立場新聞 Stand News

學 Jolly Shandy 秒殺劉浩龍

2015/6/7 — 0:47

Jolly Shandy光速秒殺劉浩龍的廣告截圖

Jolly Shandy光速秒殺劉浩龍的廣告截圖

恭喜晒!劉浩龍終於不用靠容祖兒而出名啦!他的一句「每食一啖我對眼嘅視線都要望到呢對咁污糟嘅手」,為他贏盡網民「祝福」,一夜間爆紅,好多在FB同微博筆耕多年嘅藝人,真係恨都恨唔到!

但我想講,並不是他如何抵不住污糟嘅手而要宣佈投降走,而係Jolly Shandy光速秒殺劉浩龍,即時出咗個「污糟手拿住罐Jolly Shandy」嘅Post,仲要加多句「無對呢雙污糟嘅手投降」,成為廣告史上最極速嘅抽水之作(圖一)。

圖一

圖一

廣告

心水清的朋友,你有否留意,Jolly Shandy嘅Post是在Friday night 十一點幾發出。一個品牌如此timely 的靚抽,絕對無可能是無心插柳之作,更絕對唔會係有同事咁啱係FB見到,又咁啱諗到,仲要係Friday Night有人開工,而老闆咁啱又心情好,漏夜approve個post出街。大家出來打工咁多年,心知世上邊有咁多「咁啱遇著剛剛」呀!背後一定係有段故,Jolly Shandy默默耕耘多時,望穿秋水,就係等今晚一舉成名。

廣告

圖二

圖二

Jolly Shandy其實係嘉士伯旗下的一個品牌。個仔咁醒,全因管佢嘅老豆同樣係咁醒。一提嘉士伯,大家一定記得幾日前的一個靚抽,嘉士伯趁宏利病危,第一時間彈出,post了一條登陸太空片,歡迎宏利晚宴上播放(圖二)。嘉士伯一毫子都唔使洗,就可以成功出位。好明顯,佢哋背後係有一班Social Media Experts全天候運作,見機行事,見好即抽。

圖三

圖三

今時今日,營銷「新常態」係今日有位攝,就要即日攝!每一個品牌,都要有做Real Time Marketing嘅心態,即係任何時候,都係出位時候。就好像嘉士伯,今期興講「肉類分割技術員」,佢哋個FB就有穿著Carlsberg圍裙的胸肌男出現(圖三),加番句「可惜嘉士伯唔開豬肉檔」。前陣子興起upload相片上FB測年齡,嘉士伯唔執輸,post番張168歲高齡相(圖四),一齊熱鬧一下。

圖四

圖四

做品牌,有時係唔可以有潔癖,嫌網民對手污糟,反而要放下身段,走入人群,這才是最好的Brand Engagement。

 

發表意見