立場新聞 Stand News

好多夫妻有咗小朋友之後,感情就開始淡

2018/12/5 — 15:21

資料圖片:日劇《回家的鎖匙》劇照

資料圖片:日劇《回家的鎖匙》劇照

話說,有好多夫妻一有咗小朋友之後,感情就開始淡啦。

淡到咩地步呢?聽得最多嘅,係除咗有關子女嘅事情之外,喺屋企,兩公婆基本上係完全冇嘢講的。點解會搞成咁呢?

某日同個舊同學吹水,講起身邊朋友嘅婚姻狀況。發現我哋呢班人到中年嘅中佬,喺結婚十年有多之後,可怕嘅現實係,婚姻出問題嘅數量,遠比婚姻(仲係)美滿嘅多…都仲未計,喺人前人後扮到好恩愛但實情已經係破裂邊緣嗰啲。

廣告

同學話,爆鑊嘅婚姻,通常有三款。第一款,係爆得最明顯嘅,兩公婆結婚冇耐就發覺好唔夾,結完冇耐就嗌離婚。比較好彩嘅,喺離婚嘅時候能夠仲能夠和和平平,道氣過咗之後做返friend都大有人在,但唔好彩嘅卻往往比較多,身家要計數;仔女撫養權又要爭;怨恨永無止境。離一次婚,男也好女也好,其實好傷。不過狠心搞離婚嘅朋友,普遍對家庭同婚姻都仲有憧憬。離,好多時係為咗將來有機會再結,再組織一次家庭。咁係啱定錯,旁人其實冇資格講嘅。

第二款,係是但一方有第三者。呢個我諗係普遍到極嘅pattern:喺另一半面前努力隱瞞,平日扮到若無其事,但紙始終包唔住火,真相到最後都係被揭露。真相揭露之後,出軌嘅一方,喺被逼嘅情況底下需要作出選擇,搞到又生又死咁啦。<-其實呢啲劇情,千篇一律,好悶。

廣告

婚姻爆鑊,當然係壞事。但對上兩款,我覺得反而係相對OK的。原因係,呢兩款都係屬於「有終結」嘅爆鑊,分別在於主動去結束,還是形勢所逼地去結束。最仆街嘅,係喺文章最開頭講嗰款「相對無言」式嘅爆鑊。呢一款之所以大鑊,係因為佢的確係可以令大家永無止境地痛苦一世。

咁嘅婚姻開唔開心?肯定係唔開心,但又唔見得,兩夫妻是但一方有做過啲咩好對唔住對方嘅嘢。點解搞成咁?我諗生活壓力係其中一個因素,生活厭力之大,令到大家都唔再有心力去關心一下對方,感情隨之越嚟越淡。呢個pattern,生仔係致命一擊。香港地生活,唔生細路嘅生活壓力都已經唔細,生仔之後嘅壓力,係需要以倍數計算,對男嘅同個女嘅都如是。父母為子女疲於奔命,搵食又艱難,婚後嘅日子由生活變成生存。屋企裡面嘅所謂另一半,由soul mate變成room mate。

感情淡成咁,如果拍緊拖的話應該必定分手收場。但唔係喎,上年生咗件出嚟喎,幾冇 感情都唯有頂硬上。為咗個仔,冇感情都要忍。人生從此期望放晒落個細路身上,忍辱負重只為個細路有一個可以健康成長嘅環境。只但係,一對彼此冇晒感情嘅父母,對細路嚟講係咪又真係一個所謂嘅「健康環境」?

結婚要諗清楚,生仔更加要諗。頭兩款爆鑊,雖然暴烈但還算有個了結。最後嗰款,可以折磨足你一世。

發表意見