立場新聞 Stand News

妳劍橋夠未?

2016/5/19 — 13:23

入娛樂圈,顧名思義,工作是要娛樂人。

一係要你唱歌好聽,一係要你做戲好睇,兩樣都唔掂?好,上去無敵獎門人,畀人糟質,喺你面前爆氣球,起碼要嚇到你叫,最好嚇到你瀨埋尿,觀眾開心,娛樂他人的責任成功。

生活已經好大壓力,現實已經殘酷不堪,所以我打開電視,望住你班藝人,就係要你令我忘記生活,忘記現實。

廣告

偏偏,望住你呢個藝人,娛樂唔到我不單止,你仲要話畀我聽,現實,其實係畀我想像中更殘酷。

觀眾討厭她,我絕對理解,因為我一路看也在一路酸。

廣告

「劍橋生呢個名,絕對得來不易㗎」

夠啦……

「非一般嘅劍橋生,當然有非一般嘅劍橋生活啦!」

真係夠啦。

我睇電視,係要你娛樂我,唔係要你顏射我。

開口十優,埋口劍橋,點解你要令我覺得自己咁渺小?

所以我絕對同意其中一個網民說,難怪你冇乜朋友。

噚晚發惡夢,夢見佢。

我同佢講:「你咁乞人憎,抵你冇朋友。」

她呷一口 English breakfast tea,優雅,I mean 懶優雅地對我說:

「我有冇朋友,應該唔使同你交代。我喺 facebook 有幾多 friends,電話簿有幾多 numbers,大概係 none of your business。」呢個夢真係好迫真,佢嗰啲咩「應該」、「大概」,完全係典型英國人嘅委婉。

佢未講完。

「不過我認,我認我選港姐嗰陣冇朋友,我認我喺呢個電視台冇朋友。做朋友,就算唔係同level,都起碼要啱channel吖,呢度邊會搵到人同我啱channel?即係好似先生你咁,你入到嚟劍橋牛津,一樣唔會有朋友。」

佢終於講完,我跟手推咗佢落泰晤士河。

發表意見