咁你又冇。咁唔通專登搵個矮過你嘅咩?」「你同我傾咗咁多次偈,講過咁多心事,你唔知我諗乜嘅咩?」「你咪話你想搵個男朋友囉。所以我咪介紹個男仔你識囉。佢真係幾Ok㗎,係唔算好叻講嘢,又唔係話好靚仔,但係心地好好㗎,佢對女朋友好好㗎,讀書又叻。」「你對女朋友都好好吖,Polly呢啲咁煩嘅女人,你都可以忍咁耐。」「唉,咪講啦,咪一樣分咗手。你睇吓我,個傷口仲流緊血呀,你好快啲過嚟幫我打針㖭呀,無陰功呀真係。」「你係咪對個個女仔都咁口花㗎?」「睇下邊個啦,靚嘅,咪口花少少囉。」「咁我算唔算靚吖?」「全香港意粉屋最靚係你㗎啦喎。」「真嘅?」「真啦,計埋Pizza Hut,都應該無人靚得過你。計埋肯德雞,就難講啲。」「小豬呀,其實我鍾意你。」「吓?」

廣告

係勒,件事就係咁玩嘢,換了你是我,你會點吖?我有諗過即刻同張國強講,咁咪盞hurt多佢一鑊?同埋擺明玩嘢啫,叫完人溝女隔唔夠一粒鐘就話俾佢知條女冧自己。我又有諗過即刻拒絕高妹,當無聽過句說話,呢個係最好方法:「咪玩啦,我對個個女仔都口花花㗎啦,你又唔係唔知?我繼續做你好姊妹啦,好唔好?」「好吖,咁你而家話俾我知,你對我一啲感覺都無。你完全唔鍾意我,你講吖。」嘩,小姐,你即係玩我啫。我係個血氣方剛嘅異性戀男人,有個似陳慧珊咁樣嘅女仔,主動送上門,你叫我點推開呀。我沉默了好幾秒。高妹已經搶答:「你講唔出,即係對我有感覺啦。我而家係屋企,一個人,我想你上嚟陪我。」嘩,嘩,嘩,嘩,咁即係點呀,上到去,唔會係一齊睇粵語長片啩?頂,你咁樣引誘我,我點推呀。於是⋯⋯

第二朝,我返工,佢放假,佢答應咗去同張國強食飯。我同高妹講:「你唔好同阿強講我同你嘅事呀,佢之前俾條粉腸出賣過,如果俾佢知道我同你有路,佢自殺都似呀。」「咁我同佢都無嘢。」「總之你聽我講,唔好講俾佢知先啦,好唔好?之後,我會搵個好機會,同佢交代㗎啦。」之後,他們的飯局,過程,你們也很清楚吧。高妹早走,咪就係去咗等我放工囉。

廣告

我聽高妹講,阿強喺個飯局入面不斷提李嘉慧,照計,即係對高妹冇乜特別好感,無諗住出手啦。咁都好啲,至少我唔會變成第二個陶大宇呢類仆街。我嘅如意算盤係咁嘅,介紹另一個女仔俾阿強識,分散佢注意力,然後再話佢知,高妹唔啱佢,又寸又cool,都係等我捱義氣食咗佢啦。十全十美的解決方案。點知,回歸前一晚,同高妹講好咗各有各玩,佢就晨早已經飲到貓晒,四點幾已經打電話嚟同我講,話自己喺老蘭,叫我過去陪佢。佢係咪有病呀?下午四點幾係老蘭搞乜春呀?我仲開緊工喎。咁緊係覆佢話唔到啦,之後放工,再覆機,已經開始搵佢唔到,到返到屋企,同成班仔打牌,仲係一直搵佢唔到,我就開始驚。OK,咁之後的事,你們也很清楚啦,唔清楚的話,睇番上一章啦。

嗰晚,結果我帶住貓晒嘅高妹,返咗自己屋企,我阿媽一早瞓咗,高妹就瞓咗喺我張床,我就瞓咗喺佢隔離。本來,我都諗住call阿強,問佢情況。不過,每當我伸隻手去拎電話,高妹就一定搵個胸嚟壓住我隻手。唉,男人,我仲要係一個好色嘅男人,呢個時候,仲點會打電話俾一個男性朋友,而放棄搞一個異性朋友吖。結果,一晚搞咗唔知幾多次,搞到我瞓著。呢個回歸夜,真係夠晒難忘。到第二朝,起身,都已經十二點幾,我同高妹都要返夜更,咪叫醒佢囉,佢仲話想要嚟多次。到呢一刻,我已經完全忘記了張國強的存在,和去向。他應該未去到生死未卜的程度吧。

係,我知,我係衰仔,但係我未去到陶大宇嗰種賤法。第一:高妹唔係李嘉慧,阿強無鍾意佢鍾意到發晒癲咁樣。第二:我唔係存心玩佢,叫佢去追高妹嚟為自己做掩護咁白痴。第三:以我同佢交情,佢唔會為咗一個唔鍾意嘅女人而同我反面嘅。當前急務,快快同高妹返佢屋企換件衫返工先啦。至於張國強,等我放咗工先再算啦,斷估佢都係喺屋企瞓緊嘅啫。

點知,我望一望個call機,原來佢已經留左九千幾個言俾我,問我仲乜要玩佢。大鑊,佢真係以為我玩佢。佢嬲成咁,我講乜都無用啦,不如等佢下咗啖火先再算啦。所以,我繼續陪高妹返佢屋企,然後搭車返公司,換制服,開工。一直無覆call。

那時,當然不會知道,原來阿強噚晚成晚在中環瞓街。當然不會知道他的確不似重視李嘉慧般重視高妹,但他重視我,原來遠超過重視陶大宇的程度。

那時,當然不會知道,我一個最好的朋友,自此會與我變成陌路。如果我知道,我會不會有另一種處理手法?應該會,不過,大前提,都是會先搞咗高妹。如果你是男人,你大概會明白及體諒我。男人,下半身,永遠主導全身,我記得,這是阿強告訴我的。我在這幾日三番四次証實了出來。終於,我放工了,跟高妹一齊離開公司。

對面馬路,阿強企咗喺度。

 

作者 facebook

發表意見