立場新聞 Stand News

好slogan難求,今年終於有

2015/11/26 — 20:37

台灣《動腦》雜誌,一年一度會主辦「廣告流行語金句獎」,嘉許過去一年流行嘅廣告Slogan。若果連續三年入選十大廣告金句,就可以晉升為「永恆金句」。本地出品嘅「不在乎天長地久,只在乎曾經擁有」,就曾經喺第四屆入選永恆金句。

望返香港,呢幾年其實有邊句廣告標語,可以配得上「金句」讚譽呢?

 

廣告
 
 

政府喺製造金句方面,本來有先天優勢--佢哋嘅公益廣告,電子媒體係硬性規定免費播放,而且好多一播就播好幾年。日播夜播,就算唔係妙到毫巔,若喺水準之上,大家點都會記得。但呢幾年,除咗「不可一,不可再」同「咪做大嘥鬼」,似乎冇乜深入民心嘅口號出現過。

一句好slogan,首先當然要易記,令人啷啷上口,益力多「你今日飲咗味?」可以話係箇中表表者;若果可以帶出品牌性格/主張,意涵豐富、有韻味當然更好。幾年前CYMA手表翻譯「in time you'll know」為「知有時,智有時」,帶出「知」、「智」、「時」三者嘅關係,我就覺得係令人回味再三嘅傑作。

廣告

好Slogan難求,不過今年終於有。講緊嘅就係Yahoo!為推廣自家一系列Apps而出嘅新口號--「一日都係Yahoo! Mobile」。齋睇字係get唔到個神緒嘅,要聽先至得:

豹哥唔覺意撞親葉x? 
吳若希同Benz雄齊齊揸解款車? 

呢句口號玩double take,字面意思就係Yahoo! Apps已經可以滿足大家一日嘅需要,完全毋須外求;「一日都係XXX」本身又係一句常用嘅套語,畀大家抵賴、搵藉口嗰陣用。「一日都係土地問題!」、「一日都係689!」,相信大家未講過、都聽過!

上面兩條廣告,攞返葉劉畀麒麟怪撞開,同解款車跌錢市民爭住執兩單嘢嚟玩。片中重現事發經過,鏡頭穿梭於凝結時空之中,千里追兇,最終揭開謎底,一切甩碌原來全因有人掛住玩Yahoo! Mobile Apps!配以豹哥、Benz雄好抵死咁講出口號,既講到啲Apps幾咁惹人分神,又突出到品牌玩嘢嘅本質,實在妙絕!

同時,一個品牌肯用一句咁賴皮嘅口號,再玩咁大攞葉劉呢單政治水嚟玩,都應該係覺得冇嘢好輸,豁咗出去,誓要一新用家眼中嘅形象,而初步睇網民反應,似乎相當正面。

好嘅口號仲要充滿延伸性,脫離TVC嘅context都可以應用得返,呢句「一日都係Yahoo! Mobile」,已經好有潛質演變出「一日都係XXX」嘅萬能key玩法!(唔通係因為咁先至搵吳若希出一出?)

美中不足係成個系列第三、四條片,前者搵嚟Coffee林芊妤,後者就搵少爺占羅莽拍攝,兩條片都唔似頭兩條咁抽熱門新聞水,亦冇左凝結時間嘅特式拍攝手法,冇咁統一咯。

難得有句好口號,希望Yahoo! 可以keep住用,千祈唔好用一兩年就換句新,因為口號要煲,先成「永恆金句」架!



作者:雷文

不想錯過廣告狂人文章,可Click我們這個專頁的like掣,再點選「接收通知/Get Notifications」。

follow 廣告狂人instagram;原刊於廣告狂人

發表意見