立場新聞 Stand News

嫁勢

2016/2/4 — 17:28

網絡圖片

網絡圖片

港台節目,專訪一位做過二十七次姊妹和四次伴娘的女士。

她叫阿 Sue。

三十三歲的她,仍然單身。

廣告

仍然單身的女人只有兩種:第一種,不想嫁;第二種,嫁不出。

阿 Sue 說她屬於第一種,即是不想嫁。我覺得佢好有型,超然地有型。點樣有型法?「不想」兩個字本身就好有型。

廣告

先唔好講想唔想嫁,我哋探討吓「想唔想發」。如果有個人同你講,「我唔想發」,大家諗諗係乜嘢意思?

唔想發嘅意思,即係有得畀佢揀「發同唔發」,而喺兩者之間,佢揀咗「唔發」。再天馬行空啲去立體化「唔想發」呢件事:而家 Bill Gates 畀張支票你,唔係好多,八千萬美金。你攞住張支票,對住 Bill Gates 淡然一笑,然後喺佢面前撕咗張票,最後補句:Bill,thanks,but no thanks。

嗱,呢啲就叫「唔想發」。

跟住呢個邏輯,應該好容易理解乜嘢係「唔想嫁」。

有個男仔,唔係好靚仔,頂多同劉德華八成似,佢跪喺你面前揸住隻戒指求婚。妳對住個男仔笑一笑,最後說句:華仔,我唔想嫁。

所以話,阿 Sue 唔想嫁,你話係咪有型到飛天。至於阿 Sue 係「真唔想嫁」定「真嫁唔出」,作為觀眾,I always keep an open mind,我信佢,㗎。

「10 個女人,9 個不知道為什麼要結婚。」阿 Sue 這樣說。

錯了,其實係十個女人有十一個都唔知自己點解要結婚。

But then,點解結婚要有原因?點解愛情要有原因?好處減壞處係一個負數,就唔應該結婚?十隻貓有十隻都偷食,十個男人有十二個都有機會去滾,就唔結婚?甚至乎,明知愛情之後係感情,明知結婚之後可能係離婚,都要結?

人夠一定會死,咁唔通你同個大肚婆講,你個 BB 始終有一日會死㗎喎,落咗佢啦,咁呀?

講開生 BB。

阿 Sue在節目中憶起,曾經有位經理姐姐,教她女人應該自強。怎料,這位經理姐姐最後為自己的孩子放棄事業,令 Sue「覺得好恐怖」。

為孩子放棄事業,係好恐怖?

葉某唔係女人,冇資格代表女人回應為小孩放棄事業係唔係一件恐怖嘅事。或者咁,我有個朋友嘅表哥嘅朋友嘅老婆,係一個靚女媽媽。一年前,佢寫咗段嘢喺 facebook,我睇到有啲想喊。

By the way,佢個 post 下面,係一張佢 BB 瞓著覺嘅傻豬樣。

「從沒想過自己有能力成為一位媽媽。每當看著這個小臉蛋,卻會有一份不知從哪裏來的堅持和耐性 (還有體力!) 雖然有時想起好友們已為自己的新工作努力拼搏,自己卻天天躲在家,抱著小魔怪十多小時只為令他吃多一點,然而他卻沒頭沒腦的在哭鬧,真的有點氣餒。但原來,有一種感受,只有親身體會過才能明白,那就是當抱著這小魔怪,看到他安然入睡的那份滿足。他能把一切都變得值得。」

Lovely,縱使會有氣餒的時候,但一切都值得,人生就是這樣的。

怎樣的?

人生,本來就是甜酸苦辣的。

臨死一刻,有齊四種味道給你回味,才是不枉此生。

發表意見