立場新聞 Stand News

寒流來襲的無限商機

2016/1/28 — 11:41

「何解Uniqlo 會咁好生意而其他競爭對手例如H&M、Zara出晒名講fast fashion、又靚又平;Columbia、North Face做羽絨sell pro,但又唔見有如此墟冚?」(資料圖片)

「何解Uniqlo 會咁好生意而其他競爭對手例如H&M、Zara出晒名講fast fashion、又靚又平;Columbia、North Face做羽絨sell pro,但又唔見有如此墟冚?」(資料圖片)

香港人轉數快,位處世界之冠。在剛過去的一個最冰凍周末,我卻感到有點不解及納悶。

歐美氣象台預報都一早講到明香港會凍到有落雪的可能,先唔好理香港天文台的準確度與反應度之低劣,如此世紀首現的冰凍,除卻引起社交平台的熱烈討論外,其實還有許許多多的商機。Uniqlo大排長龍似乎是意料中事,大中小碼、背心、有領無領、男裝女裝賣到斷晒 ,點解唔事先入多啲貨,零售真係咁保守?連排隊畀錢條人龍竟然有「龍尾牌」同有專人截龍,本想買件超薄羽絨畀阿媽,以盡少少孝意,去到龍尾牌位置,一問之下,佢答話大概要等四十五分鐘先排到去畀錢。心諗:「癲㗎,唔駛錢都未必會排啦!」何解Uniqlo 會咁好生意而其他競爭對手例如H&M、Zara出晒名講fast fashion、又靚又平;Columbia、North Face做羽絨sell pro,但又唔見有如此墟冚?說穿了,Uniqlo款式齊、顏色多、價錢平,quality OK、最緊要係一直以來廣告做得好:簡單、一致、專注,已經深入民心。風雪襲來,第一個諗起嘅品牌就係佢。然而,我建議Uniqlo嘅管理層應該要預見呢個大排長龍問題(可能佢係故意製造如此熱鬧氣氛也說不定),為何不事先調配更多sales、收銀員及收銀counter去疏導人流,如此一來,都係一個購買體驗、對品牌的喜愛度及忠誠度大有分加。排四十五分鐘去買件二三百蚊嘅羽絨,自問除非真係要喺大帽山坐足十粒鐘等人救,否則,唔駛預我!

廣告

以前,香港人追得快、靈活變通,但今次,我真的不明白為何反應如此緩慢。在街上,完全睇唔到賣禦寒產品的流動小販或者小店推賣一些時尚得來又特別、特別得來又cutie的毛毛耳罩、腳套等。放眼所見,就只有頸巾同手套。㸃呀?百年難得一遇的寒流,仲唔好好把握?如果一兩星期前去首爾走轉入返啲毛毛耳罩,我敢寫包單,情況比日本城、豐澤暖風機需求更利害,定必畀人一掃而空、賣到斷!

 

廣告

原文刊於《蘋果日報》

 

 

 

發表意見